សម្តេច ហ៊ុន សែន ចាត់ទុកលោក ឡេ ឌឹកអាញ់ ជាអ្នកកំពូលយុទ្ធសាស្រ្តយោធា និងនយោបាយ
- 2019-05-03 06:46:34
- ចំនួនមតិ 0 | ចំនួនចែករំលែក 0
សម្តេច ហ៊ុន សែន ចាត់ទុកលោក ឡេ ឌឹកអាញ់ ជាអ្នកកំពូលយុទ្ធសាស្រ្តយោធា និងនយោបាយ
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន បានចាត់ទុកអតីតប្រធានាធិបតីវៀតណាម លោក ឡេ ឌឹកអាញ់ ជាអ្នកកំពូលយុទ្ធសាស្រ្តលើផ្នែកយោធា និងនយោបាយ ដែលសម្តេចពុំទាន់បានជួបមនុស្សផ្សេងទៀតនៅតាមប្រទេសនានានៅឡើយ។ នេះបើតាមខ្លឹមសារដែលសម្តេចបានសរសេរលើសៀវភៅក្រាំងមាស នៃការចូលរួមមរណទុក្ខជូនចំពោះរដ្ឋ រដ្ឋាភិបាល គ្រួសារសពលោក ឡេ ឌឹកអាញ់ និងប្រជាជនវៀតណាម នៅថ្ងៃទី៣ ខែឧសភា ឆ្នាំ២០១៩។
សម្តេចបានសរសេររៀបរាប់យ៉ាងដូច្នេះថា៖ «តាំងពីបានជួបគ្នាលើកដំបូងនាដើមឆ្នាំ១៩៧៨ នៅមន្ទីរពេទ្យ ថុងញិត ក្រុងហូជីមិញ រហូតមកដល់ពេលនេះ រូបអ៊ុំ (លោក ឡេ ឌឹកអាញ់) ផ្ទាល់រួមជាមួយកងទ័ព និងប្រជាជនវៀតណាម បានជួយដល់ប្រជាជនកម្ពុជាច្រើនណាស់។ កងកម្លាំងប្រដាប់អាវុធសាមគ្គីសង្រ្គោះជាតិកម្ពុជា ត្រូវបានកសាងឡើងក្រោមការជួយឧបត្ថម្ភផ្ទាល់ពីសំណាក់លោកអ៊ុំ ដែលពេលនោះ លោកអ៊ុំ ជាមេបញ្ជាការយោធភូមិភាគទី៧ នៃកងទ័ពប្រជាជនវៀតណាម។ ការរំដោះប្រជាជនចេញពីរបបប្រល័យពូជសាសន៍ ប៉ុល ពត ការទប់ស្កាត់ការវិលត្រឡប់ នៃរបបប្រល័យពូជសាសន៍ ការកសាងកម្ពុជាឡើងវិញ ពិសេសការរីកធំធាត់ នៃកងទ័ពកម្ពុជា ។ល។ សុទ្ធតែមានការរួមចំណែករបស់លោកអ៊ុំ។ ក្នុងពេលបំពេញភារកិច្ចនៅកម្ពុជា លោកអ៊ុំបានតំណាងឲ្យបក្ស រដ្ឋាភិបាល និងកងទ័ពស្ម័គ្រចិត្តវៀតណាម អនុវត្តបានយ៉ាងពេញលេញ នូវគោលការណ៍ គោរពឯករាជ្យ អធិបតេយ្យភាពកម្ពុជា គោរពយ៉ាងម៉ឺងម៉ាត់ នូវការជ្រើសរើសរបស់ប្រជាជនកម្ពុជា នូវប្រព័ន្ធនយោបាយ សេដ្ឋកិច្ចសង្គមរបស់កម្ពុជា។ ក្នុងពេលបំពេញមុខងារជាប្រធានរដ្ឋវៀតណាម លោកអ៊ុំជាមនុស្សម្នាក់ ដែលបានរួមជាមួយបក្ស រដ្ឋាភិបាល កងទ័ព និងប្រជាជនវៀតណាម ជំរុញនូវទំនាក់ទំនងលើគ្រប់វិស័យ រវាងប្រទេសទាំងពីរ កម្ពុជា-វៀតណាម ឲ្យរីកចម្រើនយ៉ាងឆាប់រហ័ស។ តាំងពីពេលស្គាល់គ្នារហូតមកដល់ពេលបែកគ្នា លោកអ៊ុំ តែងយកចិត្តទុកដាក់ដល់រូបខ្ញុំ ភរិយា និងកូនៗ របស់ខ្ញុំ ដូចឪពុក និងកូន ជីតានិងចៅ។ ខ្ញុំនៅចាំបានថា នៅក្នុងគ្រាដែល ខ្ញុំលំបាកបំផុត ពេលកសាងកងទ័ពដំបូង លោកអ៊ុំបានផ្តល់នូវការឧបត្ថម្ភគ្រប់យ៉ាង ដើម្បីឲ្យកងទ័ពកម្ពុជា បានរីកធំធាត់យ៉ាងឆាប់រហ័ស។ លោកអ៊ុំមិនពិសារបារីទេ តែលោកអ៊ុំមិនភ្លេចផ្ញើបារីឲ្យខ្ញុំ ដោយសាអ៊ុំដឹងថា ខ្ញុំជាអ្នកជក់បារីច្រើន។ លោកអ៊ុំតែងផ្តល់យោបល់ឲ្យខ្ញុំថែសុខ ភាព»។
សូមជម្រាបថា នៅព្រឹកថ្ងៃទី៣ ឧសភា រដ្ឋ-រដ្ឋាភិបាលនៃសាធារណរដ្ឋសង្គមនិយមវៀតណាម បានប្រារព្វពិធីគោរពវិញ្ញាណក្ខន្ធផ្លូវការ សព លោក ឡេ ឌឹកអាញ់ អតីតប្រធានរដ្ឋវៀតណាម ដើម្បីឲ្យបណ្តាមេដឹកនាំពិភពលោក និងប្រជាជនវៀតណាម ចូលរួមគោរពវិញ្ញាណក្ខន្ធ និងការជូនដំណើរជាលើកចុងក្រោយជូនលោក។ ពិធីគោរពវិញ្ញាណក្ខន្ធផ្លូវការនេះ នឹងរៀបចំឡើងរយៈពេល ២ថ្ងៃ គឺនៅថ្ងៃទី៣ និងទី៤ឧសភា មុនពិធីហែរទៅបញ្ចុះសពនៅស្រុកកំណើតរបស់លោក ស្ថិតនៅភូមិភាគកណ្តាល របស់ប្រទេសវៀតណាម។
សម្តេច ហ៊ុន សែន ក្នុងនាមជាមេដឹកនាំពិភពលោកមួយរូប និងជាអ្នកដែលធ្លាប់មានទំនាក់ទំនងយ៉ាងជិតស្និទ្ធជាមួយនឹងលោក ឡេ ឌឹកអាញ់ បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជា និងថ្នាក់ដឹកនាំកងយោធពលខេមរភូមិន្ទ សរុបចំនួន ២៥រូប អញ្ជើញគោរពវិញ្ញាណក្ខន្ធ លោក ឡេ ឌឹកអាញ់ អតីតប្រធានរដ្ឋវៀតណាម ដែលប្រារព្វធ្វើឡើងនៅវិមានតម្កល់សពអគារលេខ៥ ចិនថាញើតុង (Tran Thanh Tong) ក្នុងទីក្រុងហាណូយ ប្រទេសវៀតណាម៕
អត្ថបទ និងរូបថត៖ ហ្វេសប៊ុកសម្តេច ហ៊ុន សែន