ជប៉ុន ចាប់ផ្តើមរជ្ជកាលថ្មី នៅថ្ងៃទី១ ខែឧសភានេះ

2019-05-01 02:52:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អធិរាជថ្មីរបស់ជប៉ុន Naruhito បានឡើងស្នងរាជ្យជាផ្លូវការហើយនៅថ្ងៃទី១ ខែឧសភា ឆ្នាំ២០១៩នេះ ដែលជាការចាប់ផ្តើមនូវរជ្ជកាលថ្មីរបស់ប្រទេសនេះ ហៅថា «Reiwa»។ ការឡើងស្នងរាជ្យនេះ បន្ទាប់ពីព្រះចៅអធិរាជ Akihito បានដាក់រាជ្យ កាលពីថ្ងៃទី៣០ ខែមេសា ឆ្នាំ២០១៩ម្សិលមិញនេះ។

ចុចអានបន្ថែម៖ ព្រះចៅអធិរាជជប៉ុន Akihito ដាក់រាជ្យ នៅថ្ងៃទី៣០ ខែមេសានេះ

ក្នុងការឡើងគ្រងរាជ្យនេះ ព្រះចៅអធិរាជ Naruhito ដែលមានព្រះជន្ម ៥៩ព្រះវស្សា បានទទួលនូវដាវ និងគ្រឿងអលង្កា ព្រមទាំងត្រា និងតែមសម្គាល់អធិរាជថ្មីជាដើម។

រូបថត៖ Reuters

យ៉ាងណាក៏ដោយ ក្រោមរដ្ឋធម្មនុញ្ញរបស់ជប៉ុន ព្រះចៅអធិរាជ គ្រាន់តែជានិមិត្តរូបរបស់ជាតិជប៉ុនប៉ុណ្ណោះ ពោលគឺពុំមានអំណាចនយោបាយឡើយ។

បើតាមការចុះផ្សាយនៅលើទំព័រហ្វេសប៊ុកស្ថានទូតជប៉ុនប្រចាំនៅកម្ពុជា ពាក្យ «Reiwa» មានន័យថា វប្បធម៌នឹងត្រូវបានរីកលូតលាស់ឡើង នៅពេលដែលដួងចិត្តរបស់ប្រជាជនរួមគ្នាជាធ្លុងមួយប្រកបដោយសុខុដុមរមនា។

លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា បានបង្ហាញក្តីសង្ឃឹមថា រជ្ជកាល Reiwa ប្រជាជនជប៉ុន និងកម្ពុជា បន្តលើកស្ទួយមិត្តភាព និងការផ្លាស់ប្តូរវប្បធម៌ទៅវិញទៅមក។

គួរជម្រាបថា ព្រះចៅអធិរាជ Naruhito នឹងជួបមេដឹកនាំបរទេសជាលើកដំបូង ក្រោយឡើងស្នងរាជ្យនេះ ពោលគឺព្រះអង្គ នឹងជួបជាមួយប្រធានាធិបតីអាមេរិក លោក ដូណាល់ ត្រាំ នាចុងខែឧសភានេះ៕

ប្រភព៖ Aljazeera ប្រែសម្រួល៖ សំភី