គ្រូប្រដាល់នៅសៀមរាប សន្យាធ្វើឲ្យ គង់ សំបូរ លេចធ្លោលើសង្វៀនអន្តរជាតិ ក្រោយឈ្នះពាន Khmer Fight
- 2019-04-17 09:35:21
- ចំនួនមតិ 0 | ចំនួនចែករំលែក 0
គ្រូប្រដាល់នៅសៀមរាប សន្យាធ្វើឲ្យ គង់ សំបូរ លេចធ្លោលើសង្វៀនអន្តរជាតិ ក្រោយឈ្នះពាន Khmer Fight
ចន្លោះមិនឃើញ
លោក ជា រិទ្ធ គ្រូបង្វឹកប្រចាំក្លិបអាណាចក្រប្រយុទ្ធ (Kingdom Fight Gym) នៅខេត្តសៀមរាប បាបសន្យាជួយជ្រោមជ្រែងកីឡាករ គង់ សំបូរ ឲ្យឈានដល់កម្រិតកំពូលឡើងវិញ ជាពិសេសធ្វើឲ្យលេចធ្លោក្នុងការប្រកួតកម្រិតអន្តរជាតិនានា។ ការថ្លែងប្រាប់យ៉ាងដូច្នេះ បន្ទាប់ពីកីឡាករប្រដាល់វ័យ ២៣ឆ្នាំរូបនេះ ឈ្នះពានកម្មវិធីប្រកួត Khmer Fight ដែលរៀបចំដោយទូរទស្សន៍ប៉ុស្តិ៍លេខ ៥ កាលថ្ងៃទី១៤ ខែមេសា ឆ្នាំ២០១៩ កន្លងនេះ នៅក្នុងព្រឹត្តិការណ៍សង្ក្រាន្តខេត្តព្រៃវែង។
គង់ សំបូរ ឈ្នះពាននៅកម្មវិធីខ្មែរ Khmer Fight បន្ទាប់ពីឈ្នះ ពុយ វណ្ណៈ ដោយពិន្ទុ។ ការវ៉ៃដណ្ដើមពាននេះ ព្រោះកម្មវិធីតម្រូវឲ្យជើងឯកប៉ះជើងឯក ពោល សំបូរ ជាជើងឯកខ្សែក្រវាត់ Tiffy ឆ្នាំ ២០១៣ ហើយ វណ្ណៈ ជាជើងឯក Tiffy ឆ្នាំ ២០១៨។ ក្រៅពីទទួលបានពាន ១ សំបូរ ទទួលបានប្រាក់រង្វាន់ ៤០០ ដុល្លារសហរដ្ឋអាមេរិក។
គ្រូបង្វឹកដែលមានសញ្ញាប័ត្រអនុបណ្ឌិតភាសាអង់គ្លេស រៀបរាប់ទៀតថា ក្រោយចាញ់ Zhang Chenlong របស់ចិននៅសង្វៀន ONE Championship កាលខែកុម្ភៈ នៅសិង្ហបុរី កូនសិស្សរបស់ខ្លួនមានកម្រិតបច្ចេកទេសកើនទ្វេដង។ ម្យ៉ាងវិញទៀត សំបូរ ជាកីឡាករប្រដាល់ឆ្លាតវៃម្នាក់ ព្រោះគេចេះវ៉ៃដោះ ស្ទាបស្ទង់គូប្រកួត និងរក្សាមិនឲ្យមានរបួសផង ប៉ុន្តែវ៉ៃយកឈ្នះពិន្ទុវាជារឿងល្អបំផុតហើយ។ គ្រូបង្វឹកដដែលនេះក៏រំលឹកដល់កូនសិស្សជារឿយៗដែរថា វាគ្រាន់តែជាកីឡាប៉ុណ្ណោះ ដូច្នេះមិនបាច់ចង់ឲ្យគូប្រកួតរបួសលំបាកព្យាបាលនោះទេ។
ចំណែក គង់ សំបូរ វិញក៏បានថ្លែងដែរថា៖ «ខ្ញុំហាត់ជាប្រចាំក្រោយផ្អាកមួយរយៈ។ ឲ្យតែមានកម្មវិធីប្រកួត ខ្ញុំខំហាត់ និង តមការដើរលេង ហើយក៏ទៅជួបប្រពន្ធដែរ។ ខ្ញុំក៏តមអាហារដែរ អាហារណាត្រូវញុំា និងអាហារណាមិនត្រូវញុំា ដើម្បីកុំឲ្យប៉ះពាល់ដល់កម្លាំង»។
គួររំលឹកថា គង់ សំបូរ ជាអតីតកីឡាករប្រដាល់នៅក្លិបក្រសួងការពារជាតិ មុនផ្លាស់ហ្វឹកហាត់ជាមួយគ្រូ ជា រិទ្ធ នៃក្លិបអាណាចក្រប្រយុទ្ធជាង ១ ឆ្នាំមកនេះ។ គង់ សំបូរ ឡើងប្រកួតនៅសង្វៀន ONE Championship បានម្ដងគត់ ពេលជួបកីឡាករចិន Zhang Chenlong កាលចុងខែ កុម្ភៈ កន្លងទៅនៅសិង្ហបុរី៕