ស្នងការរាជធានី គ្រោងបង្កើតក្រុមកុម៉្មង់ដូ ហើយស្នើឱ្យវៀតណាមជួយបណ្តុះបណ្តាល

2019-05-21 08:12:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានស្នើភាគីវៀតណាម ជួយបណ្ដុះបណ្ដាល និងបំប៉នជំនាញដល់ក្រុមកុម៉្មង់ដូ របស់ស្នងការដ្ឋាននគរបាលរាជធានីភ្នំពេញ ដែលលោកមានបំណងបង្កើតឡើង។ នេះបើតាមការចុះផ្សាយនៅលើទំព័រហ្វេសប៊ុករបស់ស្នងការដ្ឋាននគរបាលរាជធានីភ្នំពេញ។

ការស្នើនេះធ្វើឡើងក្នុងពេលដែលលោកឧត្ដមសេនីយ៍ឯក ស ថេត បានទទួលជួបគណ:ប្រតិភូវៀតណាម ដែលមកបំពេញទស្សនកិច្ចនៅស្នងការដ្ឋាននគរបាលរាជធានីភ្នំពេញ នាព្រឹកថ្ងៃទី២១ ខែឧសភា ឆ្នាំ២០១៩។

រូបថត៖ ហ្វេសប៊ុកស្នងការដ្ឋាននគរបាលរាជធានីភ្នំពេញ

លោក ស ថេត បានថ្លែងថា លោកបានមកកាន់តំណែងជាស្នងការនគរបាលរាជធានីភ្នំពេញ មិនទាន់បាន១ឆ្នាំនៅឡើយទេ ដោយលោកមានបំណងបង្កើតក្រុមកុម៉្មង់ដូដែលមានគ្នាប្រមាណជា៦០នាក់។ ក្រុមកុម៉្មង់ដូនេះ គឺត្រូវចេះរបៀបបាញ់កាំភ្លើងវែង កាំភ្លើងខ្លី និងរបៀបការពារថ្នាក់ដឹកនាំផងដែរ។

នៅចំពោះមុខគណៈប្រតិភូវៀតណាម លោកស្នងការរាជធានីភ្នំពេញ បានស្នើឲ្យទទួលយកសំណើជួយបណ្ដុះបណ្ដាល និងបំប៉នជំនាញដល់ក្រុមកុម៉្មង់ដូនេះ រាយការណ៍ជូនថ្នាក់ដឹកនាំវៀតណាមផង ព្រោះធនធានមនុស្ស និងសម្ភារៈសម្រាប់បំពាក់នោះ គឺខាងស្នងការរាជធានីភ្នំពេញ បានជ្រើសរើស និងបញ្ជាទិញរួចរាល់ហើយ តែនៅខ្វះការបណ្ដុះបណ្ដាលលើជំនាញនេះប៉ុណ្ណោះ។

ចាប់ពីពេលនេះតទៅនៅប្រទេសកម្ពុជា នឹងមានកិច្ចប្រជុំធំៗជាច្រើន ហើយក្រុមកុម៉្មង់ដូនេះទៀតសោត ក៏ជួយបន្ថែមទៀតទៅលើការការពារសន្តិសុខ សណ្ដាប់ធ្នាប់ប្រជាពលរដ្ឋ នៅក្នុងរាជធានីភ្នំពេញ ឲ្យបានកាន់តែល្អប្រសើរថែមទៀតផង។ នេះជាការលើកឡើងបន្ថែមរបស់លោក ស ថេត។

គណ:ប្រតិភូវៀតណាម បានសន្យាថា នឹងយកសំណើនេះទៅរាយការណ៍ជូនថ្នាក់ដឹកនាំរបស់ខ្លួន ដើម្បីពិចារណាទៅលើការជួយបណ្ដុះបណ្ដាល និងបំប៉នជំនាញដល់ក្រុមកុម៉្មង់ដូរបស់ស្នងការដ្ឋាននគរបាលរាជធានីភ្នំពេញ៕

អត្ថបទ៖ សំភី