ខុន ស៊ីចាន់ និងគ្រូបង្វឹក មានជំនឿថា ចាន់ រតនា អាចសងសឹកជំនួសខ្លួនបាន

2019-04-25 07:42:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករគុនខ្មែរ ខុន ស៊ីចាន់ មានជំនឿចិត្តថា មិត្តរួមអាជីព ចាន់ រតនា នឹងអាចសងសឹកជំនួសខ្លួនបាន ពេលប្រកួតទល់នឹងកីឡាករឥណ្ឌូណេស៊ី Rudy Agustian នៅសង្វៀន ONE Championship នាថ្ងៃទី៣ ខែឧសភាខាងមុខ។ ចំណែកគ្រូបង្វឹករបស់ស៊ីចាន់ គឺលោក Alan Mccune ក៏បង្ហាញគិតថា រតនា នឹងទទួលលទ្ធផលល្អផងដែរ។

ស៊ីចាន់ ដែលធ្លាប់ចាញ់ Rudy ក្នុងទឹកទី១ កាលពីខែកុម្ភៈកន្លងទៅ បានបញ្ចេញទស្សនៈ ចំពោះការប្រកួតរវាង Rudy និង រតនា ថា៖

"ខ្ញុំពិបាកសន្និដ្ឋានបន្តិចគូនេះ ព្រោះ ចាន់ រតនា គីឡូគាត់ធំ ហើយគាត់ត្រូវបញ្ចុះមក ៦១គីឡូក្រាម ដូច្នេះអាចឆាប់អស់កម្លាំងណាស់។ ខ្ញុំសង្ឃឹមថាគាត់អាចវ៉ៃយកឈ្នះត្រឹមទឹកទី ១ តែបើចូលទឹកទី២ ឬទី៣ អាចចាញ់គេហើយ។ ខ្ញុំជឿជាក់លើគាត់ ទ្រឹមតែ ១ទឹកប៉ុណ្ណោះ"។

ខុន ស៊ីចាន់ ពេលប្រកួតទល់នឹង Rudy Agustian កាលពីខែកុម្ភៈកន្លងទៅ (រូបភាព៖ ONE Championship)

កីឡាករគុនខ្មែរ ដែលហាត់នៅក្លឹប Phnom Penh MMA រូបនេះ បានបន្ថែមទៀតថា៖ ***"Rudy មានជំនាញខាងចាប់ ប៉ុន្តែការឈរវ៉ៃ និងតិកនិកវ៉ៃ គឺចាញ់ចាន់ រតនា ទេ"។***

ជាចុងក្រោយ ស៊ីចាន់ នៅតែមានជំនឿចិត្តលើមិត្តរួមជាតិ ថាអាចសងសឹកជំនួសខ្លួនបាន បើសិនប្រើក្បាច់គុនខ្មែរបានច្រើន និងមិនឲ្យគេចូលចាប់បាន ពោលគឺអាចឈ្នះដល់ទៅ ៩០% ឯណោះ។

ចំណែកលោក Alan Mccune ដែលជាអ្នកបង្វឹក និងដឹកនាំស៊ីចាន់ ទៅប្រកួតទល់នឹង Rudy បាននិយាយដែរថា៖ "ចាន់ រតនា បានទទួលការហ្វឹកហាត់ដិតដល់នៅក្លឹប «សិល្បៈ» ជាមួយគ្រូបង្វឹករបស់គេមួយរយៈធំមកនេះ ហើយខ្ញុំរំពឹងថាគាត់នឹងធ្វើបានល្អក្នុងជំនួបនាដើមខែឧសភា។ រតនា ត្រូវប្រើស្នៀតចាំបាច់មួយគឺ បិទក្បាច់ចាប់ផ្ដួលទៅក្ដាររេញ របស់ Rudy និងការពារឲ្យកុំឲ្យគេចូលកៀកដើម្បីផ្ដួល នោះ រតនា អាចឈ្នះហើយ"។

ខុន ស៊ីចាន់ និងគ្រូបង្វឹក លោក Alan Mccune

សូមបញ្ជាក់ថា នៅក្នុងព្រឹត្តិការណ៍ ONE: FOR HONOR នៅទីក្រុងហ្សាការតា ប្រទេសឥណ្ឌូណេស៊ី នាថ្ងៃទី៣ ខែឧសភាខាងមុខនេះ ក៏មានកីឡាការិនីគុនខ្មែរ នៅ ស្រីពៅ ប៉ះកីឡាការិនីម្ចាស់ផ្ទះ Priscilla Hertati Lumban Gaol ផងដែរ៕