វៀតណាម គ្រោងសង់ផ្លូវល្បឿនលឿន ពីហូជីមិញ មកព្រំដែនកម្ពុជា

2019-04-25 03:08:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វៀតណាម គ្រោងចំណាយជិត ៤៦០លានដុល្លារ ដើម្បីសាងសង់ផ្លូវល្បឿនលឿនពីក្រុងហូជីមិញ មកកាន់ម៉ុកបៃ ក្នុងខេត្តតៃនិញ (ជាប់ក្រុងបាវិត ខេត្តស្វាយរៀង)។ នេះបើតាមការចុះផ្សាយរបស់ VN Express កាលពីថ្ងៃទី២៤ ខែមេសា ឆ្នាំ២០១៩។

ផ្លូវល្បឿនលឿន នៅភាគខាងត្បូងវៀតណាម (រូបថត៖ VNExpress)

អគ្គនាយកដ្ឋានផ្លូវថ្នល់វៀតណាម បានបញ្ជូនសំណើនៃការសិក្សាផ្លូវល្បឿនលឿនដែលមានប្រវែង ៥៣,៣គីឡូម៉ែត្រនេះ ទៅកាន់ក្រសួងដឹកជញ្ជូនវៀតណាមហើយ។

យោងតាមការសិក្សាបង្ហាញថា ការសាងសង់ផ្លូវល្បឿនលឿននេះ នឹងធ្វើឡើងក្រោមទម្រង់ដៃគូរដ្ឋ-ឯកជន។ វានឹងធ្វើឡើងក្នុង ២ដំណាក់កាល ហើយនឹងចំណាយប្រមាណ ៤៥៩,៣៦លានដុល្លារ។

ផ្លូវនេះ នឹងត្រូវសង់ចេញពីផ្លូវក្រវាត់ទី៣ នៃក្រុងហូជីមិញ មកកាន់ម៉ុកបៃ ដែលជាច្រកទ្វារព្រំដែនអន្តរជាតិរវាងវៀតណាម និងកម្ពុជា។ ផ្លូវនេះ មាន៤គន្លង (ហើយគ្រោងពង្រីកដល់ ៦-៨គន្លង) ដែលអាចឱ្យយានយន្តអាចបើកបរក្នុងល្បឿនពី ៨០ ទៅ ១២០គីឡូម៉ែត្រក្នុងមួយម៉ោង។

ផ្លូវល្បឿនលឿននេះ នឹងជួយពង្រឹងការតភ្ជាប់តំបន់សេដ្ឋកិច្ចភាគខាងត្បូងវៀតណាម និងច្រករបៀងសេដ្ឋកិច្ច ខាងកើត-ខាងលិច ដែលរួមមាន មីយ៉ាន់ម៉ា ថៃ ឡាវ កម្ពុជា និងវៀតណាម។ វាក៏នឹងតភ្ជាប់បណ្តាញផ្លូវហាយវេអាស៊ាន ពោលគឺផ្លូវល្បឿនលឿន ភ្នំពេញ-បាវិត ដែលស្ថិតក្នុងគម្រោងសាងសង់របស់រាជរដ្ឋាភិបាលកម្ពុជាផងដែរ៕