អ្នកគាំទ្របេក្ខជនប្រធានាធិបតីឥណ្ឌូណេស៊ីចាញ់ឆ្នោត ធ្វើបាតុកម្មប្រឆាំងលទ្ធផលបោះឆ្នោត

2019-05-22 04:02:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមអ្នកគាំទ្របេក្ខជនប្រធានាធិបតីឥណ្ឌូណេស៊ីដែលមិនទទួលជោគជ័យក្នុងការបោះឆ្នោតកាលពីខែមេសាកន្លងទៅ បានធ្វើបាតុកម្មប្រឆាំងនឹងលទ្ធផលបោះឆ្នោត នៅព្រឹកថ្ងៃទី២២ ខែឧសភា ឆ្នាំ២០១៩នេះ ដោយបានប៉ះទង្គិចជាមួយប៉ូលិស និងបានដុតរថយន្តប៉ូលិស ក្រោយការប្រកាសលទ្ធផលផ្លូវការ។

រូបថត៖ AP

ស្ថានភាពនៃការតវ៉ានេះ បានប្រែទៅជាអំពើហិង្សាតាំងពីយប់មិញ នៅពេលដែលបាតុករព្យាយាមហែក្បួនសម្រុកចូលការិយាល័យរបស់ភ្នាក់ងាររៀបចំការបោះឆ្នោតក្នុងក្រុងហ្សាការតា។ ក្នុងនោះ មនុស្ស ២០នាក់ ត្រូវបានចាប់ខ្លួន។

អ្នកនាំពាក្យប៉ូលិសក្រុងហ្សាការតា បានបញ្ជាក់ថា ប៉ូលិសបានប្រើប្រាស់ឧស្ម័នបង្ហូរទឹកភ្នែក និងកាំភ្លើងបាញ់ទឹក ដើម្បីបំបែកហ្វូងបាតុករ ដែលបានគប់ដុំថ្ម និងដបសាំងមកលើប៉ូលិស។ រដ្ឋាភិបាលបានដាក់ពង្រាយកម្លាំង ៥ម៉ឺននាក់ ដើម្បីទប់ទល់នឹងការតវ៉ានេះ។ ចំណែកប្រជាពលរដ្ឋជាច្រើន បានចាកចេញពីទីតាំងនោះ ហើយផ្នែកខ្លះក្នុងក្រុង ក៏ត្រូវបានផ្អាកចរាចរណ៍ផងដែរ។

គណៈកម្មការរៀបចំការបោះឆ្នោតរបស់ឥណ្ឌូណេស៊ី កាលពីថ្ងៃទី២១ ខែឧសភា បានប្រកាសលទ្ធផលបោះឆ្នោតជាផ្លូវការ បង្ហាញថា លោក Joko Widodo បានឈ្នះឆ្នោតធ្វើជាប្រធានាធិបតីអាណត្តិទី២ ជាមួយសំឡេងឆ្នោត ៥៥,៥% នៅក្នុងការបោះឆ្នោតកាលពីថ្ងៃទី១៧ ខែមេសា ឆ្នាំ២០១៩។

អតីតមេបញ្ជាការកងទ័ពពិសេស និងជាបេក្ខជនចូលរួមប្រកួតប្រជែងក្នុងការបោះឆ្នោតនេះ លោក Prabowo Subianto បានបដិសេធមិនទទួលយកលទ្ធផលនេះឡើយ ហើយបានប្រកាសថាខ្លួនជាអ្នកទទួលជ័យជម្នះ។ លោកគ្រោងបន្តប្តឹងជំទាស់លទ្ធផលនេះ ទៅកាន់តុលាការធម្មនុញ្ញទៀតផង ដោយចោទថា មានការក្លែងបន្លំសន្លឹកឆ្នោត ប៉ុន្តែលោកមិនមានភស្តុតាងបញ្ជាក់ឡើយ៕

ប្រភព៖ Khaosod English ប្រែសម្រួល៖ សំភី