សម្តេច ហ៊ុន សែន៖ គ្មានទេស្ថាប័នតំបន់ផ្សេងទៀត ដែលល្អប្រសើរជាងអាស៊ាន
- 2019-04-30 01:47:50
- ចំនួនមតិ 0 | ចំនួនចែករំលែក 0
សម្តេច ហ៊ុន សែន៖ គ្មានទេស្ថាប័នតំបន់ផ្សេងទៀត ដែលល្អប្រសើរជាងអាស៊ាន
ចន្លោះមិនឃើញ
«គ្មានទេ ស្ថាប័នតំបន់ផ្សេងទៀត ដែលល្អប្រសើរជាងអាស៊ាន។ ដូចនេះ យើងត្រូវបន្តធ្វើឱ្យអាស៊ានមានសារៈសំខាន់ក្នុងប្រព័ន្ធអន្តរជាតិ។ យើងត្រូវការភាពជាអ្នកដឹកនាំដែលមោះមុត រឹងមាំ នៅក្នុងអាស៊ាន ដើម្បីឱ្យអង្គការតំបន់នេះ អាចហែលឆ្លងដំណាក់កាលខាងមុខ ដែលពោរពេញទៅដោយបញ្ហាប្រឈម ភាពមិនច្បាស់ប្រជា និងភាពគ្រោះថ្នាក់»។ នេះបើតាមសារលិខិតរបស់សម្តេច ហ៊ុន សែន ក្នុងឱកាសខួប ២០ឆ្នាំ នៃការចូលជាសមាជិកអាស៊ានរបស់កម្ពុជា (៣០ មេសា ១៩៩៩- ៣០ មេសា ២០១៩)។
សម្តេចបន្តថា ក្នុងបរិការណ៍នេះ កម្ពុជាប្តេជ្ញាបន្តធ្វើការរួមគ្នាជាមួយប្រទេសសមាជិកអាស៊ានដទៃទៀត ដើម្បីធានាថាតំបន់អាស៊ាននៅតែមានសន្តិភាព សុវត្ថិភាព និងវិបុលសុខ ហើយអាស៊ាន ស្ថិតនៅជាអង្គការតំបន់មួយដែលបន្តមានសារៈសំខាន់ចំពោះប្រជាជាតិរបស់ខ្លួន។
យ៉ាងណាក៏ដោយ ប្រមុខរាជរដ្ឋាភិបាលបានលើកឡើងថា អាស៊ានមិនមែនជាអង្គការល្អឥតខ្ចោះទេ ពោលគឺតំបន់ដែលបង្កើតឡើងតាំងពីឆ្នាំ១៩៦៧នេះ នៅមានចំណុចខ្សោយ និងបញ្ហាប្រឈមខាងស្ថាប័នជាច្រើន ដែលត្រូវដោះស្រាយ។ ក៏ប៉ុន្តែប្រសិនបើគ្មានអាស៊ានទេ តំបន់អាស៊ីអាគ្នេយ៍ទាំងមូល ក៏មិនអាចសម្រេចបាននូវសន្តិភាព និងវិបុលភាពដូចសព្វថ្ងៃនេះដែរ។
តាមសារលិខិតដដែលបង្ហាញថា នៅប៉ុន្មានឆ្នាំខាងមុខនេះ កម្ពុជា និងតំបន់អាស៊ានទាំងមូល នឹងជួបប្រទះនូវការផ្លាស់ប្តូរយ៉ាងសំខាន់ៗ ជាពិសេសនៅក្នុងវិស័យនវានុវត្តន៍ឌីជីថល និងបច្ចេកវិទ្យា និងវិស័យការតភ្ជាប់។ បដិវត្តន៍ឧស្សាហកម្មទីបួន និងពន្លឿនល្បឿននៃការបញ្ឈប់ និងការផ្លាស់ទីកន្លែងនៃមូលដ្ឋានផលិត នៅខណៈពេលនៃការប្រែប្រួលពីបែបបទប្រពៃណីនិងខ្សែសង្វាក់ផលិតកម្មសកល ទៅជាប្រព័ន្ធផលិតមួយដែលមានលក្ខណៈឌីជីថល និងទំនើបជាងមុន។ បណ្តាញទីក្រុងឆ្លាតវៃអាស៊ាន និងគំនិតផ្តួចផ្តើមផ្សេងៗទៀតស្តីពី អាស៊ានឌីជីថល និងទទួលបានការគាំទ្រខ្លាំងជាងមុន។
ជាមួយគ្នានេះ សម្តេចនាយករដ្ឋមន្រ្តី បានអំពាវនាវឱ្យជនរួមជាតិកម្ពុជា ធ្វើការសិក្សាបន្ថែមទៀតអំពីអាស៊ាន ហើយនឹងស្វែងរកកាលានុវត្តភាពថែមទៀត ដែលកើតចេញពីតំបន់ភាវូបនីយកម្ម និងសកលភាវូបនីយកម្ម។ ក្នុងឋានៈជាប្រទេសតូច កម្ពុជាមិនអាចសង្ឃឹមថា រស់នៅដោយគ្មានការផ្សារភ្ជាប់ជាមួយពិភពលោកខាងក្រៅបានទេ៕