លោក ដូណាល់ ត្រាំ សង្ឃឹមថា អាមេរិកនឹងមិនធ្វើសង្គ្រាមជាមួយអ៊ីរ៉ង់ទេ

2019-05-17 02:15:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីអាមេរិក លោក ដូណាល់ ត្រាំ បានបង្ហាញក្តីសង្ឃឹមថា អាមេរិកនឹងមិនធ្វើសង្គ្រាមជាមួយអ៊ីរ៉ង់ទេ បើទោះបីជារយៈពេលចុងក្រោយនេះ ភាពតានតឹងរវាងប្រទេសទាំង២ មានការកើនឡើងខ្លាំងក៏ដោយ។

ការបញ្ជាក់ខាងលើនេះ គឺក្នុងខណៈដែលលោក ដូណាល់ ត្រាំ បានជួបពិភាក្សាជាមួយប្រធានាធិបតីស្វីស លោក Ueli Maurer កាលពីថ្ងៃទី១៦ ខែឧសភា ឆ្នាំ២០១៩ នៅសេតវិមាន ក្នុងរដ្ឋធានីវ៉ាស៊ីងតោន។

រូបថត៖ AP

បើតាមសេចក្តីថ្លែងការណ៍មួយរបស់សេតវិមាន បានឱ្យដឹងថា ប្រធានាធិបតីទាំង២ បានពិភាក្សាគ្នាអំពីបញ្ហាអន្តរជាតិ រួមមានវិបត្តិនៅមជ្ឈិមបូព៌ា និងនៅវេណេហ្ស៊ុយអេឡា។ ក្នុងនោះ លោក ត្រាំ បានអរគុណភាគីស្វីស ដែលបានតួនាទីយ៉ាងសំខាន់ក្នុងការសម្របសម្រួលក្នុងក្របខណ្ឌអន្តរជាតិ និងទំនាក់ទំនងការទូត ក្នុងនាមសហរដ្ឋអាមេរិក។

កាលពីដើមសប្តាហ៍នេះ គេមានការបារម្ភថា អាមេរិក និងអ៊ីរ៉ង់ នឹងអាចប៉ះទង្គិចគ្នា បន្ទាប់ពីអាមេរិកដកមន្រ្តីការទូតមួយចំនួនចេញពីស្ថានទូតរបស់ខ្លួននៅក្រុងបាដាដ ប្រទេសអ៊ិរ៉ាក់ ដោយខ្លាចមានការវាយប្រហារពីក្រុមឧទ្ទាមស៊ីអ៊ីតរបស់ប្រទេសអ៊ីរ៉ង់។

កាសែតវ៉ាស៊ីងតោនប៉ុស្តិ៍ បានចេញផ្សាយព័ត៌មានមួយកាលពីយប់ថ្ងៃពុធ ដោយដកស្រង់សម្តីមន្រ្តីអាមេរិក ឱ្យដឹងថា លោក ដូណាល់ ត្រាំ ចង់ឱ្យមានដំណោះស្រាយការទូតជាមួយអ៊ីរ៉ង់ និងចរចាជាមួយមេដឹកនាំអ៊ីរ៉ង់ដោយផ្ទាល់ ប៉ុន្តែបារម្ភថា ទីប្រឹក្សារបស់លោកមួយចំនួនជំទាស់ ហើយជំរុញឱ្យមានសង្គ្រាមទៅវិញ។

គួរកត់សម្គាល់ដែរថា ការលើកឡើងរបស់លោក ដូណាល់ ត្រាំ ខាងលើនេះ បានធ្វើឡើងខណៈដែលរដ្ឋមន្រ្តីការបរទេសអ៊ីរ៉ង់ លោក Mohammad Javad Zarif បានធ្វើទស្សនកិច្ចនៅប្រទេសជប៉ុន ដែលជាសម្ព័ន្ធមិត្តដ៏ជិតស្និទ្ធិរបស់អាមេរិក៕

ប្រភព៖ Channelnewsasia ប្រែសម្រួល៖ សំភី