កីឡាករល្បីមីយ៉ាន់ម៉ា Phoe Thaw ជឿជាក់លើ ចាន់ រតនា

2019-04-24 04:45:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជើងខ្លាំង MMA របស់មីយ៉ាន់ម៉ា Phoe Thaw ដែលធ្លាប់មកហាត់នៅកម្ពុជានៅនោះ បានបង្ហាញជំនឿចិត្តថា មិត្តភក្ដិរបស់ខ្លួន គឺចាន់ រតនា នឹងទទួលបានលទ្ធផលល្អនាការប្រកួត នៅ ONE Championship ខាងមុខនេះ។

Phoe Thaw ដែលធ្លាប់មានប្រវត្តិប្រកួត ឈ្នះ៧ដង និងចាញ់តែម្ដង នៅ ONE បានថ្លែងប្រាប់ [ខ្លីៗ] ពីប្រទេសមីយ៉ាន់ម៉ា មកថា៖ "រតនា គឺជាកីឡាករដ៏ល្អម្នាក់ ក្រៅពីជាមិត្តរួមក្រុម Fight For Good (FFG) គាត់ក៏ប្រៀបដូចជាបងប្អូនរបស់ខ្ញុំដែរ។ គាត់ជាកីឡាករ MMA ម្នាក់ ក្នុងចំណោមកីឡាករ MMA ល្អបំផុតនៅកម្ពុជា។ គាត់មានជំនាញទាត់យ៉ាងល្អ ដែលខ្ញុំក៏រៀនក្បាច់នេះពីគាត់ដែរ។ គាត់នឹងធ្វើបានល្អ នាប្រកួតបន្ទាប់ ហើយខ្ញុំជឿថាគាត់អាចធ្វើបាន"។

Phoe Thaw នាការប្រកួតកន្លងមក (រូបភាព៖ ONE Championship)

កីឡាករមីយ៉ាន់ម៉ា វ័យ ៣៤ឆ្នាំរូបនេះ បានបន្តថា៖ ***"រតនា មិនត្រឹមតែខ្លាំងក្នុងសង្វៀនទេ តែក៏ជាគំរូល្អនៅក្រៅសង្វៀនផងដែរ។ គាត់តែងតែប្រឹងប្រែងហាត់ ដូច្នេះការប្រកួតទល់នឹងកីឡាករឥណ្ឌូណេស៊ី គឺនឹងក្លាយជាប្រកួតដ៏ជក់ចិត្ត និងតានតឹង ដោយសារកីឡាករឥណ្ឌូណេស៊ី ក៏ខ្លាំងដែរ។ តែខ្ញុំជឿជាក់ថា គាត់នឹងអាចបង្ហាញក្បាច់ប្រកួតដ៏ល្អ គាត់នឹងធ្វើឲ្យគ្រប់គ្នាភ្ញាក់ផ្អើល ហើយនិងធ្វើឲ្យប្រជាជនកម្ពុជា សប្បាយរីករាយ"។***

សូមបញ្ជាក់ថា Phoe Thaw ជាកីឡាករ MMA លេចធ្លោមួយរូបរបស់មីយ៉ាន់ម៉ា នៅ ONE Championship អាចថាជាកីឡាករល្បីទី២ បន្ទាប់ពី Aung La Nsang។ កីឡាកររូបនេះ ធ្លាប់ធ្វើដំណើរមកកម្ពុជាម្ដងជាពីរដង ដើម្បីហ្វឹកហាត់ជាមួយកីឡាករចាន់ រតនា ហើយ ចាន់ រតនា ក៏បានទៅឲ្យទឹករូបគេដល់មីយ៉ាន់ម៉ា នៅក្នុងការប្រកួតភាគច្រើនផងដែរ។

Phoe Thaw (ឆ្វេង) និង ចាន់ រតនា

កីឡាករគុនខ្មែរ ចាន់ រតនា នឹងប៉ះជើងខ្លាំងមិនដែលចាញ់របស់ឥណ្ឌូណេស៊ី Rudy Agustian ក្នុងព្រឹត្តិការណ៍ ONE: FOR HONOR នៅទីក្រុងចាការតា ប្រទេសឥណ្ឌូណេស៊ី នាថ្ងៃទី៣ ខែឧសភា ឆ្នាំ២០១៩។ ក្នុងព្រឹត្តិការណ៍នោះ ក៏មានវត្តមានកីឡាការិនីកម្ពុជា ១រូបទៀតផងដែរ គឺ នៅ ស្រីពៅ ប៉ះកីឡាការិនីម្ចាស់ផ្ទះដូចគ្នា៕

អត្ថបទទាក់ទង៖

អត្ថបទ៖ សុខ សុវត្ថិ