សម្តេច ហ៊ុន សែន អរគុណឡាវ ដែលលក់អគ្គិសនីឱ្យកម្ពុជា

2019-06-04 07:15:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានថ្លែងអំណរគុណដល់ភាគីឡាវ ដែលឆ្នាំនេះបានលក់ថាមពលអគ្គិសនីឱ្យកម្ពុជា បានចំនួន១៨មេហ្គាវ៉ាត់ ដោយថាមពលអគ្គិសនីនេះ កំពុងតែត្រូវបានប្រើប្រាស់នៅខេត្តកំពង់ធំ និងខេត្តព្រះវិហារ។ សម្តេចថ្លែងដូច្នេះ ទៅកាន់លោក សន សៃស៊ីផាន់ដន ឧបនាយករដ្ឋមន្ត្រីឡាវ ក្នុងជំនួបពិភាក្សាការងារនាព្រឹកថ្ងៃទី៤ ខែមិថុនា ឆ្នាំ២០១៩ នៅវិមានសន្តិភាព។

រូបថត៖ ហ្វេសប៊ុកសម្តេច ហ៊ុន សែន

សម្តេច ហ៊ុន សែន ក៏បានមានប្រសាសន៍ណែនាំ ក៏ដូចជាផ្តល់នូវអនុសាសន៍ផងដែរថា ទំហំពាណិជ្ជកម្មកម្ពុជា និងឡាវ គួរជំរុញឱ្យកាន់តែធំថែមទៀត ជាពិសេសវិស័យទេសចរណ៍ វិស័យវប្បធម៌ និងវិស័យវិនិយោគ ក៏ដូចជាវិស័យសេដ្ឋកិច្ចផង។ លើសពីនោះទៀត ក៏មិនត្រូវកាត់ផ្ដាច់ពីវិស័យថាមពលផងដែរ ដោយសម្ដេច លើកឡើងថា គួរយកវិស័យថាមពលជាវិស័យអាទិភាពសម្រាប់កិច្ចសហប្រតិបត្តិការរវាងប្រទេសទាំងពីរ។

ក្នុងជំនួបនេះ លោកឧបនាយករដ្ឋមន្រ្តីឡាវ បាននិយាយថា ដំណើរទស្សនកិច្ចរបស់លោកមកកម្ពុជានាពេលនេះ គឺដើម្បីសិក្សាស្វែងយល់ និងដកស្រង់បទពិសោធន៍អំពីការអភិវឌ្ឍកម្ពុជា ដើម្បីយកទៅអនុវត្តនៅប្រទេសឡាវ។ ទន្ទឹមនឹងនេះ លោកក៏បានកត់សម្គាល់ផងដែរថា កម្ពុជាបច្ចុប្បន្ន មានការរីកចម្រើនយ៉ាងខ្លាំង ជាពិសេសអគារខ្ពស់ៗបានរីកស្គុះស្គាយ ហើយជីវភាពប្រជាពលរដ្ឋក៏មានភាពល្អប្រសើរឡើង។

លោក សន សៃស៊ីផាន់ដន ក៏បានអរគុណ រាជរដ្ឋាភិបាលកម្ពុជាដែលបានគាំទ្រដល់វិនិយោគគិនឡាវនៅកម្ពុជា ជាពិសេស ធនាគារឡាវ BIC ក៏ដូចជាអ្នកវិនិយោគផ្សេងៗ និងការគាំទ្រដល់ការទិញថាមពលអគ្គិសនីពីប្រទេសឡាវផងដែរ៕

អត្ថបទ៖ សំភី