ក្រោយផ្ទុះប្រតិកម្មខ្លាំង ប្រមុខការទូតកម្ពុជា និងសិង្ហបុរី សន្ទនាគ្នាតាមទូរសព្ទ
- 2019-06-08 01:00:57
- ចំនួនមតិ 0 | ចំនួនចែករំលែក 0
ក្រោយផ្ទុះប្រតិកម្មខ្លាំង ប្រមុខការទូតកម្ពុជា និងសិង្ហបុរី សន្ទនាគ្នាតាមទូរសព្ទ
ចន្លោះមិនឃើញ
លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានទទួលទូរសព្ទ និងសន្ទនាជាមួយលោក Vivian Balakrishnan រដ្ឋមន្ត្រីក្រសួងការបរទេសសិង្ហបុរី ទាក់ទងនឹងករណីសារតាមទំព័រ Facebook របស់លោក Lee Hsien Loong នាយករដ្ឋមន្ត្រីសិង្ហបុរី ដែលបានលើកឡើងពាក់ព័ន្ធនឹងវត្តមានកងទ័ពវៀតណាមនៅកម្ពុជា ក្រោយរបបខ្មែរក្រហម។ នេះបើយោងតាមសេចក្តីប្រកាសព័ត៍មានរបស់ក្រសួងការបរទេស និងសហប្រតិបត្តិការអន្តរជាតិ នារសៀលថ្ងៃទី០៧ ខែមិថុនា ឆ្នាំ២០១៩។
រដ្ឋមន្ត្រីការបរទេស Vivian បានបញ្ជាក់អះអាងថា ពុំមានចេតនាមិនល្អណាមួយ ក្នុងសារខាងលើនេះទេ។ សារនោះ គឺមានបំណងគ្រាន់តែរំលឹកពីស្ថានភាព និងការប្រឈមក្នុងសម័យកាលនោះ ហើយក៏ធ្លាប់បានផ្សព្វផ្សាយជាសាធារណៈក្នុងពេលកន្លងមកដែរ។
ជាមួយគ្នានេះ រដ្ឋមន្រ្តីការបរទេស Vivian បានរំលឹកពីសេចក្តីប្រកាសរួមរបស់អាស៊ាននៅក្នុងក្រុមប្រឹក្សាសន្តិសុខ អ.ស.ប ក្នុងឆ្នាំ១៩៧៩ ដែលបានអះអាងពីសិទ្ធិស្វ័យសម្រេចរបស់ប្រជាជនកម្ពុជាចំពោះអនាគតរបស់ខ្លួន។
រដ្ឋមន្ត្រីការបរទេស Vivian បានបញ្ជាក់ថា សិង្ហបុរីចង់បានតែសន្តិភាព និងវិបុលភាពសម្រាប់កម្ពុជាតែប៉ុណ្ណោះ ពុំមានបំណងណាមួយគាំទ្រខ្មែរក្រហម ហើយមិនចង់ឃើញរបបនេះវិលត្រឡប់មកកម្ពុជាវិញទេ។ សូមកុំឱ្យមានការសង្ស័យអ្វីលើភាពស្មោះត្រង់នេះ។
រដ្ឋមន្ត្រីទាំងពីរយល់ថា ទោះបីប្រទេសយើងទាំងពីរមានទស្សនវិស័យខុសគ្នាស្តីពីប្រវត្តិសាស្ត្រយ៉ាងណាក៏ដោយ ក៏ប្រទេសទាំងពីរនៅបន្តជាអ្នកជិតខាងល្អ ជាមិត្តដ៏ល្អនឹងគ្នា ហើយខិតខំបំភ្លេចអតីតកាល ដើម្បីបន្តរក្សាការសន្ទនា និងទំនាក់ទំនងល្អជាមួយគ្នាតទៅទៀត។
រដ្ឋមន្ត្រីការបរទេសទាំងពីរជឿជាក់ថា ជំនួបរវាងនាយករដ្ឋមន្ត្រីទាំងពីរនៅក្នុងឱកាសនៃកិច្ចប្រជុំកំពូល ASEAN នាពេលដ៏ខ្លីខាងមុខ នឹងផ្តល់ឱកាសឱ្យភាគីទាំងពីរយល់គ្នាឱ្យកាន់តែច្បាស់ រួមគ្នាពង្រឹងថែមទៀតនូវចំណងមិត្តភាព និងសហប្រតិបត្តិការល្អប្រសើររវាងកម្ពុជានិងសិង្ហបុរី ក៏ដូចជាជាមួយបណ្តាប្រទេសសមាជិកអាស៊ានទាំងអស់ ដើម្បីសន្តិភាព ស្ថិរភាព និងការរីកចម្រើនក្នុងតំបន់ និងពិភពលោក។
កម្ពុជាប្រកាន់ជំហរមិនឆ្កឹះអតីតកាលដើម្បីបង្កអន្តរាយដល់បច្ចុប្បន្នកាល និងអនាគតកាលឡើយ។ ប្រទេសទាំងពីរខិតខំរួមគ្នាធ្វើការជាមួយប្រទេសនៅអាស៊ីអាគ្នេយ៍ផ្សេងទៀត ដើម្បីកសាងសមាគមប្រជាជាតិអាស៊ីអាគ្នេយ៍ (ASEAN) មួយ ឯកភាព និងរឹងមាំ ដែលនេះគឺជាបំណងប្រាថ្នារបស់មេដឹកនាំ និងប្រជាជន ASEAN ទាំងមូល៕