ឧត្តមសេនីយ៍ឯក ហ៊ុន ម៉ាណែត៖ នាយទាហានដែលឡើងខ្ពស់ហើយ មិនអាចកាត់ទម្លាក់មកវិញបានទេ
- 2019-04-29 04:13:11
- ចំនួនមតិ 0 | ចំនួនចែករំលែក 0
ឧត្តមសេនីយ៍ឯក ហ៊ុន ម៉ាណែត៖ នាយទាហានដែលឡើងខ្ពស់ហើយ មិនអាចកាត់ទម្លាក់មកវិញបានទេ
ចន្លោះមិនឃើញ
លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក បានថ្លែងបញ្ជាក់ថា គោលការណ៍នៃការធ្វើកំណែទម្រង់របស់រាជរដ្ឋាភិបាលចំពោះវិស័យកងទ័ព គឺមិនមែនពេលនេះទេ មានជំហានច្បាស់លាស់ ពោលគឺនាយទាហានដែលឡើងខ្ពស់ហើយមិនអាចកាត់ទម្លាក់មកវិញបានទេ។ ការបញ្ជាក់នេះ នៅក្នុងពិធីបូកសរុបលទ្ធផលការងារយោធាឆ្នាំ២០១៨ និងផ្សព្វផ្សាយផែនការសកម្មភាពការងារយោធាឆ្នាំ២០១៩ នៅទីបញ្ជាការដ្ឋានកងពលធំអន្តរាគមន៍លេខ២ ក្នុងខេត្តសៀមរាប កាលពីថ្ងៃទី២៨ ខែមេសា ឆ្នាំ២០១៩។
លោកបានបញ្ជាក់យ៉ាងដូច្នេះថា៖ «ការដំឡើងឋានន្តរស័ក្តិចំពោះនាយទាហានដែលមានការតស៊ូជំនាន់មុនមិនខុសទេ ព្រោះការធ្វើកំណែទម្រង់នេះ គឺជាការលើកទឹកចិត្តចំពោះនាយទាហានដែលបានតស៊ូពីជំនាន់មុន ហើយកំណែទម្រង់របស់រាជរដ្ឋាភិបាលគឺមានជាជំហានៗនៅពេលក្រោយ»។
ការបញ្ជាក់របស់លោកឧត្តមសេនីយ៍ឯក ហ៊ុន ម៉ាណែត បានធ្វើឡើងបន្ទាប់ពីសម្តេចតេជោ ហ៊ុន សែន នាយឧត្តមសេនីយ៍ផ្កាយមាស៥ផុតលេខ បានបញ្ជាក់ថា នៅពេលអនាគត គឺឲ្យមានផ្កាយបួនតែពីរនាក់ទេ គឺរដ្ឋមន្ត្រីការពារជាតិ និងអគ្គមេបញ្ជាការកងទ័ព។ ហើយក្រៅពីនោះ គឺពាក់ផ្កាយបីទាំងអស់ និងមេបញ្ជាការភូមិភាគឲ្យពាក់តែផ្កាយពីរទេ។
ចុចអានបន្ថែម៖ សម្ដេចហ៊ុន សែន៖ នាពេលអនាគត គឺទុកផ្កាយ ៤ តែ ២នាក់ទេ
លោកឧត្តមសេនីយ៍ឯក ហ៊ុន ម៉ាណែត ក៏បានគាំទ្រ និងកោតសរសើរចំពោះការហ្វឹកហ្វឺន ការ ពង្រឹងសមត្ថភាពកងទ័ព ការអប់រំចិត្តសាស្ត្រ ព្រោះការយកចិត្តទុកដាក់នេះ គឺសំខាន់ណាស់សម្រាប់ប្រសិទ្ធភាពប្រយុទ្ធ និងការគ្រប់គ្រងសតិអារម្មណ៍។
«សូមបន្តយកចិត្តទុកដាក់ក្នុងការបំពាក់ការថែទាំអាវុធយុទ្ធភ័ណ្ឌ បច្ចេកទេស ការងារទូទៅឲ្យសមស្របទៅនឹងភារកិច្ច ការរៀបចំកម្លាំងត្រៀមប្រយុទ្ឋ និងការហ្វឹកហ្វឺន។ ថ្វីដ្បិតតែរាជរដ្ឋាភិបាលបានយកចិត្តទុកដាក់លើកតម្កើងកិត្តិយស និងលើកស្ទួយកម្រិតជីវភាពរបស់កងទ័ព ប៉ុន្តែតម្រូវការកងទ័ពរបស់យើងគឺធំ។ ដូច្នេះការខិតខំបង្កបង្កើនផល ការងារធានាច្នៃប្រឌិតផ្សេងៗម្ចាស់ការលើខ្លួនឯងដើម្បីជីវភាពរស់នៅរបស់កងទ័ពគឺជាការងារចាំបាច់»។ នេះជាការលើកឡើងបន្ថែមរបស់លោក ហ៊ុន ម៉ាណែត។
ជាមួយគ្នានេះ មេបញ្ជាការកងទ័ពជើងគោក បានណែនាំឲ្យកងពលធំអន្តរាគមន៍លេខ២ សហការជាមួយនឹងកងកម្លាំងប្រដាប់អាវុធ អាជ្ញាធរ និងជាមួយភាគីមិត្តនៅតាមបណ្ដាព្រំដែន ដើម្បីថែរក្សាសុខសន្តិភាព ស្ថិរភាព សន្តិសុខជូនប្រជាពលរដ្ឋ និងទប់ស្កាត់នូវអំពើខុសច្បាប់ផ្សេងៗ៕