រដ្ឋមន្រ្តីកសិកម្ម៖ កិច្ចអន្តរាគមន៍ទាន់ពេលរបស់វៀតណាម ជួយរក្សាតម្លៃស្រូវកម្ពុជា

2019-05-07 06:08:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ដោយសារកិច្ចសហប្រតិបត្តិការ និងជាពិសេសកិច្ចអន្តរាគមន៍បានទាន់ពេលវេលាពីរដ្ឋាភិបាលវៀតណាម កន្លងមក បានធ្វើឲ្យស្រូវកម្ពុជា រក្សាតម្លៃបានសមរម្យ។ លោកថ្លែងដូច្នេះក្នុងជំនួបលោកស្រី បុយ ធីធឿម ជាប្រធានសមាគមកសិករវៀតណាមថ្នាក់មជ្ឈឹម និងលោកឯកអគ្គរដ្ឋទូតសាធារណរដ្ឋសង្គមនិយមវៀតណាម ព្រមទាំងសហការីមួយចំនួនទៀតដែលសុទ្ធតែប្រធានសមាគមកសិករប្រចាំខេត្តទាំង ៥ នៅជាប់ព្រំដែនដូចជាខេត្តអាងយ៉ាង គៀងយ៉ាង ដុង ផាត់ តាយ និញ និងខេត្តឡុង អាន នាព្រឹកថ្ងៃទី៧ ខែឧសភា ឆ្នាំ២០១៩ នៅទីស្តីការក្រសួង។

រូបថត៖ ហ្វេសប៊ុកក្រសួងកសិកម្ម

លោក វេង សាខុន ថ្លែងថា កិច្ចសហប្រតិបត្តិការលើវិស័យកសិកម្ម រវាងប្រទេសទាំង២ បានចូលរួមចំណែកធ្វើឱ្យវិស័យនេះ មានការរីកចម្រើនគួរឲ្យមោទនភាព ពិសេសលើផលិតកម្មស្រូវ ដំណាំកសិឧស្សាហកម្ម និងការធ្វើកសិពាណិជ្ជកម្ម ហើយសង្ឃឹមថា រដ្ឋាភិបាលវៀតណាម នឹងបន្តជួយអភិវឌ្ឍវិស័យកសិកម្មបន្ថែមទៀត ជាពិសេសដល់វិស័យកសិពាណិជ្ជកម្ម នៅតាមខ្សែបន្ទាត់ព្រំដែន នៃប្រទេសទាំងពីរ ដោយផ្តោតជាសំខាន់់លើលំហូរកសិផលកម្ពុជា ចូលក្នុងទីផ្សារវៀតណាម ដូចជា ស្រូវ ដំឡូង ស្វាយ ស្វាយចន្ទី ពោត ម្រេច។ល។ ក្នុងនោះ ការនាំចេញកសិផលកម្ពុជាដូចជាស្វាយ ដំឡូង ស្វាយចន្ទី ទៅកាន់ទីផ្សារវៀតណាមមានការកើនឡើងគួរឲ្យចាប់អារម្មណ៍។

ក្នុងឱកាសនោះ លោកស្រីប្រធានប្រតិភូ បានលើកឡើងពីចំណាប់អារម្មណ៍ទាក់ទងនឹងការរីកចម្រើនរបស់ប្រទេសកម្ពុជា ជាពិសេសការរីកចម្រើនលើវិស័យកសិកម្ម ដែលបានចូលរួមចំណែកជំរុញកំណើនសេដ្ឋកិច្ចជាតិ កែលម្អកម្រិតជីវភាពរបស់ប្រជាពលរដ្ឋ និងកាត់បន្ថយភាពក្រីក្រ។

លោកស្រីបានបន្តថា ជំនួបនាពេលនេះគឺមានគោលបំណងធ្វើការផ្លាស់ប្តូរបទពិសោធន៍ជាមួយក្រសួង ពិសេសអគ្គនាយកដ្ឋាន ឬអង្គភាពពាក់ព័ន្ធដើម្បីបង្កើនការធ្វើកសិពាណិជ្ជកម្មនាពេលអនាគត ដោយសំដៅទៅលើខេត្តជាប់ព្រំដែននៃប្រទេសទាំងពីរ ដូចជាការប្រើប្រាស់ទឹក ការដោះដូរទំនិញ ការផ្លាស់ប្តូរបទពិសោធលើការងារបច្ចេកទេសក្រោយពេលប្រមូលផល និងទេសចរណ៍។

លោកសង្ឃឹមថា តាមរយ:កិច្ចសហប្រតិបត្តិការដ៏ល្អប្រសើររវាងប្រទេសទាំងពីរ នឹងជួយជំរុញការអភិវឌ្ឍវិស័យកសិកម្មនៅកម្ពុជា ឲ្យមានការរីកចម្រើនសមស្របតាមចក្ខុវិស័យរបស់រាជរដ្ឋាភិបាលកម្ពុជានាពេលអនាគត។

នាឱកាសនេះដែរភាគីទាំងពីរក៏បានលើកយកប្រធានបទសំខាន់ៗមកពិភាក្សាផងដែរជាអាទិ៍÷ ទី១. ការរៀបចំផ្លាស់ប្តូរដំណើរទស្សនកិច្ចរបស់សមាជិកសហគមន៍កសិកម្មរវាងប្រទេសទាំងពីរ ទី២. ការរៀបចំវេទិកាកសិករប្រទេសទាំងពីរ រួមទាំងការតាំងពិព័ណ៍កសិផលសហគមន៍កសិកម្ម និងបច្ចេកវិទ្យាកសិកម្ម នៃប្រទេសទាំងពីរ៕

អត្ថបទ៖ សំភី