រាជរដ្ឋាភិបាលត្រៀមដីសង់ព្រលានយន្តហោះនៅខេត្តមណ្ឌលគិរីរួចហើយ
- 2019-04-24 02:24:57
- ចំនួនមតិ 0 | ចំនួនចែករំលែក 0
រាជរដ្ឋាភិបាលត្រៀមដីសង់ព្រលានយន្តហោះនៅខេត្តមណ្ឌលគិរីរួចហើយ
ចន្លោះមិនឃើញ
រាជរដ្ឋាភិបាលកម្ពុជា គ្រោងសាងសង់អាកាសយានដ្ឋានចំនួនបី នៅតាមបណ្តាខេត្តនាភូមិភាគឦសានប្រទេស ដើម្បីសម្រួលការដឹកជញ្ជូន និងលើកកម្ពស់វិស័យសេដ្ឋកិច្ច និងទេសចរណ៍។
អ្នកនាំពាក្យ និងរដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល លោក ជា អូន បានមានប្រសាសន៍ឲ្យដឹងតាមទូរស័ព្ទកាលពីព្រឹកថ្ងៃទី២៣ ខែមេសា ឆ្នាំ២០១៩ថា រាជរដ្ឋាភិបាលបានសិក្សាពីការសាងសង់អាកាសយានដ្ឋានខ្នាតតូចក្នុងខេត្តចំនួនបីគឺខេត្តស្ទឹងត្រែង រតនគិរី និងខេត្តមណ្ឌលគិរី។ ប៉ុន្តែផ្តល់អាទិភាពដល់ខេត្តមណ្ឌលគិរីជាមុន ដោយបច្ចុប្បន្ននេះ រដ្ឋាភិបាលបានត្រៀមដីរួចហើយ សម្រាប់ទីតាំងសាងសង់អាកាសយានដ្ឋានទាំងនេះហើយ។
លោកបន្តថា៖ «រហូតមកទល់ពេលនេះ ការចំណាយសម្រាប់សាងសង់អាកាសយានដ្ឋាននីមួយៗប៉ុន្មានយើងមិនទាន់ដឹងនៅឡើយទេ ប៉ុន្តែជំហានដំបូងគម្រោងនេះ នឹងប្រើប្រាស់ថវិការបស់រដ្ឋាភិបាល។ ការចំណាយសម្រាប់សាងសង់អាកាសយានដ្ឋាននីមួយៗ ខ្ញុំមិនទាន់អាចបញ្ជាក់បាននៅឡើយទេ ដោយសារព្រលាននីមួយៗមានការសាងសង់ និងអាស្រ័យលើចំនួននៃការចុះចតរបស់យន្តហោះច្រើនឬតិច»។
លោក ជា អូន បានបញ្ជាក់ថា គម្រោងសាងសង់អាកាសយានដ្ឋាននៅបណ្តាខេត្តភូមិភាគឦសាន្តនេះ មិនមែនជារឿងថ្មីនោះទេ វាជាគម្រោងរបស់រដ្ឋាភិបាលគ្រោងរៀបចំជាយូរមកហើយ។ហេតុនេះការសាងសង់នឹងចាប់ផ្តើមនៅពេលណា ឬឆាប់ៗតាមដែលអាចធ្វើទៅបាន នៅពេលការសិក្សាបានធ្វើរួច។
គួររំលឹកឲ្យដឹងផងដែរថា កាលពីពេលថ្មីៗនេះ លោក ថោង ខុន រដ្ឋមន្ត្រីក្រសួងទេសចរណ៍បានបង្ហើបបណ្តាញសារព័ត៌មានថា រដ្ឋាភិបាលគ្រោងរៀបចំសិក្សាផែនការមេដើម្បីដាំបន្លែ និងផ្កានៅខេត្តមណ្ឌលគិរី ដោយសារខេត្តនេះមានអាកាសធាតុអំណោយផល ដូចជាខេត្ដដាឡាត់ប្រទេសវៀតណាម។ ការដាំបន្លែ និងផ្កានេះសម្រាប់ផ្គត់ផ្គង់ទីផ្សារក្នុងស្រុក ដែលវាជាផ្នែកមួយយ៉ាងសំខាន់ក្នុងការកាត់បន្ថយការធ្លុះធ្លាយសេដ្ឋកិច្ចក្នុងវិស័យទេសចរណ៍។
លោកបន្តថា ជាមួយនឹងផែនការនេះ ដែលនឹងបញ្ចប់ការសិក្សាក្នុងរយៈពេល៦ខែ រដ្ឋាភិបាលក៏គ្រោងសាងសង់អាកាសយានដ្ឋានខ្នាតតូច ដើម្បីដឹកជញ្ជូនផលិតផលទេសចរណ៍ និងភ្ញៀវទេសចរក្នុងស្រុក និងអន្តរជាតិទៅទស្សនាកម្សាន្តផ្កា និងតំបន់រមណីយដ្ឋាននានាក្នុងខេត្តមណ្ឌលគិរីផងដែរ។
ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីនបានមានប្រសាសន៍ថា ការមានអាកាសយានដ្ឋាននៅភូមិភាគឦសាន្តជារឿងល្អប្រសើរ ព្រោះវានឹងធ្វើឲ្យមានកំណើនទេសចរ និងសេដ្ឋកិច្ចមានការរីកចម្រើននៅតំបន់នោះ ដោយសារការធ្វើដំណើរត្រូវចំណាយពេលខ្លីខុសពីការធ្វើដំណើរតាមយានយន្ត ដែលចំណាយពេលយូរសឹងអស់មួយថ្ងៃ បើសិនជាចេញពីរាជធានីភ្នំពេញ ទៅកាន់បណ្តាខេត្តទាំងនោះ។
លោកស្រីបន្តថា «យើងជឿថាកាលណាមានអាកាសចរណ៍ ហោះហើរទៅកាន់ភូមិភាគឦសាន្តនឹងមានការគាំទ្រច្រើនពីប្រជាពលរដ្ឋក្នុងស្រុក និងភ្ញៀវទេសចរអន្តរជាតិ»៕