ទិដ្ឋភាពលោកស្រី អ៊ុង សានស៊ូជី បានមកជាន់ដីកម្ពុជា ដើម្បីបំពេញទស្សនកិច្ចផ្លូវការ
- 2019-04-29 10:12:46
- ចំនួនមតិ 0 | ចំនួនចែករំលែក 0
ទិដ្ឋភាពលោកស្រី អ៊ុង សានស៊ូជី បានមកជាន់ដីកម្ពុជា ដើម្បីបំពេញទស្សនកិច្ចផ្លូវការ
ចន្លោះមិនឃើញ
លោកស្រី អោង សានស៊ូជី (Aung San Suu Kyi) ទីប្រឹក្សារដ្ឋនៃសាធារណរដ្ឋសហភាពមីយ៉ាន់ម៉ា បានមកដល់កម្ពុជានៅរសៀលនេះហើយ ដើម្បីបំពេញទស្សនកិច្ចផ្លូវការពីថ្ងៃទី២៩ ខែមេសា ដល់ថ្ងៃទី០១ ខែឧសភា ឆ្នាំ២០១៩ តបតាមការអញ្ជើញរបស់សម្តេច ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។
តាមកម្មវិធីដែលបានគ្រោងទុក នៅថ្ងៃទី៣០ ខែមេសា វេលាម៉ោង ៨:៣០ នាទី លោកស្រី អោង សានស៊ូជី នឹងអញ្ជើញដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ។ បន្ទាប់មកលោកស្រីអញ្ជើញទៅដាក់កម្រងផ្កា គោរពវិញ្ញាណក្ខន្ធព្រះបរមរតនកោដ្ឋ។ ដាក់កម្រងផ្ការួច លោកស្រីអញ្ជើញទៅវិមានសន្តិភាពជួបពិភាក្សាទ្វេភាគីជាមួយ សម្តេច ហ៊ុន សែន។
បន្ទាប់ពីជំនួបចប់ជាមួយសម្ដេច ហ៊ុន សែន លោកស្រីនឹងអញ្ជើញជួបពិភាក្សាការងារជាមួយសម្ដេច ហេង សំរិន ប្រធានរដ្ឋសភា នៅវិមានរដ្ឋសភា។ ហើយនៅវេលាម៉ោង៣រសៀល លោកស្រី អោង សានស៊ូជី ជួបសំដែងការគួរសមជាមួយសម្ដេច សាយ ឈុំ ប្រធានព្រឹទ្ធសភានៅវិមានព្រឹទ្ធសភា។ ចំណែកនៅវេលាម៉ោង ៤រសៀល លោកស្រី អោង សានស៊ូជី ចូលក្រាបថ្វាយបង្គំគាល់ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងបន្ទាប់មកចូលក្រាបថ្វាយបង្គំគាល់សម្ដេចព្រះមហាក្សត្រី នរោត្តម មុនីនាថសីហនុ ព្រះវររាជព្រះវររាជមាតាជាតិខ្មែរ។
នៅថ្ងៃទី០១ ខែឧសភា លោកស្រី អោង សានស៊ូជី នឹងអញ្ជើញចេញដំណើរពីរាជធានីភ្នំពេញ ឆ្ពោះទៅកាន់ខេត្តសៀមរាប តាមយន្តហោះពិសេស ដើម្បីទស្សនាប្រាសាទអង្គវត្ត និងប្រាសាទបាយ័ន។ បន្ទាប់ពីទស្សនារួច លោកស្រីនឹងមាតុភូមិបវត្តន៍ពីខេត្តសៀមរាប៕
សូមទស្សនារូបភាពខាងក្រោមនេះ៖