បារាំងចុះកិច្ចព្រមព្រៀងផ្តល់ជំនួយ និងកម្ចីឱ្យកម្ពុជា ប្រមាណជាង ៣២លានដុល្លារ

2019-05-09 07:24:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ រួមជាមួយលោក Remi Rioux នាយកគ្រប់គ្រងទូទៅនៃទីភ្នាក់ងារបារាំងសម្រាប់ការអភិវឌ្ឍ បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការ ក្នុងទឹកប្រាក់ចំនួន ២៩,១លានអឺរ៉ូ (ជាង ៣២,៥លានដុល្លារអាមេរិក)។ ក្នុងនោះឥណទានសម្បទានចំនួន ២៥លានអឺរ៉ូ ពីទីភ្នាក់ងារបារាំងសម្រាប់ការអភិវឌ្ឍ និងហិរញ្ញប្បទានឥតសំណងចំនួន ៤,១លានអឺរ៉ូពីសហគមន៍អឺរ៉ុប (EU)។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច។

ពិធីចុះហត្ថលេខានេះ ធ្វើឡើងកាលពីថ្ងៃទី៦ ខែឧសភា ឆ្នាំ២០១៩ ក្នុងអំឡុងជំនួបរវាងលោក អូន ព័ន្ធមុនីរ័ត្ន និងលោក Remi Rioux នៅទីស្នាក់ការកណ្តាលនៃទីភ្នាក់ងារបារាំងសម្រាប់ការអភិវឌ្ឍន៍ (AFD) នៅក្រុងប៉ារីស ប្រទេសបារាំង។

រូបថត៖ ក្រសួងសេដ្ឋកិច្ច និងហិរញ្ញវត្ថុ

ជំនួយ និងកម្ចីខាងលើនេះ ផ្តោតលើគម្រោងធ្វើទំនើបកម្មលើប្រព័ន្ធបណ្តាញបញ្ជូន និងចែកចាយ ដែលគម្រោងនេះមានទិសដៅ ក្នុងការពង្រីក និងអភិវឌ្ឍន៍ប្រព័ន្ធគ្រប់គ្រងអគ្គិសនី ឱ្យមានការវិវត្តទៅរកប្រព័ន្ធឆ្លាតវៃ (Smart Grid) ដែលអាចសម្រួលយ៉ាងច្រើនក្នុងការគ្រប់គ្រងប្រព័ន្ធបណ្តាញអគ្គិសនីទាំងមូល ក៏ដូចជាបង្កើនប្រសិទ្ធភាព និងនិរន្តភាពក្នុងការផ្គត់ផ្គង់ថាមពលអគ្គិសនីនៅកម្ពុជា។

ក្នុងជំនួបនេះ លោកឧបនាយករដ្ឋមន្រ្តី បានលើកឡើងថា សមិទ្ធផលនៃការអភិវឌ្ឍរបស់កម្ពុជាបច្ចុប្បន្ន គឺមិនអាចកាត់ផ្តាច់ពីតួនាទីយ៉ាងសកម្ម និងការចូលរួមចំណែករបស់ទីភ្នាក់ងារបារាំង សម្រាប់ការអភិវឌ្ឍ តាមរយៈកិច្ចសហប្រតិបត្តិការហិរញ្ញប្បទាន ការផ្តល់ឥណទានសម្បទានដែលមានភាពអំណោយផល និងអនុគ្រោះខ្ពស់ ជំនួយបច្ចេកទេសក៏ដូចជា កិច្ចសហប្រតិបត្តិការលើវិស័យពាណិជ្ជកម្ម សេដ្ឋកិច្ច សង្គមកិច្ច អភិបាលកិច្ច និងការអភិវឌ្ឍលើវិស័យផ្សេងៗទៀតនៅកម្ពុជាជាដើម។

រូបថត៖ ក្រសួងសេដ្ឋកិច្ច និងហិរញ្ញវត្ថុ

ចំណែកលោក Remi Rioux បានបញ្ជាក់ថា ទីភ្នាក់ងារបារាំងសម្រាប់ការអភិវឌ្ឍ មានបំណងនឹងបង្កើនទំហំឥណទានប្រចាំឆ្នាំរបស់ខ្លួន ឱ្យស្របនឹងបរិការណ៍អភិវឌ្ឍន៍នៅកម្ពុជា នាពេលបច្ចុប្បន្ន៕

អត្ថបទ៖ សំភី