កីឡាករថៃ ពេជ្រ មរកត សម្រេចសាងភ្នួស មិនប្រកួតម្ដងទៀតទល់នឹង Petrosyan នោះទេ
- 2019-05-23 07:24:14
- ចំនួនមតិ 0 | ចំនួនចែករំលែក 0
កីឡាករថៃ ពេជ្រ មរកត សម្រេចសាងភ្នួស មិនប្រកួតម្ដងទៀតទល់នឹង Petrosyan នោះទេ
ចន្លោះមិនឃើញ
ដូចដែលប្រិយមិត្តបានដឹងហើយថា ជ័យជម្នះរបស់ប្រដាល់ថៃ Petchmorakot Petchyindee Academy លើអ្នកប្រដាល់អ៊ីតាលី Giorgio Petrosyan នៅក្នុងការប្រកួតដណ្ដើមប្រាក់១លានដុល្លារ ONE Featherweight Kicboxing World Grand Prix នៅសិង្ហបុរី កាលពីថ្ងៃទី១៧ ខែឧសភា ត្រូវចាត់ទុកជាមោឃៈ ក្រោយរកឃើញភាពមិនប្រក្រតីនៃការដាក់ពិន្ទុ (ចុចអាន)។
តាមរយៈសេចក្ដីថ្លែងការណ៍របស់លោក Nuttadaj Vachirarattanawong ប្រធានក្លឹបប្រដាល់ Petchyindee Academy បានឲ្យដឹងថា Petchmorakot ត្រូវទៅសាងភ្នួស ដោយសារមុនពេលប្រកួត កីឡាកររូបនេះ បានសន្យាថានឹងទៅបួសមួយរយៈ ប្រសិនបើឈ្នះ។
សេចក្ដីថ្លែងការណ៍ជាភាសាថៃ របស់លោក Nuttadaj មានខ្លឹមសារជាភាសាខ្មែរ ដូចខាងក្រោម៖
"ខ្ញុំសូមទោសអ្នកគាំទ្រជនជាតិថៃ ដែលមិនពេញចិត្តសេចក្ដីសម្រាប់ ONE Championship ដែលបានរៀបចំឲ្យមានការប្រកួតម្ដងទៀតជាមួយ Giorgio Petrosyan ដោយសារហេតុផលយើងរំលោភច្បាប់នៃការប្រកួត"។
"យើងទាំងអស់គ្នា បានប្រឹងប្រែងអស់ពីលទ្ធភាពសម្រាប់ការប្រកួតនោះ។ យើងធ្វើអ្វីគ្រប់យ៉ាងតាមដែលអាចធ្វើទៅបាន ទោះបីជាដឹងថាយើងចាញ់ប្រៀបគេ បើគិតលើច្បាប់ Kickboxing ដែលបិទមិនឲ្យប្រើកែង និងមិនទុកពេលឲ្យវ៉ៃជង្គង់ច្រើន។ ប៉ុន្តែយើងបានយល់ព្រមចូលរួមក្នុងការប្រកួតនោះ ដោយសារយើងចង់ឈ្នះការប្រកួតប្រជែងថ្មី។ ខ្ញុំចង់បញ្ជាក់ម្ដងទៀតថា យើងសម្រេចចិត្តចូលរួមប្រកួតនាពេលនោះ គឺមិនមែនដោយសារលុយ ៣២លានបាត (១លានដុល្លារ) នោះទេ ព្រោះពេលនោះគ្មានអ្នកណាដឹងពីប្រាក់រង្វាន់នេះទេ រហូតដល់ ៣ថ្ងៃមុនប្រកួត ទើបគេប្រកាស។ ហេតុផលតែមួយគត់ដែលធ្វើឲ្យយើងព្រមប្រកួត គឺដោយសារតែយើងចង់ប្រកួតប្រជែង ចង់ធ្វើឲ្យពលរដ្ឋថៃមានមោទនភាព។ Petrosyan មានបទពិសោធន៍វ៉ៃ Kickboxing រាប់រយប្រកួត ប៉ុន្តែ Petchmorakot ទើបវាយបានម្ដងប៉ុណ្ណោះ"។
"ទោះជាបែបនោះក្ដី យើងនៅតែប្រកួត ដោយមិនបានចចារអ្វីនោះទេ។ យើងព្រមប្រកួតទល់នឹងកំពូលកីឡាករប្រដាល់ Kickboxing បើទោះបីជាយើងនៅកម្រិតក្រោមគេក៏ដោយ"។
"ខ្ញុំមានអារម្មណ៍សោកស្ដាយចំពោះ Petchmorakot។ គាត់ពិតជាបានព្យាយាមអស់ពីលទ្ធភាពដើម្បីជ័យជម្នះនេះ។ គាត់បានហ្វឹកហាត់យ៉ាងខ្លាំងក្លារយៈពេល ២ខែ គាត់រត់ជិត ៤០គីឡូម៉ែត្រ ពីអាកាសយានដ្ឋានសុវណ្ណភូមិ ទៅកាន់ស្ដូបព្រះបរមរូបព្រះមហាក្សត្រជូឡាឡុងកន។ ស្អែកនេះ គាត់នឹងទៅបួសជាព្រះសង្ឃ ដូចអ្វីដែលគាត់ធ្លាប់សន្យាថានឹងទៅបួស ប្រសិនបើឈ្នះ..."។
"យើងជឿជាក់ថា នេះមិនមែនជាកំហុសយើងទេ។ បញ្ហាគឺត្រង់ថា ច្បាប់ក្បួន Kickboxing នៅ ONE Championship មានភាពមិនច្បាស់លាស ចំណែកឯលទ្ធផលប្រកួតក៏បានប្រកាសរួចហើយដែរ។ យើងគួរតែអាចឡើងទៅវគ្គពាក់កណ្ដាលផ្ដាច់ព្រ័ត្រ បើយោងតាមច្បាប់ ប៉ុន្តែក្រុមប្រឹក្សាភិបាលរបស់ ONE សម្រេចចាត់ទុកលទ្ធផលនេះជាមោឃៈ ហើយទាមទារឲ្យប្រកួតសាជាថ្មី បើទោះបីវាមិនមែនជាកំហុសយើងក៏ដោយ"។
"ក្នុងនាមអ្នកតំណាង Petchmorakot Petchyindee Academy ខ្ញុំសូមស្នើដកខ្លួនចេញពីការប្រកួត ONE Featherweight Kicboxing World Grand Prix ព្រោះថា បើយើងព្រមប្រកួតម្ដងទៀត ហើយរឿងដដែលកើតឡើងម្ដងទៀត ក៏គង់តែធ្វើឲ្យអ្នកគាំទ្រ Petrosyan មិនទទួលយកដដែល ដូច្នេះគ្មានហេតុផលណា ដែលយើងអាចឈ្នះការប្រកួតនេះទេ"។
"ជាចុងក្រោយ សូមអរគុណការលើកទឹកចិត្តពីសំណាក់អ្នកគាំទ្រទាំងអស់ ហើយក៏សូមទោស ដែលធ្វើឲ្យប្រជាជនថៃ ខកចិត្ត"៕