រដ្ឋមន្រ្តី ហាមមិនឱ្យអ្នកដឹកនាំក្រុមទេសចរ ជូនលុយក្រៅផ្លូវការនៅច្រកទ្វារអន្តរជាតិ
- 2019-05-09 03:21:39
- ចំនួនមតិ 0 | ចំនួនចែករំលែក 0
រដ្ឋមន្រ្តី ហាមមិនឱ្យអ្នកដឹកនាំក្រុមទេសចរ ជូនលុយក្រៅផ្លូវការនៅច្រកទ្វារអន្តរជាតិ
ចន្លោះមិនឃើញ
លោក ថោង ខុន រដ្ឋមន្ត្រីក្រសួងទេសចរណ៍ បានហាមយ៉ាងដាច់ណាត់មិនឱ្យអ្នកដឹកនាំក្រុមទេសចរ (Tour Leaders) ទាំងឡាយ ជូនលុយក្រៅផ្លូវការទៅមន្ត្រីនគរបាល នៅពេលបោះត្រាលើលិខិតឆ្លងដែន នៅតាមច្រកទ្វារព្រំដែនអន្តរជាតិ ឬព្រលានយន្តហោះអន្តរជាតិ ហើយក៏មិនត្រូវណែនាំឱ្យភ្ញៀវទេសចរបរទេសប្រព្រឹត្តិទង្វើមិនគប្បីបែបនេះឡើយ ព្រោះគ្មានច្បាប់ណាតម្រូវឱ្យធ្វើបែបនេះទេ។
ការលើកឡើងបែបនេះត្រូវបានធ្វើឡើងក្នុងកិច្ចប្រជុំរបស់គណៈកម្មការអន្តរក្រសួងដើម្បីសម្របសម្រួលការធ្វើដំណើរឆ្លងកាត់ និងដឹកជញ្ជូនភ្ញៀវទេសចរ និងអ្នកដំណើរនៅតាមច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេសកាលពីល្ងាចថ្ងៃទី០៨ ខែឧសភា ឆ្នាំ២០១៩ នៅទីស្ដីការក្រសួងទេសចរណ៍។
ចំណុចដ៏រសើបនេះត្រូវបានបង្ហើបឱ្យដឹងដោយនាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍។ ដោយលោកបានឲ្យដឹងថា តាមការរាយការណ៍របស់មន្ត្រីនគរបាលមូលដ្ឋាន មានការឱ្យលុយនៅពេលបោះត្រាលើលិខិតឆ្លងដែនរបស់ភ្ញៀវជនជាតិចិនខ្លះ។ នៅពេលដែលភ្ញៀវយកលិខិតឆ្លងដែននោះទៅឱ្យមន្ត្រីនគរបាលបោះត្រា តែមិនច្រើនទេត្រឹម ២០០០រៀល, ៥០០០រៀល ឬ ៥យ័ន តែប៉ុណ្ណោះ។
នាយឧត្តមសេនីយ៍ គៀត ច័ន្ទថារិទ្ធ បានបញ្ជាក់ថា ទោះបីមានបញ្ហានេះកើតឡើងក៏ដោយ លោកនៅតែព្យាយាមឱ្យមន្ត្រីនគរបាលពាក់ព័ន្ធ ដាច់ខាតមិនត្រូវធ្វើយ៉ាងដូច្នោះទេ ព្រោះមិនមែនជាចំណុចល្អហើយជាអំពើខុសច្បាប់។ លោកនាយឧត្តមសេនីយ៍បានសំណូមពរដល់ក្រសួងទេសចរណ៍ជួយផ្សព្វផ្សាយដល់អ្នកដឹកនាំក្រុមទេសចរឬប្រតិបត្តិករទេសចរណ៍ទាំងអស់កុំឱ្យបន្តប្រព្រឹត្តិនូវចំណុចខាងលើនោះតទៅទៀត។
ឆ្លើយតបនឹងបញ្ហានេះ លោករដ្ឋមន្ត្រីក្រសួងទេសចរណ៍ បានបញ្ជាទៅមន្ត្រីពាក់ព័ន្ធភ្លាមៗពិសេសមន្ទីរទេសចរណ៍គ្រប់រាជធានី-ខេត្តដែលបានមកចូលរួមប្រជុំផងដែរ ត្រូវផ្សព្វផ្សាយបញ្ជ្រាបបញ្ហានេះជាបន្ទាន់ទៅដល់ក្រុមមគ្គុទ្ទេសក៍ទេសចរណ៍ប្រតិបត្តិករទេសចរណ៍ទាំងអស់ដាច់ខាតមិនឱ្យប្រព្រឹត្តទង្វើបែបនេះតទៅទៀតឡើយ។
លោករដ្ឋមន្ត្រី ថោង ខុន បានព្រមានថា បើមគ្គុទ្ទេសក៍ទេសចរណ៍ ប្រតិបត្តិករទេសចរណ៍ទាំងនោះនៅតែប្រព្រឹត្តបែបនេះទៀតត្រូវចាត់វិធានការតាមផ្លូវច្បាប់ ពោលគឺត្រូវរួមគ្នាទប់ស្កាត់និងលុបបំបាត់បញ្ហានេះឱ្យបានចាប់ពីពេលនេះតទៅ។
នាយឧត្តមសេនីយ៍ គៀត ច័ន្ទថារិទ្ធ ក៏បានរាយការណ៍ថាក្រោយពីបានពិគ្រោះយោបល់ជាមួយលោករដ្ឋមន្ត្រីក្រសួងទេសចរណ៍អំពីការរិះរកគ្រប់វិធីក្នុងការកាត់បន្ថយនូវរបាំងមិនចាំបាច់នៅតាមច្រកទ្វារអន្តរជាតិ។ ដោយបានទទួលការឯកភាពពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃរួចហើយ នៅថ្ងៃទី១ខែមិថុនាឆ្នាំ២០១៩ខាងមុខនេះ ក្រសួងនឹងប្រកាសដាក់ឱ្យប្រើប្រាស់នូវសាលាកប័ត្រចេញចូលថ្មីខ្លីដែលមានភាពងាយស្រួលនៃបែបបទសុំទិដ្ឋាការ ពេលភ្ញៀវទេសចរមកដល់។
ពាក់ព័ន្ធនឹងការសម្រួលការធ្វើដំណើរទេសចរណ៍នេះទៀតសោតលោករដ្ឋមន្ត្រីថោងខុនបានថ្លែងអំណរគុណចំពោះកំពង់ផែស្វយ័តខេត្តព្រះសីហនុនិងផ្នែកពាក់ព័ន្ធទាំង់អស់ពិសេសអគ្គនាយកដ្ឋានអន្តោប្រវេសន៍។ក៏ដូចជាអគ្គនាយកដ្ឋានគយនិងរដ្ឋាករកម្ពុជាដែលបានខិតខំយកចិត្តទុកដាក់សម្រួលគ្រប់បែបយ៉ាង ដល់ការធ្វើរដំណើររបស់ទេសចរ។ ពិសេសរថយន្តទេសចរបរទេសជាគ្រួសារ ឬឯកជន (self driving tour) ដោយមិនចាំបាច់មានប្រាក់កក់ គឺតម្រូវត្រឹមតែបង់តែប្រាក់ធានារ៉ាប់រងប៉ុណ្ណោះ។
លោក ហោសារុន អនុរដ្ឋលេខាធិការក្រសួងទេសចរណ៍បានលើកឡើងថា ក្នុងត្រីមាសទី១ ដើមឆ្នាំ២០១៩ ភ្ញៀវទេសចរអន្តរជាតិមកកម្ពុជា មានចំនួនជាង១,៨លានលាក់កើន ៩,៧ភាគរយ បើធៀបទៅនឹងឆ្នាំ២០១៨ រយ:ពេលដូចគ្នា។ ផ្លូវអាកាសទាំង៤ ត្រូវបានមើលឃើញថាភ្ញៀវបានធ្វើដំណើរឆ្លងកាត់ចេញចូលច្រើនជាងផ្លូវគោក និងផ្លូវទឹក គឺកើនពីជាង៧% ទៅ៣៣១ភាគរយ៕