សម្តេច ហ៊ុន សែន៖ លោក ឡេ ឌឹកអាញ់ មានគុណបំណាច់ជួយរំដោះប្រទេសកម្ពុជា ចេញពីរបបប៉ុល ពត

2019-05-03 01:45:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានលើកឡើងថា លោក ឡេ ឌឹកអាញ់ ជាមេដឹកនាំកំពូលមួយរូបរបស់ប្រទេសវៀតណាម ដែលមានគុណបំណាច់ជួយរំដោះប្រទេសកម្ពុជាចេញពីរបបប្រល័យពូជសាសន៍ ប៉ុល ពត និងការទប់ស្កាត់មិនឲ្យវិលត្រឡប់មកវិញនៃរបបនេះ។ សម្តេចថ្លែងដូច្នេះ ក្នុងជំនួបជាមួយលោក ង្វៀន សួនហ៊្វុក នាយករដ្ឋមន្រ្តីវៀតណាម កាលពីយប់ថ្ងៃទី២ ខែឧសភា ឆ្នាំ២០១៩ ក្នុងពេលដែលសម្តេចអញ្ជើញទៅចូលរួមគោរពវិញ្ញាណក្ខន្ធសពលោក ឡេ ឌឹកអាញ់ អតីតប្រធានាធិបតីវៀតណាម ដែលបានទទួលមរណភាពកាលពីថ្ងៃទី២២ ខែមេសា ឆ្នាំ២០១៩។

រូបថត៖ ហ្វេសប៊ុកសម្តេច ហ៊ុន សែន

សម្តេចតេជោ បានមានប្រសាសន៍បន្តថា សម្តេចនឹងសរសេរសារដ៏មានសារៈសំខាន់លើសៀវភៅក្រាំងមាសនៃការចូលរួមរំលែកទុក្ខ ដើម្បីជាការជូនដំណើរជាលើកចុងក្រោយជូនដល់វិញ្ញាណក្ខន្ធ លោក ឡេ ឌឹកអាញ់។

ជាមួយគ្នានេះ សម្តេចក៏បានរៀបរាប់ពីប្រវត្តិនៃការជួបសន្ទនាជាមួយលោក ឡេ ឌឹកអាញ់ ទាំងក្នុងពេលនៅមន្ទីរពេទ្យ និងការងារផ្សេងៗ ដោយបានចាត់ទុកថា លោក ឡេ ឌឹកអាញ់ គឺជាមេដឹកនាំកំពូលរបស់វៀតណាម ដែលបានជួយដល់កម្ពុជាទាំងផ្នែកស៊ីវិល និងកងកម្លាំងប្រដាប់អាវុធ។

លោក ឡេ ឌឹកអាញ់

ប្រមុខរាជរដ្ឋាភិបាលកម្ពុជា បានសង្កត់ធ្ងន់ថា នេះគឺជាលើកចុងក្រោយនៃការអញ្ជើញ មកគោរពវិញ្ញាណក្ខន្ធ លោក ឡេ ឌឹកអាញ់ ជាពិសេសការបញ្ជាក់ពីការគោរពស្រឡាញ់ក្នុងនាម ជាប្រទេសដែលមានភូមិផងរបងជាមួយគ្នា។ វត្តមានរបស់សម្តេច និងគណៈប្រតិភូនៅពេលនេះ ក៏បានបញ្ជាក់ពីការគោរពស្រឡាញ់ពីគ្នាទៅវិញទៅមក ក្នុងនាមជាប្រជាជនដែលធ្លាប់តែជួយគ្នាក្នុងគ្រាមានការលំបាកដូចគ្នាកាលពីអតីតកាល។

ក្នុងជំនួបពិភាក្សាគ្នានោះដែរ មេដឹកនាំនៃប្រទេសទាំងពីរ កម្ពុជា-វៀតណាម ក៏បានពិភាក្សាគ្នាផងដែរ ពីជំនួបក្នុងអាហារពេលព្រឹក នៅទីក្រុងប៉េកាំង ប្រទេសចិន ក្នុងឱកាសដែលមេដឹកនាំទាំងពីរ អញ្ជើញចូលរួមវេទិកាខ្សែក្រវាត់ និងផ្លូវ លើកទី២ ស្តីពីកិច្ចសហប្រតិបត្តិការអន្តរជាតិ ព្រមទាំងបានធ្វើការពិភាក្សាផងដែរ ទាក់ទិនទៅនឹងទំនាក់ទំនងទ្វេភាគី ពហុភាគី បញ្ហាតំបន់ និងអន្តរជាតិ ដែលមានការយកចិត្តទុកដាក់ដូចគ្នា៕

អត្ថបទ៖ សំភី