ក្រសួងអប់រំ៖ ការបង្ហោះពីសេវាធ្វើសញ្ញាបត្រ ជាការបំពានលើសេចក្តីថ្លៃថ្នូរបស់រាជរដ្ឋាភិបាល
- 2019-05-20 07:27:37
- ចំនួនមតិ 0 | ចំនួនចែករំលែក 0
ក្រសួងអប់រំ៖ ការបង្ហោះពីសេវាធ្វើសញ្ញាបត្រ ជាការបំពានលើសេចក្តីថ្លៃថ្នូរបស់រាជរដ្ឋាភិបាល
ចន្លោះមិនឃើញ
ក្រសួងអប់រំ យុវជន និងកីឡា បានហៅការបង្ហោះព័ត៌មានអំពីសេវាធ្វើសញ្ញាបត្រ ជាអំពើខុសច្បាប់ ដែលបំពានលើសេចក្តីថ្លៃថ្នូរ និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក៏ដូចជាការអនុវត្តកំណែទម្រង់របស់ក្រសួងអប់រំ ក្នុងការលើកកម្ពស់គុណភាពអប់រំនៅកម្ពុជា ជាពិសេសប៉ះពាល់ដល់ស្មារតី និងការខិតខំរៀនសូត្ររបស់សិស្សានុសិស្ស និងនិស្សិតកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងអប់រំ នៅថ្ងៃទី២០ ខែឧសភា ឆ្នាំ២០១៩។
ការចេញសេចក្តីប្រកាសព័ត៌មាននេះ បន្ទាប់ពីថ្មីៗនេះ មានគណនីហ្វេសប៊ុកឈ្មោះថា "សេវាផ្សេងទៀត" បានបង្ហោះព័ត៌មានដែលមានចរិតបោកប្រាស់ និងបង្ខូចកេរ្តិ៍ឈ្មោះរបស់ក្រសួងអប់រំ ពាក់ព័ន្ធនឹងការទទួលធ្វើសញ្ញាបត្របាក់ឌុប និងបរិញ្ញាបត្រគ្រប់ផ្នែក។
ក្រសួងអប់រំ បញ្ជាក់ថា ខ្លួនកំពុងសហការជាមួយអាជ្ញាធរមានសមត្ថកិច្ចក្នុងការស្វែងរកជនដែលបានបង្ហោះព័ត៌មានខាងលើនេះ ដើម្បីចាត់វិធានការតាមផ្លូវច្បាប់ និងអំពាវនាវឱ្យសាធារណជន និងប្រព័ន្ធផ្សព្វផ្សាយគ្រប់ប្រភេទ ចូលរួមទប់ស្កាត់ការចែកចាយព័ត៌មាននេះតាមគ្រប់រូបភាព ព្រមទាំងសហការផ្តល់ព័ត៌មានជូនសមត្ថកិច្ចក្នុងការឈានទៅកំណត់មុខសញ្ញាជនដែលបានប្រព្រឹត្តអំពើខាងលើ៕