លោក ប្រាយុទ្ធ និយាយអ្វីខ្លះ ក្រោយជាប់ឆ្នោតបន្តធ្វើជានាយករដ្ឋមន្រ្តីថៃ?

2019-06-06 09:03:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាយុទ្ធ ចាន់អូចា បានសម្តែងអំណរគុណដល់សភាដែលបានបោះឆ្នោតផ្តល់សេចក្តីទុកចិត្តឱ្យលោកធ្វើជានាយករដ្ឋមន្រ្តីថៃអាណត្តិថ្មីនេះ។ នេះបើតាមការឱ្យដឹងពីអ្នកនាំពាក្យរងរដ្ឋាភិបាលថៃ លោក Werachon Sukondhapatipak នៅថ្ងៃទី៦ ខែមិថុនា ឆ្នាំ២០១៩ ដែលត្រូវបានដកស្រង់ដោយសារព័ត៌មាន Bangkok Post។

លោក ប្រាយុទ្ធ ពេលចាកចេញពីវិមានរដ្ឋាភិបាលថៃ ក្នុងក្រុងបាងកក កាលពីថ្ងៃទី៥ ខែមិថុនា ឆ្នាំ២០១៩។ រូបថត៖ Reuters

អ្នកនាំពាក្យរូបនេះបានបញ្ជាក់យ៉ាងដូច្នេះថា៖ «**លោកនាយករដ្ឋមន្រ្តី បានសង្កត់ធ្ងន់ថា ការបោះឆ្នោតភាគច្រើនដំបូងចេញពីសភា បន្ទាប់មកជាមួយសំឡេងឆ្នោតពីព្រឹទ្ធសភា ដោយបង្កើតសំឡេងសរុប ៥០០សំឡេង។ នេះគឺស្របទៅតាមច្បាប់**»។

លោក ប្រាយុទ្ធ ក៏បានអរគុណផងដែរដល់សមាជិកសភាមួយចំនួន ដែលបំពេញការងារបានយ៉ាងល្អ បើទោះជាមិនបានបោះឆ្នោតគាំទ្រលោកក៏ដោយ។ លោកក៏អរគុណផងដែរ ដល់ប្រជាពលរដ្ឋថៃ ដែលបានចូលរួមក្នុងការបោះឆ្នោតកន្លងទៅនេះ។

បើតាមអ្នកនាំពាក្យដដែលនេះ ឱ្យដឹងបន្តថា លោក ប្រាយុទ្ធ បានសន្យាថា នឹងធ្វើការងារឱ្យបានល្អបំផុតសម្រាប់ជាតិ សាសនា ព្រះមហាក្សត្រ និងប្រជាជន។ «ចាប់ពីពេលនេះតទៅ អ្នករាល់គ្នាគួររួមសហការគ្នា ដើម្បីផលប្រយោជន៍ប្រទេស និងប្រជាជន។ នៅមានបញ្ហាជាច្រើនដែលមិនទាន់ត្រូវបានដោះស្រាយ។ មេរៀនពីអតីតកាល គួរតែយកមកកែលម្អសម្រាប់បច្ចុប្បន្ន»។

លោកនាយករដ្ឋមន្រ្តីបន្ថែមថា ប្រជាជនគួរតែចូលរួមក្នុងកំណែទម្រង់នយោបាយ និងរដ្ឋបាល ដើម្បីផលប្រយោជន៍ជាតិ។

សូមជម្រាបថា កាលពីយប់ថ្ងៃទី៥ ខែមិថុនា ឆ្នាំ២០១៩ លោក ប្រាយុទ្ធ ត្រូវបានសភាទាំងពីររបស់ថៃ បោះឆ្នោតផ្តល់សេចក្តីទុកចិត្តធ្វើជានាយករដ្ឋមន្រ្តី។ ក្នុងនោះ សមាជិកព្រឹទ្ធសភាថៃ ចំនួន ២៤៩រូបក្នុងចំណោម ២៥០រូប និងសមាជិកសភា ២៥១រូប ក្នុងចំណោម ៤៩៧រូប បានបោះឆ្នោតគាំទ្រលោក៕

ប្រភព៖ Bangkokpost ប្រែសម្រួល៖ សំភី