ម៉ាឡេស៊ី ចោទថា EU ចាប់ផ្តើមធ្វើសង្គ្រាមពាណិជ្ជកម្មហើយ
- 2019-05-07 02:59:34
- ចំនួនមតិ 0 | ចំនួនចែករំលែក 0
ម៉ាឡេស៊ី ចោទថា EU ចាប់ផ្តើមធ្វើសង្គ្រាមពាណិជ្ជកម្មហើយ
ចន្លោះមិនឃើញ
ម៉ាឡេស៊ី កាលពីថ្ងៃទី៦ ខែឧសភា ឆ្នាំ២០១៩ បានចោទប្រកាន់សហភាពអឺរ៉ុបថា កំពុងចាប់ផ្តើមនូវ «សង្គ្រាមពាណិជ្ជកម្ម» ចំពោះផែនការសហភាពអឺរ៉ុប ដែលមានបំណងឈប់ប្រើប្រាស់ដូងប្រេង ក្នុងជីវឥន្ធនៈ ហើយម៉ាឡេស៊ី ក៏គំរាមតបតវិញផងដែរ។
លោកស្រី Teresa Kok រដ្ឋមន្រ្តីម៉ាឡេស៊ីទទួលបន្ទុកដូងប្រេង បានធ្វើដំណើរទៅអឺរ៉ុប ដើម្បីបញ្ជាក់ប្រាប់ថា រដ្ឋាភិបាលលោកស្រី នឹងវាយបកវិញ ប្រសិនសហភាពអឺរ៉ុប មិនព្រមបញ្ឈប់ផែនការនេះ។
លោកស្រីថ្លែងប្រាប់ AFP ថា៖ «យើងឃើញថាបែបនេះ គឺជាទម្រង់នៃសង្គ្រាមពាណិជ្ជកម្មបង្កឡើងដោយ EU ប្រឆាំងនឹងម៉ាឡេស៊ី និងឥណ្ឌូណេស៊ី ដែលជាប្រទេសផលិតដូងប្រេង»។
លោកស្រី Teresa Kok បានលើកឡើងពីការគំរាមដែលធ្វើឡើងដោយនាយករដ្ឋមន្រ្តីម៉ាឡេស៊ី លោក មហាធៀ ចំពោះការសងសឹកលើបញ្ហាខាងលើនេះ ដោយប្តូរពីការទិញយន្តហោះចម្បាំង Rafale របស់បារាំង ឬ Typhoon របស់អឺរ៉ុប ទៅជាការទិញយន្តហោះចម្បាំងពីចិនវិញ។
ម៉ាឡេស៊ីក៏ចាប់អារម្មណ៍ទិញសព្វាវុធ និងយន្តហោះពីរុស្ស៊ីផងដែរ បន្ទាប់ពីរដ្ឋមន្រ្តីការពារជាតិម៉ាឡេស៊ី បានទៅរុស្ស៊ី កាលពី២សប្តាហ៍មុន ដើម្បីពិនិត្យមើលហើយ។ ក្នុងនោះ ភាគីរុស្ស៊ី បានបង្ហាញឆន្ទៈក្នុងការបង្កើនទិញដូងប្រេងពីម៉ាឡេស៊ីផងដែរ។ នេះបើតាមការលើកឡើងបន្ថែមរបស់លោកស្រី Teresa Kok៕