តៃវ៉ាន់ ផ្លាស់ប្តូរឈ្មោះស្ថានទូតនៅអាមេរិក ដោយមិនខ្លាចចិន
- 2019-05-25 08:20:53
- ចំនួនមតិ 0 | ចំនួនចែករំលែក 0
តៃវ៉ាន់ ផ្លាស់ប្តូរឈ្មោះស្ថានទូតនៅអាមេរិក ដោយមិនខ្លាចចិន
ចន្លោះមិនឃើញ
ក្រសួងការបរទេសតៃវ៉ាន់ បានប្រកាសនៅថ្ងៃទី២៥ ខែឧសភា ឆ្នាំ២០១៩ថា ស្ថានទូតរបស់ខ្លួនប្រចាំនៅអាមេរិក (ស្ថានទូតមិនពេញលក្ខណៈ de-facto embassy) ត្រូវបានផ្លាស់ប្តូរឈ្មោះពី «ក្រុមប្រឹក្សាសម្របសម្រួលទទួលបន្ទុកកិច្ចការអាមេរិកខាងជើង» ទៅជាការប្រើឈ្មោះចំៗគឺ «ក្រុមប្រឹក្សាតៃវ៉ាន់ ទទួលបន្ទុកកិច្ចការសហរដ្ឋអាមេរិក»។
ក្រសួងនេះបញ្ជាក់ថា ការផ្លាស់ប្តូរឈ្មោះ គឺដើម្បីបង្ហាញពីទំនាក់ទំនងកាន់តែរឹងមាំរវាងតៃវ៉ាន់ និងអាមេរិក។
គួរកត់សម្គាល់ដែរថា កាលពីពេលថ្មីៗនេះ ស្ថានទូតអាមេរិក (មិនផ្លូវការ) ប្រចាំនៅតៃវ៉ាន់ បានផ្លាស់ប្តូរទីតាំងទៅកាន់កន្លែងថ្មី នៅជាយក្រុងតៃប៉ិ ដើម្បីសង់អគារស្ថានទូតឱ្យកាន់តែធំជាងមុន។ អាមេរិក ក៏កំពុងពិចារណា លក់អាវុធថ្មីៗឱ្យតៃវ៉ាន់ថែមទៀតផងដែរ ដោយរួមមានទាំងយន្តហោះចម្បាំង និងរថក្រោះជាដើម។
ចិន ដែលតែងតែចាត់ទុកតៃវ៉ាន់ជាខេត្តមួយរបស់ខ្លួន បានប្រឆាំងដាច់ខាតចំពោះទំនាក់ទំនងការទូត និងយោធាផ្លូវការណាមួយរវាងក្រុងតៃប៉ិ និងក្រុងវ៉ាស៊ីងតោន។ ក្រុងប៉េកាំង ក៏បានគំរាមប្រើយោធា ប្រសិនបើតៃវ៉ាន់ហ៊ានប្រកាសឯករាជ្យផងដែរ។
អាមេរិក បានផ្អាកទំនាក់ទំនងការទូតផ្លូវការជាមួយតៃវ៉ាន់ កាលពីឆ្នាំ១៩៧៩ ដើម្បីបង្កើតមិត្តភាពជាមួយចិន ក្រោមគោលនយោបាយចិនមួយ ខណៈដែលប្រទេសទាំង២ កំពុងប្រជែងគ្នាជាមួយអតីតសហភាពក្នុងអំឡុងសង្គ្រាមត្រជាក់៕