សំណង់ប្រវត្តិសាស្រ្ដដ៏ល្បីបំផុតរបស់បារាំង ត្រូវអគ្គិភ័យឆាបឆេះ

2019-04-15 23:29:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គិភ័យ បានឆាបឆេះសំណង់ប្រវត្តិសាស្រ្ត ព្រះវិហារសាសនា Notre-Dame នៅទីក្រុងប៉ារីស ប្រទេសបារាំង នាវេលាទៀបភ្លឺ ឈានចូលថ្ងៃទី១៦ ខែមេសានេះ។ គិតមកទល់ព្រឹកនេះ ក្រុមពន្លត់អគ្គិភ័យ កំពុងបន្តព្យាយាមជួយសង្រ្គោះសំណង់ដែលមានអាយុកាល ៨៥០ឆ្នាំនេះ ប៉ុន្តែកំពូល និងដំបូលរបស់វា បានបាក់ស្រុតបាត់ទៅហើយ។

អគ្គិភ័យកំពង់ឆាបឆេះសំណង់ប្រវត្តិសាស្រ្ដ Notre-Dame (រូបភាពផ្ដល់សិទ្ធិដោយ Reuters)

គិតមកទល់ពេលនេះ គេនៅមិនទាន់ដឹងពីមូលហេតុនៃការឆេះនេះនៅឡើយទេ ប៉ុន្តែមន្រ្ដីបាននិយាយថា វាអាចទាក់ទងទៅនឹងការជួសជុលកែលម្អ ដែលដំណើរការមុនការឆាបឆេះនោះ។

មន្រ្ដីពន្លត់អគ្គិភ័យប៉ារីស បានបញ្ជាក់ថា តួអគារ ត្រូវបានជួយសង្រ្គោះហើយ។ ជំហានបន្ទាប់ គឺជួយសង្រ្គោះរូបគំនូរបុរាណក្នុងអគារ ក៏ដូចជាការពារមិនឲ្យប៉មខាងជើង បាក់ស្រុត។

សូមបញ្ជាក់ថា អំឡុងអគ្គិភ័យឆាបឆេះ មានមនុស្សម្នាជាច្រើនពាន់នាក់ បានចេញមកឈរតាមដងផ្លូវ នៅជុំវិញសំណង់បុរាណនោះ ដែលក្នុងនោះ គេសង្កេតឃើញអ្នកខ្លះយំ អ្នកខ្លះច្រៀងបទលន្លង់លន្លោច ឯអ្នកខ្លះទៀតបន់ស្រន់។ ចំណែកព្រះវិហារសាសនាជាច្រើនទៀតនៅប៉ារីស បានបន្លឺជួង ដើម្បីតបទៅនឹងអគ្គិភ័យនេះផងដែរ។