ថ្ងៃនេះជាទិវាអណ្តើកពិភពលោក
- 2019-05-23 09:48:03
- ចំនួនមតិ 0 | ចំនួនចែករំលែក 0
ថ្ងៃនេះជាទិវាអណ្តើកពិភពលោក
ចន្លោះមិនឃើញ
ថ្ងៃទី២៣ ខែឧសភា ត្រូវបានជ្រើសរើសជាទិវាអណ្តើកពិភពលោកដើម្បីលើកកម្ពស់ការយល់ដឹងអំពីបញ្ហាប្រឈមនានាដែលក្រុមសណ្តានអណ្តើក (ឬ កច្ឆបសត្វ) កំពុងជួបប្រទះ។
បើតាមការចុះផ្សាយនៅលើទំព័រហ្វេសប៊ុករបស់មជ្ឈមណ្ឌលអង្គរសម្រាប់ការអភិរក្សជីវចម្រុះ (ACCB) បានឱ្យដឹងថា ក្នុងចំណោមកច្ឆបសត្វទាំង៣៦០ប្រភេទដែលមាននៅទូទាំងសកលលោក មានជាងពាក់កណ្តាលហើយដែលកំពុងប្រឈមមុខនឹងការវិនាសផុតពូជ មូលហេតុបណ្តាលមកពីការបាត់បង់ទីជម្រក ការបរិភោគសាច់អណ្តើក ការយកអណ្តើកមកចិញ្ចឹមលេង និងកត្តាបម្រែបម្រួលអាកាសធាតុ។
ប្រទេសកម្ពុជាមានអណ្តើក និងកន្ធាយទឹកសាបរស់នៅសរុប ១៤ប្រភេទ ដែលនេះមានន័យថាកម្ពុជា ជាប្រទេសដ៏សំខាន់មួយក្នុងតំបន់អាស៊ីអាគ្នេយ៍ក្នុងការអភិរក្សកច្ឆបសត្វ។
ការងារចម្បងមួយរបស់មជ្ឈមណ្ឌលនេះ គឺផ្តោតទៅលើការអភិរក្សកច្ឆបសត្វ។ សព្វថ្ងៃ មជ្ឈមណ្ឌលមានអណ្តើកសរុបប្រមាណ ១០ប្រភេទ និងគិតជាចំនួនមានជាង ៥០០ក្បាល ក្នុងនោះ បានបង្កាត់ពូជអណ្តើក២ប្រភេទបានដោយជោគជ័យ ដែលជាលទ្ធផល ទទួលបានកូនពី ២០០ ទៅ ៣០០ក្បាល ពីការបង្កាត់នេះ។ ជំហានបន្ទាប់គឺការព្រលែងកូនដែលបានពីការបង្កាត់ទាំងនោះ ចូលទៅក្នុងជម្រកធម្មជាតិវិញ ដែលកម្មវិធីព្រលែងនេះ មជ្ឈមណ្ឌលរំពឹងថានឹងអាចធ្វើឡើងក្នុងរយៈកាលបុន្មានឆ្នាំដ៏ខ្លីខាងមុខនេះ ។
បន្ថែមពីលើនេះ មជ្ឈមណ្ឌលក៏ដើរតួជាទីតាំងសង្គ្រោះ និងស្តារនីតិសម្បទា កច្ឆបសត្វផងដែរ។ កាលពីសប្តាហ៍មុននេះ ក្រោមការសហការជាមួយក្រុមការងារមកពីរដ្ឋបាលជលផល អង្គការសមាគមអភិរក្សសត្វព្រៃ និងមជ្ឈមណ្ឌលអភិរក្សអណ្តើក និងកន្ធាយមេគង្គ ACCB បានជួយសង្គ្រោះកន្ធាយក្បាលកង្កែប ឬរមិចមួយក្បាល។
កន្ធាយជំទង់នេះបានលេបផ្លែសន្ទូចចូលទៅជាប់ជ្រៅក្នុងបំពង់ក។ នៅពេលមកដល់មជ្ឈមណ្ឌល ពេទ្យសត្វបានចាក់ថ្នាំឲ្យកន្ធាយសន្លប់ និងដកយកផ្លែសន្ទូចចេញពីបំពង់ក បានដោយជោគជ័យ ។
នៅក្នុងបញ្ជីក្រហមរបស់អង្គការសហព័ន្ធអន្តរជាតិដើម្បីការអភិរក្សធម្មជាតិ IUCN កន្ធាយក្បាលកង្កែបត្រូវបានចាត់ចូលជា «ប្រភេទដែលកំពុងរងគ្រោះជិតផុតពូជ»។ ក្នុងរយៈពេលដ៏ខ្លីខាងមុខនេះ វានឹងត្រូវធ្លាក់ជា «ប្រភេទដែលកំពុងរងគ្រោះជិតផុតពូជខ្លាំង»។ កម្ពុជាដើរតួជាប្រទេសដ៏សំខាន់មួយសម្រាប់ការអភិរក្សកន្ធាយក្បាលកង្កែប៕