EU ប្រគល់វិញ្ញាបនបត្រចុះបញ្ជី "ស្ករត្នោតកំពង់ស្ពឺ" ជូនកម្ពុជា
- 2019-05-10 01:58:01
- ចំនួនមតិ 0 | ចំនួនចែករំលែក 0
EU ប្រគល់វិញ្ញាបនបត្រចុះបញ្ជី "ស្ករត្នោតកំពង់ស្ពឺ" ជូនកម្ពុជា
ចន្លោះមិនឃើញ
តាមការអញ្ជើញពីលោក George Edgar ឯកអគ្គរដ្ឋទូតសហភាពអឺរ៉ុប លោក កឹម ស៊ីថន រដ្ឋមន្ត្រីស្តីទីក្រសួងពាណិជ្ជកម្ម បានអញ្ជើញចូលរួមទិវាសហភាពអឺរ៉ុប និងប្រគល់វិញ្ញាបនបត្រចុះបញ្ជី "ស្ករត្នោតកំពង់ស្ពឺ" ដែលទើបតែទទួលបានការចុះបញ្ជីការពារនៅសហភាពអឺរ៉ុប កាលពីថ្ងៃទី០៣ ខែមេសា ឆ្នាំ២០១៩ ជូនលោក សម សារឿន ប្រធានសមាគមលើកកម្ពស់ស្ករត្នោតកំពង់ស្ពឺ កាលពីថ្ងៃទី៩ ខែឧសភា ឆ្នាំ២០១៩ នៅសណ្ឋាគារ Raffles Hotel Le Royal។
"ស្ករត្នោតកំពង់ស្ពឺ" មិនត្រឹមតែសម្រាប់ប្រើប្រាស់ធ្វើម្ហូបអាហារប៉ុណ្ណោះទេ ប៉ុន្តែមានកម្រិតជាតិផ្អែមទាប ដែលអាចទ្រទ្រង់សុខភាព និងរក្សាភាពក្មេងខ្ចីរបស់មនុស្សបានល្អប្រសើរឡើង។
ដោយសារតែភាពល្បីទាំងនេះហើយ "ស្ករត្នោតកំពង់ស្ពឺ" និង "ម្រេចកំពត" ត្រូវបានរដ្ឋមន្ត្រីក្រសួងពាណិជ្ជកម្ម បានផ្តួចផ្តើមពង្រីកកិច្ចការពារនៅប្រទេសវៀតណាម ថៃ និងសហភាពអឺរ៉ុប ដើម្បីទទួលបាននូវកិច្ចការពារតាមផ្លូវច្បាប់ឲ្យបានរឹងមាំ ក្នុងករណីមានការក្លែងបន្លំ អាជ្ញាធរមានសមត្ថកិច្ចនៃប្រទេសនោះ អាចជួយចាត់វិធានការទប់ស្កាត់បាន។
សូមបញ្ជាក់បន្ថែមទៀតថា កិច្ចប្រឹងប្រែងរបស់រាជរដ្ឋាភិបាលកម្ពុជា បានលើកស្ទួយវិស័យកម្មសិទ្ធិបញ្ញាជាតិ បានកសាងច្បាប់ លិខិតបទដ្ឋានគតិយុត្ត និងបានចូលក្នុងកិច្ចព្រៀមព្រៀង និងសន្ធិសញ្ញាអន្តរជាតិសំខាន់ៗពាក់ព័ន្ធនឹងកម្មសិទ្ធិបញ្ញា ដែលអាចការពារទាំងម៉ាកសម្គាល់ភូមិសាស្ត្រទំនិញកម្ពុជា ទាំងម៉ាកសម្គាល់ភូមិសាស្ត្រទំនិញបរទេស ហើយថ្មីៗនេះកម្ពុជា ទើបតែបានចុះបញ្ជីការពារស្រា CHAMPAGNE ដែលម្ចាស់ម៉ាកសម្គាល់ភូមិសាស្ត្រទំនិញបរទេសដំបូងនៅកម្ពុជាផងដែរ។
ឆ្លៀតក្នុងឱកាសនេះផងដែរ ក្រសួងពាណជ្ជកម្មបានអំពាវនាវ និងលើកទឹកចិត្តឲ្យសមាគមលើកកម្ពស់ស្ករត្នោតកំពង់ស្ពឺ ត្រូវខិតខំរក្សាបរិស្ថានក្នុងតំបន់ផលិត រក្សាដើមត្នោត និងពង្រីកការដាំដើមត្នោតបន្ថែមទៀត ដើម្បីធានាឲ្យបាននូវនិរន្តរភាពនៃការផលិតស្ករតាមបែបធម្មជាតិសម្រាប់ផ្គត់ផ្គង់ទីផ្សារ ដែលនឹងមានតម្រូវការខ្ពស់នាពេលខាងមុខនេះ។
កិច្ចការពារ “ស្ករត្នោតកំពង់ស្ពឺ” និង “ម្រេចកំពត” នៅសហភាពអឺរ៉ុប និងស្រា CHAMPAGNE នៅកម្ពុជា ជាចំណងដៃប្រកបទៅដោយផ្លែផ្កានៃកិច្ចសហប្រតិបត្តិការរវាងព្រះរាជាណាចក្រកម្ពុជា និងសហភាពអឺរ៉ុបកន្លងមក ដែលត្រូវបន្តពង្រឹង និងពង្រីកកិច្ចសហប្រតិបត្តិការជាប្រពៃណីនេះបន្ថែមទៀត ដើម្បីជាការផ្តល់ផលប្រយោជន៍ឲ្យគ្នាទៅវិញទៅមក៕