ក្រសួងបរិស្ថាន៖ ជនខិលខូចបោកពលរដ្ឋស្លូតត្រង់ ដោយអនុវត្តទ្រឹស្តី «ឈ្នះបានដី ចាញ់បានលុយ»

2019-04-24 06:58:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក នេត្រ ភក្រ្តា រដ្ឋលេខាធិការ និងមន្ត្រីនាំពាក្យក្រសួងបរិស្ថាន បានថ្លែងថា ក្រុមជនខិលខូច បាននឹងកំពុងអនុវត្តទ្រឹស្តី «ឈ្នះបានដី ចាញ់បានលុយ» ខណៈទីផ្សារដីធ្លីនៅកម្ពុជាមានតម្លៃខ្ពស់។ ពួកគេបានភូតកុហកបោកប្រាស់ប្រជាពលរដ្ឋស្លូតត្រង់ដោយយកដីរដ្ឋ ឬដីដែលមានកម្មសិទ្ធិមកធ្វើជារបស់ខ្លួន និងលក់ក្នុងតម្លៃថោកៗឱ្យប្រជាពលរដ្ឋ។

លោកបន្តថា ជនខិលខូចមួយចំនួនបានប្រើប្រាស់ប្រជាពលរដ្ឋជាខែល ដើម្បីរំលោភបំពានទន្ទ្រានកាន់កាប់ដីព្រៃរដ្ឋ ដែលស្ថិតនៅក្នុងឧទ្យានជាតិ និងតំបន់ការពារធម្មជាតិនានា ហើយពេលខ្លះពួកគេបានញុះញង់ពលរដ្ឋឱ្យសាងសង់ខ្ទមតូចៗ និងដាំដំណាំផ្សេងៗលើដីរបស់គេដែលមានកម្មសិទ្ធិដើម្បីតវ៉ាថា ខ្លួនបានតាំងទីលំនៅជាយូរមកហើយ និងប្រសិនបើចង់ឱ្យរុះរើចេញ ត្រូវមានសំណង ឬផ្តល់ចំណែកដីណាមួយដល់ខ្លួនជាដើម។

ជាមួយគ្នានេះ អ្នកនាំពាក្យក្រសួងបរិស្ថាន បានអំពាវនាវដល់ប្រជាពលរដ្ឋស្លូតត្រង់ កុំចាញ់បោកមេខ្យល់ខិលខូច និងកុំចូលរួមក្នុងសកម្មភាពរំលោភបំពានច្បាប់ដែលនាំឱ្យមានការ ប្រឈមចំពោះមុខច្បាប់ ព្រោះគ្មានជនណាម្នាក់អាចយកដីរដ្ឋទៅលក់ដូរបានឡើយ។

លោករដ្ឋលេខាធិការបានរំឮកបងប្អូនប្រជាពលរដ្ឋថា មុននឹងទិញលក់ដី ត្រូវប្រយ័ត្នប្រយែងក្រែងប៉ះចំដីរដ្ឋ ឬដីដែលមានបណ្ណកម្មសិទ្ធិត្រឹមត្រូវ ដែលនាំឱ្យបងប្អូនបាត់បង់ផលប្រយោជន៍។

លោកបញ្ជាក់ថា ទន្ទឹមនឹងនោះ អាជ្ញាធរមានសមត្ថកិច្ចបាននឹងកំពុងតែធ្វើការស៊ើបអង្កេតវែកមុខរកមេខ្យល់ទាំងអស់ និងចង់ចងសំណុំរឿងបញ្ជូនទៅតុលាការ ក៏ដូចជាការពិនិត្យ និងដកហូតមកវិញនូវដីរដ្ឋដែលទន្ទ្រានកាន់កាប់ ដោយខុសច្បាប់ពីក្រុមជនខិលខូច។ កន្លងទៅនេះ អាជ្ញាធររបស់រាជរដ្ឋាភិបាលកម្ពុជា បានចាត់វិធានការច្បាប់ប្រឆាំងនឹងបទល្មើសនេះ នៃការរុករានទន្ទ្រានកាន់កាប់ដីនៅក្នុងតំបន់ការពារ ហើយមេក្លោងមួយចំនួនដែលនៅពីក្រោយបទល្មើសនេះ ត្រូវបានចាប់ខ្លួន និងបានកសាងសំណុំរឿងបញ្ជូនទៅតុលាការ ដើម្បីជំនុំជម្រះក្តីតាមច្បាប់បណ្តើរៗហើយ។

ជាថ្មីម្តងទៀត ក្រសួងបរិស្ថានបានប្រកាសឱ្យជនខិលខូច ត្រូវបញ្ឈប់ជាបន្ទាន់នូវរាល់សកម្មភាពខុសច្បាប់ ជាអាទិ៍ការឈូលឆាយ ការកាប់ឆ្ការ ដុត រុករានទន្ទ្រានដីព្រៃ ការសាងសង់ខ្ទម ឬរោងការដាំដំណាំ ឬការអាស្រ័យផលលើដីរបស់រដ្ឋ៕

អត្ថបទ៖ សោភា