ដំរីស្រុកក្នុងខេត្តមណ្ឌលគិរីជិត៤០ក្បាល អាចនឹងងាប់ម្តង១ៗ បើគ្មានដំណោះស្រាយ

2019-05-02 07:24:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ឃុន ឌីយ៉ូន នាយកអង្គការកាពារសត្វដំរីដែលមានមូលដ្ឋានក្នុងខេត្តមណ្ឌលគិរីបានសម្តែងក្តីព្រួយបារម្ភលើការថមថយនៃចំនួនសត្វដំរីស្រុកដែលមានវត្តមានក្នុងខេត្តមណ្ឌលគិរីនេះ (បានងាប់បណ្តើរៗ)។កត្តាដែលព្រួយបារម្ភ មិនអាចកែខៃបានគឺបញ្ហាប្រពៃណីជនជាតិព្នង(ម្ចាស់ដំរី)ដែលរឹតត្បិតមិនឱ្យមានការបន្តពូជបែបធម្មជាតិនៃសត្វ។

ផ្អែកតាមរបាយការណ៍អង្គការការពារសត្វដំរីហៅកាត់ ELIE បានបញ្ជាក់ថា គិតចាប់ពីឆ្នាំ២០១៧រហូតដល់ឆ្នាំដើមឆ្នាំ២០១៩នេះ សត្វដំរីស្រុកនៅខេត្តមណ្ឌលគិរី ត្រូវបានគេកត់សម្គាល់ថាបានងាប់ជាបន្តបន្ទាប់ចំនួន ៧ក្បាលហើយ។

នៅឆ្នាំ២០១៧ដំរីស្រុកចំនួន៥ក្បាលបានងាប់។ ក្នុងនោះឈឺងាប់៣ក្បាល អាជ្ញាធរបាញ់សម្លាប់ព្រោះវាចុះប្រេងអុកឡុកអ្នកភូមិ ១ក្បាល និង១ក្បាលទៀតងាប់ព្រោះដើរធ្លាក់រណ្ដៅនៅស្រុកស្នួល-ខេត្តក្រចេះតែជាដំរីខេត្តមណ្ឌលគិរី។ ចំណែកនៅឆ្នាំ២០១៨ មានដំរីងាប់២ក្បាល ១ក្បាលឈឺងាប់ និង១ក្បាលទៀតមានអាការៈចុះប្រេងត្រូវម្ចាស់ចងបង្អត់ចំណីរហូតងាប់។

រូបថត៖ រស្មីកម្ពុជា

ប្រធានអង្គការ ELIE បានឱ្យដឹងថា នៅឆ្នាំ២០១៩នេះ ដំរីស្រុកក្នុងខេត្តមណ្ឌលគិរីមានការថយចុះនៅសល់តែ៣៨ក្បាលប៉ុណ្ណោះ ដែលដំរីទាំងនោះស្ទើរទាំងស្រុងជាកម្មសិទ្ធរបស់ជនជាតិដើមភាគតិចព្នង។ លោកថា កត្តាតែមួយគត់ដែលគួរឱ្យបារម្ភ និងមិនអាចស្ដារសត្វដំរីស្រុកនៅខេត្តមណ្ឌលគិរីឡើងវិញបានគឺប្រពៃណីរបស់ជនជាតិភាគតិចព្នង ព្រោះប្រពៃណីពួកគាត់មិនអនុញ្ញាតឲ្យសត្វដំរីចិញ្ចឹមបន្តពូជដោយមិនបានរៀបការនោះទេ។ ការរៀបការនេះអាចធ្វើពិធីធំជាងពិធីរៀបការមនុស្សទៀតផង និងត្រូវចំណាយថវិកាច្រើន។ ក្នុងករណីបណ្ដោយឱ្យសត្វដំរីបន្តពូជដោយមិនបានរៀបការក្នុងភូមិ គេជឿថានឹងមានឧបទ្រពចង្រៃកើត ឡើងក្នុងភូមិជាមិនខាន ។

លោក ឃុន ឌីយ៉ូន បញ្ជាក់ថា បច្ចុប្បន្ននៅមិនទាន់មានមធ្យោបាយស្ដារសត្វដំរីស្រុកឡើងវិញនោះទេ ។ អង្គការELIE ក៏ធ្លាប់លើកយកបញ្ហានេះទៅជជែកជាមួយស្ថាប័នពាក់ព័ន្ធដែរ តែពុំទាន់មានលទ្ធផលដូចគ្នា ។

លោកជឿថា បើមិនមានវិធីដោះស្រាយទេ នៅពេលខាងមុខសត្វដំរីស្រុកដែលនៅសល់ជិត៤០ក្បាលនេះ ក៏នឹងត្រូវបាត់បង់ជាបណ្ដើរៗទៀតដែរ ព្រោះដំរីទាំងនោះ កាន់តែចាស់ ថែមទាំងមិនអាចបន្តពូជផ្អែកតាមជំនឿប្រពៃណី និងពុំមានការទាក់កូនសត្វដំរីព្រៃយកមកភូមិដូចកាលពីបុរាណ នោះទេ៕

ប្រភព៖ រស្មីកម្ពុជា