ជម្រើសជាតិឈុតធំវៀតណាម ឈ្នះថៃ ជាលើកដំបូង ក្នុងរយៈពេល ១០ឆ្នាំ ដោយគ្រាប់បាល់ចុងម៉ោងបំផុត

2019-06-06 02:05:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមវៀតណាម បានយកឈ្នះម្ចាស់ផ្ទះថៃ ក្នុងលទ្ធផល ១-០ ក្នុងវគ្គពាក់កណ្តាលផ្តាច់ព្រ័ត្រពានរង្វាន់ King Cup កាលពីយប់មិញ។ ១គ្រាប់នេះ ជាការតែតបញ្ចូលទីដោយកីឡាករ Nguyen Anh Duc នៅនាទី៩៣+ ខណៈម៉ោងបន្ថែម ៤នាទី បន្ទាប់ពីចប់ ៩០នាទីបានត្រឹម ០-០។

គួរកត់សម្គាល់ថា លទ្ធផលនេះ បានធ្វើឱ្យជម្រើសជាតិឈុតធំវៀតណាម ស្គាល់ជ័យជម្នះលើកដំបូងទៅលើក្រុមដំរីថៃ ដែលត្រូវបានចាត់ទុកថា ជាក្រុមដ៏ខ្លាំងបំផុតក្នុងតំបន់អាស៊ាន ក្នុងរយៈពេល ១០មកនេះ។ វៀតណាម បានយកឈ្នះថៃ ចុងក្រោយបំផុត ក្នុងលទ្ធផល ២-១ កាលពីខែធ្នូ ឆ្នាំ២០០៨ ក្នុងពាន Suzuki Cup។

ក្រោមការដឹកនាំរបស់លោក Park Hang-seo វៀតណាម បានយកឈ្នះថៃ ២ដង គឺការប្រកួតខាងលើនេះមួយ និងមួយទៀត កម្រិត U23 ដែលវៀតណាម បានបំបាក់ ថៃ ៤-០ ក្នុងវគ្គជម្រុះ AFC U23 កាលពីខែមីនាកន្លងទៅ។

លោក Park Hang-seo (រូបថត៖ VN Express)

លោក Park បានថ្លែងថា នេះមិនមែនជាការប្រកួតដែលមានលក្ខណៈពិសេសជាងការប្រកួតផ្សេងទៀតឡើយ ពោលគឺក្រុមលោកមិនខ្វល់ថាតើគូប្រកួតជានរណានោះទេ គឺក្រុមតែងតែខំប្រឹងប្រែងលេងឱ្យបានល្អបំផុត ដើម្បីទទួលជ័យជម្នះ។

លោកបន្តថា វៀតណាមនៅតែជាក្រុមឆ្នើមក្នុងតំបន់ ហើយកីឡាករនឹងបន្តអភិវឌ្ឍថែមទៀត។ «ថៃជាក្រុមនៅតែខ្លាំង។ ខ្ញុំជៀជាក់ថា ក្រុមទាំង២ នឹងបន្តប្រកួតប្រជែង និងរីកចម្រើនទាំងអស់គ្នា»។

ដោយឡែកគ្រូបង្វឹកក្រុមថៃវិញ លោក Sirisak Yodyardthai បាននិយាយថា ក្រុមលោកគឺគ្មានសំណាងឡើយក្នុងការប្រកួតនេះ។ លោកបានបង្ហាញការខកចិត្តដែលថៃ បានបង្កើតឱកាសជាច្រើនប៉ុន្តែមិនអាចរកគ្រាប់បាល់បាន ហើយថែមទាំងរបូត១គ្រាប់នៅចុងម៉ោងថែមទៀត។

លោកថ្លែងថា៖ «វាពិបាកនឹងពន្យល់ណាស់ ប៉ុន្តែវាគឺជាបាល់ទាត់។ ខ្ញុំបានប្រាប់កីឡាកររបស់ខ្ញុំ ឱ្យរឹងមាំឡើងវិញ បន្ទាប់ពីចាញ់ការប្រកួតនេះ ហើយត្រៀមសម្រាប់ប្រកួតយកលេខ៣ ជាមួយឥណ្ឌា»។

វៀតណាម ដែលជាជើងឯង AFF Suzuki Cup 2018នឹងត្រូវប្រកួតវគ្គផ្តាច់ព្រ័ត្រ King Cup ជាមួយក្រុម គូរ៉ាកាវ (Curacao) នៅថ្ងៃទី៨ ខែមិថុនាខាងមុខនេះ ខណៈថៃ នឹងប៉ះឥណ្ឌា ដណ្តើមយកចំណាត់ថ្នាក់ទី៣ នៅថ្ងៃជាមួយគ្នានោះ៕

សូមទស្សនាវីដេអូហាយឡាយ៖