ចំនួនទេសចរចិន ទៅអាមេរិកធ្លាក់ចុះជាលើកដំបូង

2019-05-28 09:44:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចំនួនអ្នកទេសចរមកពីប្រទេសចិន ទៅអាមេរិក នៅក្នុងឆ្នាំ២០១៨ មានចំនួន ២,៩លាននាក់ ដោយចំនួននេះ បានធ្លាក់ចុះ ៥,៧% ពោលគឺបានធ្លាក់ចុះលើកដំបូងចាប់តាំងពីឆ្នាំ២០០៣មក។ នេះបើតាមការចុះផ្សាយរបស់ Aljazeera នៅថ្ងៃទី២៨ ខែឧសភា ឆ្នាំ២០១៩ ដែលដកស្រង់ចេញពីការិយាល័យទេសចរណ៍ជាតិរបស់អាមេរិក។

រូបថត៖ AP

ការប៉ះទង្គិចគ្នារវាងអាមេរិក និងចិន ក្នុងសង្គ្រាមពាណិជ្ជកម្ម អាចជាហេតុផល១នៃការធ្លាក់ចុះចំនួនទេសចរនេះ។ ប្រទេសទាំង២ បានចាប់ផ្តើមដំឡើងពន្ធនាំចូលដាក់គ្នាជាបន្តបន្ទាប់តាំងពីឆ្នាំ២០១៨មក។

កាលពីឆ្នាំមុន ចិនបានចេញសេចក្តីប្រកាសព្រមានដល់ពលរដ្ឋរបស់ខ្លួន ក្នុងការធ្វើដំណើរទៅអាមេរិក ឱ្យប្រយ័ត្នចំពោះការបាញ់ប្រហារ ចោរប្លន់ និងការចំណាយថ្លៃព្យាបាលខ្ពស់ជាដើម។ ចំណែកអាមេរិកវិញ ក៏បានព្រមានដល់ពលរដ្ឋរបស់ខ្លួន ក្នុងការធ្វើដំណើរទៅចិនវិញផងដែរ។

គួររំលឹកថា កាលពីឆ្នាំ២០០០ អាមេរិក ទទួលបានទេសចរចិន ប្រមាណ ២៤៩ ០០០នាក់ (ជិត ២៥ម៉ឺននាក់)។ ចំនួននេះបានកើនឡើង៣ដង ដល់ជាង ៨០ម៉ឺននាក់ ត្រឹមឆ្នាំ២០១០ ហើយបានកើនឡើង ៣ដងម្តងទៀតនៅឆ្នាំ២០១៥ ដោយឡែកឆ្នាំ២០១៦ និង២០១៧ ទទួលបានជាង ៣លាននាក់។ ការកើនឡើងនេះ ដោយសារតែប្រជាជនចិន មានចំណូលកាន់តែខ្ពស់ ការតភ្ជាប់ផ្លូវអាកាស និងការបន្ធូរបន្ថយលើទិដ្ឋាការជាដើម។ នេះបើតាមរបាយការណ៍របស់ក្រុមហ៊ុនក្រុមប្រឹក្សា McKinsey៕

ប្រភព៖ Aljazeera ប្រែសម្រួល៖ សំភី