កោះមួយ អាចជាទីតាំងរដ្ឋធានីថ្មី របស់ឥណ្ឌូណេស៊ី
- 2019-04-30 07:43:00
- ចំនួនមតិ 0 | ចំនួនចែករំលែក 0
កោះមួយ អាចជាទីតាំងរដ្ឋធានីថ្មី របស់ឥណ្ឌូណេស៊ី
ចន្លោះមិនឃើញ
រដ្ឋមន្រ្តីក្រសួងផែនការឥណ្ឌូណេស៊ី លោក Bambang Brodjonegoro បានប្រកាសថា ប្រធានាធិបតីឥណ្ឌូណេស៊ី លោក Joko Widodo បានសម្រេចចិត្តរើរដ្ឋធានីចេញពី ហ្សាការតា ដែលស្ថិតនៅលើកោះ Java ទៅកាន់ទីតាំងថ្មី។ ការថ្លែងនេះ បន្ទាប់ពីកិច្ចប្រជុំគណៈរដ្ឋមន្រ្តី កាលពីថ្ងៃទី២៩ ខែមេសា ឆ្នាំ២០១៩។
ការសម្រេចនេះ ធ្វើឡើងខណៈដែលក្រុងហ្សាការតា កំពុងជួបបញ្ហាធំៗជាច្រើនដូចជា កំណើនប្រជាជន ការបំពុល ការកកស្ទះចរាចរណ៍ និងការជន់លិចជាដើម។ លោករដ្ឋមន្រ្តីផែនការថា ការកកស្ទះចរាចរណ៍ក្នុងក្រុងនេះ បានធ្វើឱ្យខាតបង់សេដ្ឋកិច្ចប្រមាណជាង ៦,៨ពាន់លានដុល្លារក្នុងមួយឆ្នាំ។
យ៉ាងណាមិញ ចំពោះទីតាំងរដ្ឋធានីថ្មី មិនត្រូវបានរដ្ឋាភិបាលឥណ្ឌូណេស៊ី បញ្ជាក់នៅឡើយ ប៉ុន្តែមានជម្រើស៣ ដែលត្រូវបានលើកឡើងក្នុងកិច្ចប្រជុំគណៈរដ្ឋមន្រ្តី។ ក្នុងនោះ គឺមានជម្រើសមួយដែលមានសក្តានុពលជាងគេ គឺរើទៅកាន់កោះមួយផ្សេងទៀត។ នោះគឺជាក្រុង Palangkaraya ខេត្ត Kalimantan ដែលស្ថិតនៅលើកោះ Borneo។
ទីតាំងនេះ មានភូមិសាស្រ្តនៅកៀកនឹងចំណុចកណ្តាលនៃប្រទេសឥណ្ឌូណេស៊ី ហើយក៏ជម្រើសមួយក្នុងការបង្កើតជារដ្ឋធានី របស់ស្ថាបនិកឥណ្ឌូណេស៊ី គឺលោក ស៊ូកាណូផងដែរ។
លោក Bambang Brodjonegoro បានលើកឡើងថា ដំណើរការនៃការរើរដ្ឋធានី អាចប្រើពេលដល់ ១០ឆ្នាំ ដោយលោកថា ប្រទេសផ្សេងទៀតអាចសម្រេចបាន ឥណ្ឌូណេស៊ីក៏ធ្វើបានដែរ។ ក្នុងនោះគឺលោកបានលើកឧទាហរណ៍ប្រទេសមួយចំនួនដូចជា
-ប្រេស៊ីល៖ រើរដ្ឋធានីពី Rio de Janeiro ទៅ Brasilia ដែលនៅជិតព្រៃអាម៉ាហ្សូន
-អូស្ត្រាលី៖ ក្រុង Canberra ដែលស្ថិតនៅចន្លោះក្រុង Sydney និង Melbourne
-កាហ្សាក់ស្ថាន៖ រើរដ្ឋធានីទៅកៀកនឹងចំណុចកណ្តាលប្រទេស
-និងមីយ៉ាន់ម៉ា រើពីយ៉ង់ហ្គូន ទៅ ណៃពិដោជាដើម៕