សម្តេច ស ខេង បញ្ជាឱ្យរកមេក្លោងជួញដូរមនុស្សទាំងនៅក្នុងនិងក្រៅប្រទេស

2019-04-23 06:56:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មការធិការជាតិប្រយុទ្ធប្រឆាំងការជួញដូរមនុស្ស បានបញ្ជាឱ្យសមត្ថកិច្ចរកឱ្យឃើញមេក្លោងជួញដូរមនុស្ស មានទាំងមេក្លោងនៅក្នុងប្រទេស និងក្រៅប្រទេស ហើយត្រូវស្រាវជ្រាវក្តាប់ឱ្យបានមេក្លោងក្នុងការជួញដូរមនុស្ស។ ការថ្លែងនេះនៅក្នុងកិច្ចប្រជុំផ្សព្វផ្សាយរបាយការណ៍ជាតិស្តីពីការងារប្រយុទ្ធប្រឆាំងអំពើជួញដូរមនុស្សឆ្នាំ២០១៨ និងទិសដៅ២០១៩ កាលពីព្រឹកថ្ងៃទី២៣ ខែមេសា ឆ្នាំ២០១៩ នៅទីស្តីការក្រសួងមហាផ្ទៃ។

សម្តេច ស ខេង បានលើកឡើងថា ជនល្មើសមិនប្រើប្រាស់ច្រកទ្វារអន្តរជាតិ និងទ្វេភាគី ក្នុងការជួញដូរមនុស្សទេ គឺគេប្រើប្រាស់ច្រករបៀងដើម្បីនាំពលករចេញទៅក្រៅប្រទេស ជាពិសេសនៅខេត្តបន្ទាយមានជ័យ និងខេត្តបាត់ដំបង ត្រូវយកចិត្តទុកដាក់លើបញ្ហានេះ។

រូបថត៖ ហ្វេសប៊ុកសម្តេច ស ខេង

«នៅក្នុងឆ្នាំ២០១៨ យើងបានបង្ក្រាប និងចាប់ឃាត់ខ្លួនជនល្មើសចំនួន ២២៤នាក់ ទៅតុលាការដើម្បីផន្ទាទោស ពាក់ព័ន្ធករណីជួញដូរមនុស្ស និងអំពើធ្វើអាជីវកម្មផ្លូវភេទ បានសង្គ្រោះជនរងគ្រោះចំនួន ២៣០នាក់ ក្នុងនោះមានទាំងក្មេងអាយុក្រោម ១៥ឆ្នាំ និងពី១៥ ដល់១៨ឆ្នាំផងដែរ។ ... ខ្ញុំគិតថា បញ្ហាគន្លឹះ គឺការរកឲ្យឃើញនូវមេក្លោងក្នុងការជួញដូរមនុស្ស បញ្ហានេះ ពិតជាមានការឃុបឃិតពីមេក្លោងនៅក្នុងប្រទេស និងមេក្លោងនៅបរទេស ជាជនជាតិបរទេស»។ នេះជាលើកឡើងរបស់សម្តេចក្រឡាហោម។

រដ្ឋមន្រ្តីមហាផ្ទៃ បន្ថែមថា ការទទួលបានព័ត៌មានពិតអំពីមុខសញ្ញាជួញដូរនេះ គឺជារឿងសំខាន់ណាស់ ដើម្បីឈានទៅបង្ក្រាបឱ្យមានប្រសិទ្ធភាព ហើយដើម្បីឈានទៅលើកវិធានការសហប្រតិបត្តិការជាមួយដៃគូពាក់ព័ន្ធមានប្រសិទ្ធភាព ជាពិសេសយកចិត្តទុកដាក់នៅបណ្តាច្រកនៅតាមព្រំដែនកម្ពុជា ក្នុងនោះខេត្តបន្ទាយមានជ័យ និងបាត់ដំបង ជាគោលដៅសំខាន់ ត្រូវយកចិត្តទុកដាក់ដើម្បីស្រាវជ្រាវក្តាប់ឲ្យបាននូវមេក្លោង និងអ្នកផ្សំគំនិតក្នុងការជួញដូរមនុស្ស»៕

អត្ថបទ៖ សោភា