រឿងដីធ្លីនៅខេត្តព្រះសីហនុ៖ លោក ហ៊ុន ម៉ាណែត អំពាវនាវកុំឱ្យប្រើអំពីហិង្សា ព្រោះគ្មានអ្វីចំណេញទេ
- 2019-04-21 03:23:05
- ចំនួនមតិ 0 | ចំនួនចែករំលែក 0
រឿងដីធ្លីនៅខេត្តព្រះសីហនុ៖ លោក ហ៊ុន ម៉ាណែត អំពាវនាវកុំឱ្យប្រើអំពីហិង្សា ព្រោះគ្មានអ្វីចំណេញទេ
ចន្លោះមិនឃើញ
លោក ហ៊ុន ម៉ាណែត កូនប្រុសច្បងរបស់សម្តេច ហ៊ុន សែន បានថ្លែងថា៖ «ខណៈដែលពេលថ្មីៗនេះ ស្រុកព្រៃនប់កើតមានការតវ៉ារឿងដីធ្លីនោះ សូមឲ្យប្រជាពលរដ្ឋរួមគ្នាដោះស្រាយតាមនីតិវិធីកុំប្រើហិង្សា ព្រោះសមត្ថកិច្ចក៏ជាកូនចៅប្រជាពលរដ្ឋ ហើយយើងមិនចង់ឲ្យមានការវាយប្រហារកាប់ចាក់គ្នា ព្រោះគ្មានអី្វចំណេញនោះទេ។ សូមគោរពច្បាប់ទាំងអស់គ្នា ហើយយើងបានសេចក្តីសុខទាំងអស់គ្នា»។
ការថ្លែងខាងលើនេះ ក្នុងពិធីសម្ពោធដាក់ឲ្យប្រើប្រាស់មហាកុដិ ផ្លូវបេតុង និងសមិទ្ធផលនានា ក្នុងវត្តពោធិ៍អណ្តែត នៅឃុំព្រៃនប់ ស្រុកព្រៃនប់ ខេត្តព្រះសីហនុ កាលពីព្រឹកថ្ងៃទី២០ ខែមេសា ឆ្នាំ២០១៩។
លោកបានអំពាវនាវដល់ប្រជាពលរដ្ឋ កុំទៅចូលរួមធ្វើបាតុកម្មជាមួយគេ ត្រូវខិតខំធ្វើការ ខិតខំរៀនសូត្រពិសេសត្រូវបន្តចូលរួមជាមួយរាជរដ្ឋាភិបាល ក្នុងការកសាងប្រទេសជាតិ ឱ្យមានការជឿនលឿនទៅមុខ ពីព្រោះការធ្វើបាតុកម្មនេះ វាមិនចំណេញឡើយសម្រាប់ប្រទេសជាតិ។
លោក ហ៊ុន ម៉ាណែត បានលើកឡើងថា កងកម្លាំងសមត្ថកិច្ច ក៏ដូចជាអាជ្ញាធរមូលដ្ឋានត្រូវបន្តខិតខំការពារ និងបម្រើប្រជាពលរដ្ឋឱ្យបានល្អ ត្រូវស្មោះត្រង់ចំពោះប្រជាពលរដ្ឋ ប្រទេសជាតិ រាជរដ្ឋាភិបាល និងត្រូវចាត់ទុកផលប្រយោជន៍របស់ប្រជាពលរដ្ឋ ធំជាងប្រយោជន៍របស់ខ្លួន។ នេះជាគោលការណ៍របស់រាជរដ្ឋាភិបាលដែលខិតខំកែសម្រួលនូវអ្វីដែលមិនទាន់បានល្អ ដើម្បីរួមគ្នាបម្រើប្រជាពលរដ្ឋ។
ការលើកឡើងរបស់លោកហ៊ុន ម៉ាណែត ខាងលើនេះ គឺបន្ទាប់ពីប្រជាពលរដ្ឋនៅចំណុចភូមិចំណោទរាម ឃុំបិតត្រាង (អូរត្រាវ)ស្រុកព្រៃនប់ ខេត្តព្រះសីហនុ បានផ្ទុះការតវ៉ារឿងជម្លោះដីធ្លី កាលពីថ្ងៃទី១៨-១៩ ខែមេសា ឆ្នាំ២០១៩ រហូតឈានដល់ការបិទផ្លូវជាតិលេខ ៤ និងមានការប៉ះទង្គិចគ្នារវាងប្រជាពលរដ្ឋជាមួយសមត្ថកិច្ច និងបានបណ្តាលឲ្យសមត្ថកិច្ចចំនួន៦នាក់ បានរងរបួស និងប្រជាពលរដ្ឋចំនួន៨នាក់ ត្រូវបានចាប់ខ្លួន។
ក្រុមប្រជាពលរដ្ឋប្រមាណជាង ១០០នាក់ បាននាំគ្នាមកយកដើមឈើ ដុំថ្មមកដាក់បិទផ្លូវជាតិលេខ ៤ នៅចំណុចភូមិចំណោតរាម ឃុំបិតត្រាង (អូរត្រាវ) ស្រុកព្រៃនប់ ខេត្តព្រះសីហនុ ដើម្បីតវ៉ាប្រឆាំងជាមួយនឹងការចុះអនុវត្តដីការបស់តុលាការលើដីលោកឧត្តមសេនីយ៍ឯក ជុំ សាវុឌ្ឍ។ ហើយនៅពេលកម្លាំងសមត្ថកិច្ចចុះសម្របសម្រួលដើម្បីឲ្យប្រជាពលរដ្ឋបើកផ្លូវជាតិលេខ ៤ ស្រាប់តែប្រជាពលរដ្ឋបានផ្ទុះហិង្សាដោយបានយកដុំថ្មគប់ស្រាចមកលើសមត្ថកិច្ច បានបណ្តាលឱ្យសមត្ថកិច្ចចំនួន៦នាក់ រងរបួស និងរថយន្តមួយចំនួនរងការខូចខាត៕