Messi ក្លាយជាបុគ្គលទី ២ ទទួលមេដាយពិសេស ដែលបង្កើតតាំងពីឆ្នាំ ១៩៨១
- 2019-05-01 03:26:00
- ចំនួនមតិ 0 | ចំនួនចែករំលែក 0
Messi ក្លាយជាបុគ្គលទី ២ ទទួលមេដាយពិសេស ដែលបង្កើតតាំងពីឆ្នាំ ១៩៨១
ចន្លោះមិនឃើញ
Lionel Messi ត្រូវបានរដ្ឋនៅតំបន់កាតាឡាន់ សម្រេចប្រកាសប្រគល់ពានរង្វាន់បុគ្គលដ៏ពិសេសមួយដែលមានឈ្មោះថា "'Creu de Sant Jordi' award”។
មេដាយកិត្តិយសនេះ មិនស្ថិតក្នុងវិស័យបាល់ទាត់ទេ ប៉ុន្តែត្រូវបានរដ្ឋតំបន់កាតាឡាន់បង្កើតឡើងតាំងពីឆ្នាំ ១៩៨១ សម្រាប់ប្រគល់ជូនបុគ្គលរូបណា ដែលបានរួមចំណែកធ្វើការយ៉ាងសស្រាក់សស្រាំជាមួយរដ្ឋក្នុងការជួយដល់កុមារកំព្រាខ្វះខាតជម្រក ឬកាយសម្បទាមិនគ្រប់គ្រាន់ជាពិសេសប្រជាជនដែលរស់នៅតំបន់នោះ និងជាផ្នែកមួយជួយផ្សព្វផ្សាយវប្បធម៌ក្នុងតំបន់ឲ្យពិភពលោកបានស្គាល់។
អ្វីដែលជារឿងនៅពីក្រោយការឈ្នះមេដាយនេះ ដោយសារ Messi បានបង្កើតអង្គការផ្ដល់ជំនួយឥតសំណងមួយមានឈ្មោះថា “Leo Messi Foundation” បានធ្វើការយ៉ាងជិតស្និទ្ធជាមួយអង្គការ UNICEF ក្នុងកម្មវិធីសប្បុរសធម៌នានានៅជុំវិញពិភពលោក។
សម្រាប់ក្នុងវិស័យបាល់ទាត់ Messi ជាកីឡាករទី ១ ដែលបានឈ្នះពានលីគ ១០ សម័យជាមួយក្រុម FC Barcelona និងរួមចំណែកជួយឲ្យក្រុមឈ្នះពានលីគលើកទី ២៦ ។
នេះជាលើកទី ១ សម្រាប់ Messi ដែលទទួលបានមេដាយកិត្តិយសដ៏ខ្ពង់ខ្ពស់នេះ។ សម្រាប់ក្នុងនាមជាអត្តពលិក(កីឡាករ) Messi ជាបុគ្គលទី ២ បន្ទាប់ពីលោក Johan Cruyff ធ្លាប់ទទួលបាននៅឆ្នាំ ២០០៦៕