អតីតប្រធានាធិបតីវៀតណាម ដែលធ្លាប់ធ្វើសង្គ្រាមប្រឆាំងបារាំង អាមេរិក និងខ្មែរក្រហម ទទួលមរណភាព

2019-04-23 08:34:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អតីតប្រធានាធិបតីវៀតណាម លោកនាយឧត្តមសេនីយ៍ Le Duc Anh បានទទួលមរណភាពហើយក្នុងវ័យ ៩៩ឆ្នាំ កាលពីយប់ថ្ងៃទី២២ ខែមេសា ឆ្នាំ២០១៩ ក្រោយធ្លាក់ខ្លួនឈឺអស់ជាច្រើនខែមក។ នេះបើតាមការបញ្ជាក់របស់កូនប្រុសលោក គឺលោក Le Manh Ha ទៅកាន់សារព័ត៌មាន VnExpress។

លោកបានបាត់បង់ជីវិតនៅក្នុងផ្ទះរបស់លោក ដែលស្ថិតនៅក្រុងហាណូយ។

លោកបានចាប់កំណើតក្នុងឆ្នាំ១៩២០ នៅស្រុក Phu Loc ខេត្ត Thua Thien-Hue ភាគកណ្តាលវៀតណាម។ លោកបានចូលរួមក្នុងបដិវត្តន៍នាឆ្នាំ១៩៣៧ ហើយបានក្លាយជាសមាជិកបក្សកុម្មុយនីស្តវៀតណាម នៅឆ្នាំបន្ទាប់។

នាយឧត្តមេសនីយ៍រូបនេះ បានចូលរួមធ្វើសង្គ្រាមប្រឆាំងនឹងបារាំង រយៈពេលជិត ១០ឆ្នាំពីឆ្នាំ១៩៤៥ ដល់ ១៩៥៤ និងសង្គ្រាមប្រឆាំងអាមេរិក រយៈពេល ១២ឆ្នាំ គិតចាប់ពីឆ្នាំ១៩៦៤។ លោកបានចូលរួមចំណែកក្នុងការបញ្ចប់សង្គ្រាមវៀតណាមនៅឆ្នាំ១៩៧៥ ដែលធ្វើឱ្យប្រទេសនេះបានបង្រួបបង្រួមគ្នាជាវៀតណាមតែមួយ។

នៅឆ្នាំ១៩៨១ លោកត្រូវបានតែងតាំងជាអនុរដ្ឋមន្រ្តីក្រសួងការពារជាតិវៀតណាម និងជាប្រធាននាយកដ្ឋាននយោបាយនៃក្រសួងនេះ។ នៅឆ្នាំដដែលនេះ លោកបានក្លាយជាមេបញ្ជាការកងទ័ពវៀតណាម ប្រចាំនៅក្នុងប្រទេសកម្ពុជា ដែលជួយរដ្ឋាភិបាលក្រុងភ្នំពេញ ប្រឆាំងនឹងកងទ័ពព្រៃខ្មែរក្រហមផងដែរ។

លោក Le Duc Anh បានក្លាយជារដ្ឋមន្រ្តីក្រសួងការពារជាតិវៀតណាម ពីឆ្នាំ១៩៨៧ ដល់ឆ្នាំ១៩៩១។ នៅខែកញ្ញា ឆ្នាំ១៩៩២ លោកត្រូវបានជ្រើសរើសឱ្យធ្វើជាប្រធានាធិបតីវៀតណាមរហូតដល់ឆ្នាំ ១៩៩៧៕

ប្រភព៖ Vietnam Express ប្រែសម្រួល៖ សំភី