ប៉ូលិស និងមន្រ្តីជាង ៦០នាក់ស្លាប់ដោយសារអស់កម្លាំង ក្នុងដំណើរការបោះឆ្នោតនៅឥណ្ឌូណេស៊ី

2019-04-24 04:56:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្រ្តីរៀបចំការបោះឆ្នោត ចំនួន ៥៤នាក់ បានស្លាប់ក្នុងអំឡុងពេលបោះឆ្នោតនៅឥណ្ឌូណេស៊ី និងក្រោយពេលបោះឆ្នោត ដោយសារតែពួកគេបានអស់កម្លាំងខ្លាំងពេក។ នេះបើតាមការបញ្ជាក់របស់លោក Viryan Aziz ប្រធានគណៈកម្មការរៀបចំការបោះឆ្នោតឥណ្ឌូណេស៊ី កាលពីចុងសប្តាហ៍កន្លងទៅ។

លោកបញ្ជាក់ថា ពួកគេបានអស់កម្លាំងខ្លាំងហើយស្លាប់ បន្ទាប់ពីដំណើរការរាប់សន្លឹកឆ្នោត។ ក្រៅពីអ្នកស្លាប់ ក៏មានមន្រ្តី ៣២នាក់ផ្សេងទៀត បានធ្លាក់ខ្លួនឈឺផងដែរ។

មន្រ្តីរៀបចំការបោះឆ្នោត ដេកសម្រាកនៅឃ្លាំងទុកហិបឆ្នោតមួយនៅទីក្រុងហ្សាការតា

លោក Viryan Aziz ថ្លែងថា ក្រោយមានហេតុការណ៍នេះ គណៈកម្មការរៀបចំការបោះឆ្នោត នឹងបើកការវាយតម្លៃ។ «ការងាររបស់ពួកគេ គឺពិតជាលំបាកណាស់ មានទំនួលខុសត្រូវច្រើន។ ភាពអស់កម្លាំងខ្លាំង អាចនឹងកើតឡើងទៅលើពួកគេ ក្នុងពេលពួកគេបំពេញភារកិច្ច»។

បើតាមលោក Tjahjo Kumolo រដ្ឋមន្រ្តីកិច្ចការផ្ទៃក្នុងឥណ្ឌូណេស៊ី បានឱ្យដឹងថា មន្រ្តីប៉ូលិស ១០នាក់ បានស្លាប់បន្ទាប់ពីធ្លាក់ខ្លួនឈឺ និងអស់កម្លាំង ដោយសារតែពួកគេបំពេញភារកិច្ចការពារយាមកាម នៅតាមមណ្ឌលបោះឆ្នោត ហើយខ្លះត្រូវបានបញ្ជូនទៅកាន់តំបន់ដាច់ស្រយាល។

សូមជម្រាបថា ឥណ្ឌូណេស៊ី បានរៀបចំការបោះឆ្នោតថ្នាក់ជាតិកាលពីថ្ងៃទី១៧ ខែមេសា ឆ្នាំ២០១៩ ហើយនេះគឺជាលើកទីមួយដែលជាការបោះឆ្នោតជ្រើសរើសប្រធានាធិបតី អនុប្រធានាធិបតី និងសមាជិកសភា នៅថ្ងៃតែមួយ។ អ្នកមានសិទ្ធិចូលរួមបោះឆ្នោតមានចំនួនជាង ១៩០លាននាក់ ខណៈមណ្ឌលបោះឆ្នោតមានចំនួន ៨០៩៥០០កន្លែង។ ចំណែកគណបក្សដែលចូលរួមឈរឈ្មោះបោះឆ្នោតមានចំនួន ១៦គណបក្ស (គណបក្សថ្មី៤)៕

ប្រភព៖ Straits Times ប្រែសម្រួល៖ សំភី