រដ្ឋមន្រ្តីមហាផ្ទៃ បញ្ជាឱ្យចាត់វិធានការបង្ក្រាប ក្រោយទទួលបានព័ត៌មានពីសកម្មភាពឧក្រិដ្ឋកម្មឆ្លងដែន
- 2019-04-23 04:39:51
- ចំនួនមតិ 0 | ចំនួនចែករំលែក 0
រដ្ឋមន្រ្តីមហាផ្ទៃ បញ្ជាឱ្យចាត់វិធានការបង្ក្រាប ក្រោយទទួលបានព័ត៌មានពីសកម្មភាពឧក្រិដ្ឋកម្មឆ្លងដែន
ចន្លោះមិនឃើញ
ក្រសួងមហាផ្ទៃ បានធ្វើការណែនាំដល់កងកម្លាំងនគរបាលជាតិ និងសមត្ថកិច្ចក្រោមឱវាទដែលមានការពាក់ព័ន្ធ ត្រូវលើកកម្ពស់ស្មារតីទទួលខុសត្រូវឱ្យបានជាប់ជាប្រចាំ និងចាត់វិធានការប្រកបដោយប្រសិទ្ធភាព ក្នុងការប្រយុទ្ធប្រឆាំងឧក្រិដ្ឋកម្មឆ្លងដែនគ្រប់ប្រភេទ មានជាអាទិ៍អំពើភេរវកម្ម ការធ្វើចរាចរណ៍ជូញដូរគ្រឿងញៀនខុសច្បាប់ បទល្មើសសម្អាតប្រាក់ ការជួញដូររត់ពន្ធមនុស្ស ការជួញដូរអាវុធខុសច្បាប់ និងបទល្មើសបច្ចេកវិទ្យា។ នេះបើតាមសេចក្តីណែនាំចុះហត្ថលេខាដោយសម្តេច ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ កាលពីថ្ងៃទី២២ ខែមេសា ឆ្នាំ២០១៩។
ការចេញសេចក្តីណែនាំនេះ ធ្វើឡើងក្រោយពេលដែលក្រសួងមហាផ្ទៃ បានទទួលព័ត៌មាន និងបានធ្វើការកត់សម្គាល់នូវសញ្ញាណទាក់ទងដល់ការប៉ុនប៉ងលួចលាក់ធ្វើសកម្មភាពឧក្រិដ្ឋកម្មឆ្លងដែននៅភូមិសាស្រ្តមួយចំនួនដែលមានការធ្វេសប្រហែល ខ្វះការប្រុងប្រយ័ត្ន។
ជាមួយគ្នានេះ ពាក់ព័ន្ធនឹងបទល្មើសជួញដូរគ្រឿងញៀន និងការសម្អាតប្រាក់ ក្រសួងមហាផ្ទៃ បានដាក់ចេញបទបញ្ជាដល់អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ ត្រូវបង្កើនវិធានការក្នុងការសហការស្រាវជ្រាវ បង្ការ ទប់ស្កាត់ និងបង្ក្រាបឱ្យបានម៉ឺងម៉ាត់ នៅតាមច្រកទ្វារអន្តរជាតិ ច្រកទ្វារព្រំដែនអន្តរជាតិ ច្រកទ្វារព្រំដែនទ្វេរភាគី ច្រកទ្វារតំបន់ព្រំដែន កំពង់ផែសមុទ្រ និងតាមខ្សែបន្ទាត់ព្រំដែន ហើយត្រូវរាយការណ៍ស្នើសុំគោលការណ៍ចង្អុលដឹកនាំជាបន្ទាន់ពីក្រសួងមហាផ្ទៃ ក្នុងករណីមានបទល្មើសកើតឡើង៕