ពូទីន-គីម ជុងអ៊ុន ចាប់ដៃគ្នាជាលើកដំបូងក្នុងប្រវត្តិសាស្រ្ត តើមេដឹកនាំទាំង២ និយាយអ្វីខ្លះ?

2019-04-25 06:21:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅទីបំផុត ប្រធានាធិបតីរុស្ស៊ី លោក វ្លាឌីមៀ ពូទីន និងមេដឹកនាំកូរ៉េខាងជើង លោក គីម ជុងអ៊ុន បានជួបចាប់ដៃគ្នាជាលើកដំបូងក្នុងប្រវត្តិសាស្រ្ត នាព្រឹកថ្ងៃទី២៥ ខែមេសា ឆ្នាំ២០១៩ ក្នុងក្រុង Vladivostok ភាគខាងកើតរុស្ស៊ី។

រូបថត៖ ផ្តល់សិទ្ធិដោយ Reuters

លោក ពូទីន ថ្លែងថា ដំណើរទស្សនកិច្ចរបស់លោក គីម ជុងអ៊ុន នឹងជំរុញទំនាក់ទំនង និងជួយឱ្យ ប្រទេសទាំង២ បានស្វែងយល់ពីការដោះស្រាយបញ្ហានៅឧបទ្វីបកូរ៉េ។ «អ្វីដែលរុស្ស៊ី អាចធ្វើបានដើម្បីគាំទ្រដំណើរការប្រកបដោយវិជ្ជមានទាំងនោះ គឺវាកំពុងកើតឡើងនៅថ្ងៃនេះហើយ»។

លោក ពូទីន ក៏បានរំលឹកពីទស្សនកិច្ចរបស់លោក ទៅកាន់កូរ៉េខាងជើង កាលពីឆ្នាំ២០០០ផងដែរ។ លោកថា ឪពុករបស់លោក គីម ជុងអ៊ុន គឺលោក គីម ជុងអ៊ីល ជាអ្នកផ្តួចផ្តើមម្នាក់នៃការចុះសន្ធិសញ្ញាមិត្តភាពរវាងប្រទេសទាំង២។

ចំណែកលោក គីម ជុងអ៊ុន បានថ្លែងដោយបង្ហាញក្តីសង្ឃឹមថា ជំនួបដំបូងរវាងលោក និងលោកពូទីននេះ នឹងជួយដោះស្រាយភាពតានតឹងនៅឧបទ្វីបកូរ៉េ។ លោកថា ស្ថានភាពនៅឧបទ្វីបកូរ៉េនាពេលបច្ចុប្បន្ន កំពុងទទួលបានការយកចិត្តទុកដាក់ពីសហគមន៍អន្តរជាតិទាំងមូល។

ជាមួយគ្នានោះ លោក គីម ក៏បានអរគុណលោក ពូទីន ដែលបានអញ្ជើញលោក ហើយខំធ្វើដំណើររាប់ពាន់គីឡូម៉ែត្រពីក្រុងមូស្គូ មកជួបលោកនៅក្រុង Vladivostok នេះ បើទោះបីជាលោក ពូទីន មានការមមាញឹកខ្លាំងយ៉ាងណាក្តី។

រូបថត៖ ផ្តល់សិទ្ធិដោយ Reuters

មេដឹកនាំទាំង២ នឹងបើកកិច្ចចរចាគ្នានៅរសៀលថ្ងៃដដែលនេះ ដោយដំបូងរវាងលោក ពូទីន និងលោក គីម ជុងអ៊ុន ផ្ទាល់ ហើយបន្ទាប់មកនឹងមានការចូលរួមប្រជុំពីមន្រ្តី។ ជំនួបនេះ នឹងផ្តោតជាសំខាន់លើដំណោះស្រាយនយោបាយ និងការទូត ជុំវិញបញ្ហានុយក្លេអ៊ែរ នៅឧបទ្វីបកូរ៉េ។

បន្ទាប់ពីកិច្ចប្រជុំនេះ មេដឹកនាំទាំង២ ត្រូវបានរំពឹងថា នឹងទទួលទានអាហារពេលល្ងាចជាមួយគ្នាផងដែរ៕

ប្រភព៖ Sputnik News ប្រែសម្រួល៖ សំភី