ប្រវត្តិបទចម្រៀង៖ "ចម្រៀងលាគ្នា" លាក់ទុកនូវភាពសោកសៅ នាដែនដីព្រះអាទិត្យ

2019-05-17 08:16:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

"ចម្រៀងលាគ្នា" គឺជាស្នាដៃ និពន្ធទំនុកច្រៀង និងដឹកនាំវង់ភ្លេងដោយលោក ម៉ក់ ឈួន និងផលិតដោយក្រុមហ៊ុនថាសចម្រៀងឡាក់សៀ សញ្ញាអប្សរា។ បទនេះត្រូវបានផលិតឡើងនៅដើមទសវត្សរ៍ឆ្នាំ១៩៧០ ដើម្បីដាក់បញ្ចូលនៅក្នុងខែ្សភាពយន្តចិនដែលបញ្ចាំងនៅប្រទេសកម្ពុជារឿង "អូនឈឺចិត្តណាស់"។

ខ្សែភាពយន្តចិនរឿង "អូនឈឺចិត្តណាស់" និយាយអំពីគ្រួសារក្រីក្រមួយ ដែលមានកូនប្រុសស្រីពីរនាក់។ ថ្ងៃមួយបុរសជាប្តី បានលាប្រពន្ធទៅធ្វើការនៅលើទូកនេសាទ ឯស្រុកឆ្ងាយ។ បន្ទាប់ពីប្តីចាកចេញទៅ ស្ថានភាពគ្រួសារកាន់តែយ៉ាប់យ៉ឺន។ ស្ត្រីជាភរិយា បានសម្រេចចិត្តទៅធ្វើការជានារីបម្រើនៅតាមរង្គសាល ដោយមិនឱ្យកូនៗទាំងពីរដឹងឡើយ។

បុរសជាប្តីដែលទៅធ្វើការនៅឯសមុទ្រ ក៏មានគ្រោះថ្នាក់ ហើយត្រូវបានកូនស្រី ថៅកែជួយយកអាសារ។ ក្រោយមកបុរសនោះក៏រៀបការជាមួយកូនស្រីថៅកែ ដោយបំភ្លេចប្រពន្ធនិងកូនៗនៅឯផ្ទះ។ លុះចំណេរក្រោយមក ប្រពន្ធដើមបាននាំកូនៗទៅរកបុរសនោះ តែបុរសនោះមិនទទួលស្គាល់នាង និងកូនៗឡើយ។ ដោយអស់សង្ឃឹម ស្ត្រីជាប្រពន្ធដើមបានបីកូនចាកចេញពីបុរសនោះទៅ។

បទចម្រៀងនេះមានចំណងជើងថា "នរណាមកស្នេហ៍អូន" ជាសំនៀងរបស់អ្នកចម្រៀងចិនដ៏ល្បី ឈ្មោះ ថេរីសា តេង។ ប៉ុន្តែ ចម្រៀងនេះមិនមែនចាប់កំណើតនៅប្រទេសចិននោះទេ។ វាមានដើមកំណើតនៅដែនដីព្រះអាទិត្យ។

បទចម្រៀងដើម មានចំណងជើងថា Minatomachi Blues ដែលប្រែជាខេមរភាសាថា "ទីក្រុងកំពង់ផែ"។

Minatomachi Blues ច្រៀងរៀបរាប់អំពីមនោសញ្ចេតនាច្រើនរាប់មិនអស់របស់ពួកនាវិក និងនារីអូតេស តាមទីក្រុងកំពង់ផែនានា។ បទចម្រៀងនេះ ក៏បានរៀបរាប់ឈ្មោះទីក្រុង កំពង់ផែមួយចំនួននៅក្នុងប្រទេសជប៉ុនផងដែរ។

សូមរំលឹកថា បទចម្រៀងនេះក៏ត្រូវបាន ផលិតឡើងវិញ ដើម្បីរំព្ញកដល់ទីក្រុងកំពង់ផែមួយចំនួនដែលរងការបំផ្លាញដោយរលក យក្សស៊ូណាមិ កាលពីឆ្នាំ២០១១ កន្លងទៅនេះ ផងដែរ។

Minatomachi Blues ចេញលក់នៅឆ្នាំ ១៩៦៩។ បទចម្រៀង នេះ ច្រៀងដោយអ្នកចម្រៀងឈ្មោះ Shinichi Mori និពន្ធទំនុកច្រៀងដោយ Takeshi Fukatsu និង Rei Nakanishi និង និពន្ធបទភ្លេងដោយ Kosho Inomata។

Minatomachi Blues ជាបទចម្រៀងល្បីល្បាញនៅក្នុងតំបន់ ហេតុដូច្នេះហើយ ទើបវាមានឥទ្ធិពលដល់សិល្បៈចម្រៀងរបស់ចិន និង កម្ពុជា៕

អត្ថបទ៖ ឃុត សុខឿន