ក្រសួង៖ កម្ពុជា ត្រូវធ្វើបែបនេះ ដើម្បីឱ្យផលិតផលទេសចរណ៍របស់ខ្លួនតាមទាន់ប្រទេសជិតខាង

2019-04-19 06:20:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើធៀបនឹងប្រទេសជិតខាងក្នុងតំបន់ ផលិតផលទេសចរណ៍កម្ពុជា មានកម្រិតនៅឡើយ។ ហេតុនេះ កម្ពុជាត្រូវធ្វើពិពិធកម្មផលិតផលទេសចរណ៍ជាចាំបាច់ សំដៅលើកកម្ពស់ភាពប្រកួតប្រជែងនៃវិស័យទេសចរណ៍កម្ពុជា ជាពិសេស ទេសចរណ៍បែបវប្បធម៌ និងធម្មជាតិ ដែលជាផលិតផលឈានមុខរបស់កម្ពុជា។ នេះបើយោងតាមខ្លឹមសារក្នុងសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១៨ ខែមេសា ឆ្នាំ២០១៩ ស្តីពីកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ស្តីពីគោលនយោបាយអភិវឌ្ឍន៍វិស័យទេសចរណ៍កម្ពុជា។

រូបថត៖ ក្រសួងសេដ្ឋកិច្ច និងហិរញ្ញវត្ថុ

ក្នុងសេចក្តីប្រកាសនេះ បានឱ្យដឹងថា ក្រសួងទេសចរណ៍ បានរៀបចំវិធានការក្នុងការលើកស្ទួយវិស័យទេសចរណ៍ តាមរយៈការអភិវឌ្ឍផលិតផលទេសចរណ៍ ការលើកកម្ពស់សេវាមួយស្តង់ដារមួយ បុគ្គលិកម្នាក់ជំនាញមួយ និងទេសចរណ៍វៃឆ្លាតជាដើម។ លើកម្ពស់សេវាមួយស្តង់ដារមួយ គឺជាបទដ្ឋាននៃសេវាទេសចរណ៍ឱ្យស្របតាមស្តង់ដារអាស៊ាន ស្របពេលដែលទស្សនវិស័យនៃបុគ្គលិកម្នាក់ជំនាញមួយ ជាការគិតគូរថ្មីសំដៅរួមចំណែកដល់ការអភិវឌ្ឍធនធានមនុស្ស ក្នុងវិស័យទេសចរណ៍នៅកម្ពុជា តាមរយៈការបង្កើនចំនួន និងគុណភាពនៃសាលាបណ្តុះបណ្តាលវិជ្ជាជីវៈទេសចរណ៍។

ការអភិវឌ្ឍវិស័យទេសចរណ៍វៃឆ្លាត សំដៅដល់ការធ្វើឌីជីថលរូបនីយកម្ម ក្នុងដំណើរការនៃការគ្រប់គ្រង និងអភិវឌ្ឍវិស័យទេសចរណ៍ ការធ្វើដំណើរ បដិសណ្ឋារកិច្ច និងឧស្សាហកម្មម្ហូប-អាហារជាដើម។

វិធានការខាងលើនេះ ត្រូវគាំទ្រដោយអភិក្រម៤ ដែលជាគោលការណ៍គ្រឹះនៃផែនការអភិវឌ្ឍវិស័យទេសចរណ៍រួមមាន៖ ការពង្រឹងយន្តការស្ថាប័ន ការផ្សព្វផ្សាយក្នុងប្រទេស និងក្រៅប្រទេស និងការសម្រួលធ្វើដំណើរ និងដឹកជញ្ជូនទេសចរណ៍៕

អត្ថបទ៖ សំភី