ទូតហ្វីលីពីនថា កម្ពុជាមានការរីកចម្រើនមិនគួរឱ្យជឿ

2019-04-24 09:15:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Christopher Baltazar MONTERO ឯកអគ្គរដ្ឋទូតនៃសាធារណរដ្ឋហ្វីលីពីន ប្រចាំនៅកម្ពុជា ដែលបានផុតអាណត្តិការងារនៅកម្ពុជា បាននិយាយថា កាលពី៤ឆ្នាំមុនពេលលោកអញ្ជើញមកដល់ព្រលានយន្តហោះអន្តរជាតិភ្នំពេញ កម្ពុជាហាក់ដូចជាមិនសូវអ៊ូអរច្រើនទេ ហើយរួមជាមួយមធ្យោបាយធ្វើដំណើរក៏មិនសូវមានច្រើន រីឯការកកស្ទះចរាចរណ៍ក៏មិនសូវកើតមាន។ ប៉ុន្តែនៅពេលដែលលោកត្រូវវិលត្រឡប់ទៅប្រទេសខ្លួនឯងវិញ គឺបានឃើញកម្ពុជា រីកចម្រើនដែលមិនគួរឱ្យជឿឡើយ។ ការថ្លែងនេះ ធ្វើឡើងក្នុងជំនួបពិភាក្សាជាមួយសម្តេច ហ៊ុន សែន នាព្រឹកថ្ងៃទី២៤ ខែមេសា ឆ្នាំ២០១៩។

លោកឯកអគ្គរដ្ឋទូតហ្វីលីពីន បានវាយតម្លៃខ្ពស់ចំពោះការរីកចម្រើននៅក្នុងប្រទេសកម្ពុជា ជាពិសេសនៅក្នុងរាជធានីភ្នំពេញ មានការរីកដុះដាលយ៉ាងច្រើន ដូចជាវិស័យសំណង់ ដែលមានអគារខ្ពស់ៗជាច្រើនត្រូវបានលេចធ្លោឡើង។

រូបថត៖ ហ្វេសប៊ុកសម្តេច ហ៊ុន សែន

លោក Christopher Baltazar MONTERO នៅក្នុងអាណត្ដិការទូតរយៈពេល ៤ឆ្នាំរបស់លោកនេះ គឺសម្ដេចតេជោ នាយករដ្ឋមន្ត្រី បានអញ្ជើញធ្វើដំណើរទស្សនកិច្ចពីរដងទៅកាន់ប្រទេសហ្វីលីពីន ហើយ លោកប្រធានាធិបតីហ្វីលីពីន ក៏បានមកបំពេញទស្សនកិច្ចមកកាន់កម្ពុជាចំនួន ២ដង ផងដែរ។ ស្របពេលដែលកម្ពុជាកំពុងមានសុខសន្តិភាព គឺមានអ្នកវិនិយោគិនហ្វីលីពីនជាច្រើន បានមកបណ្ដាក់ទុនវិនិយោគនៅក្នុងប្រទេសកម្ពុជា ដែលកំពុងផ្តល់ផលប្រយោជន៍ ឱ្យគ្នាទៅវិញទៅមក ក្នុងនោះក៏មានការវិនិយោគលើការហោះត្រង់ពីហ្វីលីពីនមកកាន់កម្ពុជាផងដែរ។

ជាការឆ្លើយតប សម្តេច ហ៊ុន សែន បានវាយតម្លៃខ្ពស់ចំពោះចំណងមិត្តភាព និងកិច្ចសហប្រតិបត្តិការទ្វេភាគីរវាងកម្ពុជា ហ្វីលីពីន ក្នុងរយៈពេល ៦០ឆ្នាំមកនេះ ដែលមានការរីកចម្រើនយ៉ាងខ្លាំង។ ទាំងនេះគឺបានបន្សល់ទុកដោយអតីតបុព្វបុរសនៃប្រទេសទាំងពីរ ដែលត្រូវបន្តរក្សាចំណងមិត្តភាពនេះ ឱ្យបានល្អសម្រាប់អ្នកបន្តវេនជំនាន់ក្រោយៗទៀត។ សម្តេចក៏បានជំរុញឱ្យបង្កើនទំហំពាណិជ្ជកម្មរវាងប្រទេសទាំង២ផងដែរ៕

អត្ថបទ៖ សំភី