ប្រតិភូ UN លើកឡើង ៣ចំណុចធំៗ ទៅកាន់សម្តេច ហ៊ុន សែន
- 2019-05-06 08:45:55
- ចំនួនមតិ 0 | ចំនួនចែករំលែក 0
ប្រតិភូ UN លើកឡើង ៣ចំណុចធំៗ ទៅកាន់សម្តេច ហ៊ុន សែន
ចន្លោះមិនឃើញ
នាព្រឹកថ្ងៃទី៦ ខែឧសភា ឆ្នាំ២០១៩ សម្តេចនាយករដ្ឋមន្រ្តី ហ៊ុន សែន បានអញ្ជើញជួបមន្រ្តីនៃទីភ្នាក់ងារអង្គការសហប្រជាជាតិប្រចាំកម្ពុជា (UN) នៅវិមានសន្តិភាព ដឹកនាំដោយស្រី PAULINE THMESIS។
នៅក្នុងកិច្ចប្រជុំនេះ ប្រតិភូនៃទីភ្នាក់ងារអង្គការសហប្រជាជាតិ (UN) បានលើកឡើងនូវចំណុចសំខាន់ៗ៣ គឺ៖ ១. ពាក់ព័ន្ធទៅនឹងកិច្ចគាំពារសង្គម, ២. ទាក់ទងទៅនឹងទិន្នន័យសម្រាប់ការអភិវឌ្ឍ និង ៣. បញ្ហាការចូលរួមពិនិត្យរបាយការណ៍ថ្នាក់ជាតិលើការអនុវត្តគោលដៅអភិវឌ្ឍន៍ដោយចីរភាព នៅក្នុងទីក្រុងញ៉ូវយ៉ក (New York) នៅខែ៧ខាងមុខនេះ។
ពាក់ព័ន្ធទៅនឹងចំណុចទី១ នៃកិច្ចគាំពារសង្គម គឺប្រតិភូនៃទីភ្នាក់ងារអង្គការសហប្រជាជាតិ បានលើកឡើង៣ចំណុចដែលពាក់ព័ន្ធគ្នា គឺទី១. ការសម្របសម្រួលរវាងស្ថាប័ន និងហេដ្ឋារចនាសម្ព័ន្ធ ក្នុងការកសាងសមត្ថភាព។ ទី២. គឺការគាំពារសង្គម និងហិរញ្ញវត្ថុ និងទី៣. គឺការងារសង្គមជាមួយនឹងការអនុវត្តប្រកបដោយសមភាព។ ចំពោះការងារនេះ សម្ដេចតេជោនាយករដ្ឋមន្ត្រី បានអនុញ្ញាតឲ្យក្រសួង៦ និងក្រុមប្រឹក្សា១ ធ្វើការបកស្រាយរួមមាន៖ ១. ក្រសួងសេដ្ឋកិច្ច និងហិរញ្ញវត្ថុ, ២. ក្រសួងការងារ និងបណ្ដុះបណ្ដាលវិជ្ជាជីវៈ , ៣. ក្រសួងសុខាភិបាល,៤. ក្រសួងផែនការ , ៥. ក្រសួងកិច្ចការនារី និង ៦.ក្រសួងសង្គមកិច្ច និង ៧. ក្រុមប្រឹក្សាស្ដារ អភិវឌ្ឍន៍វិស័យកសិកម្ម និងជនបទ។
ចំពោះចំណុចទី១ គឺសម្តេចនាយករដ្ឋមន្ត្រី បានជម្រាបជូនប្រតិភូពាក់ព័ន្ធនឹងកិច្ចគាំពារសង្គមថា កម្ពុជា កាលពីដើមឡើយគឺមានភាពក្រីក្ររហូតដល់(១០០%) ឯណោះ ហើយក្រោយមកក៏មានការចាប់ផ្ដើមផ្ដល់នូវកិច្ចគាំពារសង្គមទៅដល់ស្ត្រីដែលមានផ្ទៃពោះ បន្ទាប់មកដល់ស្ត្រីដែលធ្វើការនៅតាមរោងចក្រ និងបន្ទាប់មកទៀត គឺទៅដល់ស្ត្រីដែលមានភាពក្រីក្រ ហើយក៏បានធ្វើការមួយចំនួនថែមទៀត រួមទាំងការកាត់បន្ថយថ្លៃអគ្គិសនី ការកសាងហេដ្ឋារចនាសម្ព័ន្ធ ការជីកអណ្តូងទឹក ជីកស្រះទឹកជាដើម ដែលទាំងអស់នេះសុទ្ធសឹងតែជាការគាំពារសង្គម។
ទី២. ទាក់ទងទៅនឹងទិន្នន័យសម្រាប់ការអភិវឌ្ឍ សម្តេច ហ៊ុន សែន បានអនុញ្ញាតឱ្យក្រសួង៤ធ្វើការបកស្រាយ រួមមាន ១)ក្រសួងផែនការ, ២)ក្រសួងសេដ្ឋកិច្ច និងហិរញ្ញវត្ថុ, ៣)ក្រសួងកិច្ចការនារី , និង៤)ក្រសួងអប់រំ យុវជន និងកីឡា។ ជាមួយគ្នានោះដែរ សម្តេច ក៏បានជម្រាបជូនបញ្ហាពាក់ព័ន្ធទៅនឹងករណីនេះ ដែលប្រតិភូនៃទីភ្នាក់ងារអង្គការសហប្រជាជាតិបានស្នើ គឺធ្វើយ៉ាងណាដើម្បីបង្កើនថវិកាជាតិនិងពង្រឹងគុណភាពសមត្ថភាព។ ការងារទិន្នន័យសម្រាប់ការអភិវឌ្ឍនេះ សម្តេចតេជោបានធ្វើការបកស្រាយថា កន្លងមករាជរដ្ឋាភិបាលកម្ពុជាបានជំរុញក្នុងការបង្កើនថវិកាជាតិជាប្រចាំ ហើយសង្ឃឹមថា នឹងឯកភាពបង្កើនថវិកាបន្ថែមទៀត។
ដោយឡែកពាក់ព័ន្ធទៅនឹងការពង្រឹងសមត្ថភាពវិញ សម្ដេច ហ៊ុន សែន បានធ្វើការណែនាំធ្វើយ៉ាងណាឲ្យមានការជំរុញឲ្យមានការសិក្សានៅថ្នាក់បរិញ្ញាបត្រ បរិញ្ញាបត្រជាន់ខ្ពស់ផងដែរ ហើយត្រង់ចំនុចនេះ លោក ហង់ ជួនណារ៉ុន ក៏បានធ្វើការណែនាំទៅដល់ស្ថាប័នពាក់ព័ន្ធនានា ដើម្បីឱ្យសាកលវិទ្យាធិការទាំងអស់ ជំរុញការអប់រំរហូតដល់ថ្នាក់បរិញ្ញាបត្រ និងបរិញ្ញាបត្រជាន់ខ្ពស់។
ចំណុចទី៣. ពាក់ព័ន្ធនឹងកិច្ចចូលប្រជុំរបាយការណ៍ថ្នាក់ជាតិលើការអនុវត្តគោលដៅអភិវឌ្ឍន៍ដោយចីរភាពនេះ អង្គការសហប្រជាជាតិបានស្នើឲ្យកម្ពុជាចូលរួមកិច្ចប្រជុំនៅទីក្រុងញ៉ូវយ៉ក (New York) នៅខែ៧ខាងមុខនេះ ហើយឲ្យមានការគាំទ្រដោយការចូលរួមពីស្ថាប័នពាក់ព័ន្ធទាំងអស់។
ជាការឆ្លើយតប សម្ដេច ហ៊ុន សែន បានអនុញ្ញាតឲ្យក្រសួងផែនការ ធ្វើការបកស្រាយ ដោយសម្ដេចបានបន្ដថា កម្ពុជាបានត្រៀមខ្លួនជាស្រេចដើម្បីចូលរួមកិច្ចប្រជុំ នៅខែ៧ខាងមុខនេះ។ ដោយឡែក ដែល UN សុំឱ្យមានការគាំទ្រពីស្ថាប័នពាក់ព័ន្ធនានានោះ គឺសម្តេច បានមានប្រសាសន៍ឆ្លើយតបថា សព្វថ្ងៃនេះរាល់ការងារទាំងអស់គឺមានការសម្របសម្រួលគ្នា ជាពិសេសមានការចូលរួមពីឧត្តមក្រុមក្រុមប្រឹក្សាសេដ្ឋកិច្ចជាតិកម្ពុជាផងដែរ៕
អត្ថបទ និងរូបថត៖ ហ្វេសប៊ុកសម្តេច ហ៊ុន សែន