រដ្ឋមន្រ្តីសេដ្ឋកិច្ច ស្នើឱ្យក្រុមហ៊ុនអាមេរិក ជួយលើបញ្ហាអគ្គិសនីដែលកម្ពុជាកំពុងប្រឈម

2019-05-17 06:43:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានស្នើសុំឱ្យក្រុមហ៊ុនអាមេរិក General Electric (GE) បន្តគាំទ្រវិស័យសុខាភិបាល និងសុខុមាលភាពរបស់ប្រជាជន, ដោះស្រាយបញ្ហាប្រឈមនៃការផ្គត់ផ្គង់អគ្គិសនី និងជួយគាំទ្រកសាងសមត្ថភាព និងសិក្សាការបន្ទាបថ្លៃអគ្គិសនីនៅកម្ពុជាបន្ថែមទៀត។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច។

សំណើខាងលើនេះ ធ្វើឡើងក្នុងជំនួបរវាងលោក អូន ព័ន្ធមុនីរ័ត្ន និងលោក ចន ជីរៃ អគ្គនាយកក្រុមហ៊ុន GE និងជាទីប្រឹក្សារាជរដ្ឋាភិបាលកម្ពុជា កាលពីរសៀលថ្ងៃទី១៦ ខែឧសភា ឆ្នាំ២០១៩ នៅទីស្តីការក្រសួងសេដ្ឋកិច្ច និងហិរញ្ញវត្ថុ។

ជាការឆ្លើយតប លោកអគ្គនាយកក្រុមហ៊ុន បានយល់ស្រប និងទទួលយកទៅពិចារណាចំពោះសំណើរបស់លោករដ្ឋមន្រ្តីសេដ្ឋកិច្ចកម្ពុជា ហើយក្រុមការងាររបស់លោក នឹងប្តេជ្ញាបន្តកិច្ចសហប្រតិបត្តិការជាមួយក្រុមការងារក្រសួងសេដ្ឋកិច្ច និងក្រសួងពាក់ព័ន្ធ ធ្វើការពិនិត្យសិក្សាទៅលើការងារ និងសំណើទាំងនេះ។

សេចក្តីប្រកាសដដែលបានឱ្យដឹងថា ក្រុមហ៊ុន GE មានវត្តមាននៅកម្ពុជា ក្នុងឆ្នាំ២០០៩ ដោយបានកសាងភាពជាដៃគូជាមួយនឹងវិស័យឯកជន និងសាធារណៈ ដោយអាជីវកម្មដែលមានសកម្ម គឺវិស័យថាមពលអគ្គិសនី ដំណោះស្រាយបណ្តាញបញ្ជូន និងចែកចាយអគ្គិសនី និងថាមពលអគ្គិសនីសម្រាប់វិស័យសុខាភិបាល។

ក្រុមហ៊ុននេះ មានទីស្នាក់ការនៅក្នុងរដ្ឋ Boston សហរដ្ឋអាមេរិក និងនៅក្នុងប្រទេសចំនួន ១៧៥។ GE មានបទពិសោធន៍ច្រើនលើថាមពលអគ្គិសនី រួមមាន៖ ថាមពលធ្យូងថ្ម, ថាមពលវារីអគ្គិសនី និងថាមពលកកើតឡើងវិញ ដូចជា ថាមពលពន្លឺព្រះអាទិត្យ, ខ្យល់, ថាមពលជីវចម្រុះ និងថាមពលនុយក្លេអ៊ែរ៕

អត្ថបទ៖ សំភី