សម្តេច ហ៊ុន សែន ថាការខ្វះភ្លើងឆ្នាំនេះជាមេរៀន ហើយឆ្នាំក្រោយ ភ្នំពេញមិនខ្វះភ្លើងទេ

2019-06-03 03:19:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានថ្លែងថា ការខ្វះភ្លើងប្រើប្រាស់ក្នុងឆ្នាំ២០១៩នេះ គឺជាមេរៀនសម្រាប់កម្ពុជា ខណៈប្រទេសនេះ ពឹងផ្អែកខ្លាំងលើប្រភពថាមពលវារីអគ្គិសនី ដែលជួបបញ្ហាខ្វះខាតទឹក ក្នុងការផលិតអគ្គិសនីនារដូវប្រាំងកន្លងទៅថ្មីៗនេះ។ ការថ្លែងនេះ ធ្វើឡើងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ នាព្រឹកថ្ងៃទី៣ ខែមិថុនា ឆ្នាំ២០១៩ នៅកោះពេជ្រ។

សម្តេច ហ៊ុន សែន ថ្លែងនាពេលកន្លងមក

សម្តេចបានលើកឡើងយ៉ាងដូច្នេះថា៖ «**យើងនៅមានបញ្ហាទាក់ទិនជាមួយនឹងការខ្វះទឹកទៅលើការប្រើប្រាស់វារីអគ្គិសនី ដែលធ្វើឱ្យវារីអគ្គិសនីរបស់យើង គ្មានស្ថិរភាពនៅក្នុងការផ្គត់ផ្គង់។ ឆ្នាំនេះជាបទពិសោធន៍ផ្តល់មេរៀនឱ្យយើងច្រើន ដែលយើងត្រូវខិតខំរកវិធីដោះស្រាយ ដើម្បីកុំឱ្យជួបបញ្ហាច្រំដែលនៅឆ្នាំខាងមុខ**»។

សម្តេច ហ៊ុន សែន បន្តថា៖ «វារីអគ្គិសនីរបស់យើងមានកម្លាំងប្រមាណជិត ១៤០០មេហ្គាវ៉ាត់ ក៏ប៉ុន្តែផលិតថ្ងៃខ្លះបានត្រឹមតែ ១០០ ឬ ២០០មេហ្គាវ៉ាត់ទេ។ យប់មិញនេះ បានទៅដល់ ៦០០មេហ្គាវ៉ាត់ ឃើញថាគ្រាន់បើបន្តិច ប៉ុន្តែមិនបានគ្រប់ម៉ោងនោះទេ»។

ប្រមុខរាជរដ្ឋាភិបាលបញ្ជាក់ថា រាជធានីភ្នំពេញត្រូវតែត្រៀមអគ្គិសនី ៤០០មេហ្គាវ៉ាត់ទុក។ ក្នុងនោះ ភ្លើង (ថាមពលអគ្គិសនីដើរដោយប្រេងខ្មៅ) ២០០មេហ្គាវ៉ាត់ នឹងត្រូវទិញពីហ្វាំងឡង់ និង២០០មេហ្គាវ៉ាត់ទៀត ទិញពីអាល្លឺម៉ង់ ត្រឹមខែតុលាខាងមុខនេះ។ ការត្រៀមទុកនេះ គឺប្រើក្នុងពេលដែលវារីអគ្គិសនីបញ្ចេញថាមពលមិនគ្រប់ ខណៈដែលតម្រូវការភ្លើងក្នុងរាជធានីភ្នំពេញ កើនដល់ជាង ១ពាន់មេហ្គាវ៉ាត់។ «ឆ្នាំក្រោយគឺភ្នំពេញ គ្មានហេតុផលនិយាយថា ខ្វះអគ្គិសនី ហើយត្រូវកាត់ទេ»៕

អត្ថបទ៖ សំភី