សាលា ៣ខ្នងនៅកំពង់ឆ្នាំង ត្រូវបំផ្លាញទាំងស្រុង ដោយសារអគ្គិភ័យ

2019-06-10 00:11:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សាលាមេត្តេយសិក្សា និងបឋមសិក្សា ចំនួន៣ខ្នង ត្រូវអគ្គិភ័យឆេះបំផ្លាញទាំងស្រុង កាលពីវេលាម៉ោង១០:៣០នាទីព្រឹក ថ្ងៃទី៩ ខែមិថុនា ឆ្នាំ២០១៩ ស្ថិតនៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង។

សមត្ថកិច្ចបានឲ្យដឹងថា អគ្គិភ័យនេះបានឆេះអគារសិក្សាចំនួន ៣ខ្នង ក្នុងនោះ មានសាលាមេត្តេយចំនួន ១ខ្នង មាន១បន្ទប់ ដែលមានទំហំ ១២ម៉ែត្រ ទទឹង ៧ម៉ែត្រ ធ្វើពីឈើប្រក់ស័ង្កសី។ សាលាបឋមសិក្សាមានចំនួន ២ខ្នង ៦បន្ទប់ ធ្វើពីឈើដំបូលប្រក់ស័ង្កសីដូចគ្នា។ អគ្គិភ័យនេះ បានបំផ្លាញនូវសម្ភារៈ និងផ្ទាំងសូឡា ៨ផ្ទាំង អាគុយ ៧គ្រឿង កង្ហាចំនួន ១៣គ្រឿង តុគ្រូ ៣ តុសិស្សចំនួន ១១៣ និងសម្ភារៈសិក្សាមួយចំនួនទៀត។

ប្រភពពីប្រជាពលរដ្ឋដែលស្ថិតនៅក្បែរកន្លែងកើតហេតុ បានឲ្យដឹងថា គាត់មិនដឹងភ្លើងនេះ ឆេះពីមូលហេតុអ្វីពិតប្រាកដនោះទេ ប៉ុន្តែនៅមុនពេលកើតហេតុ គេឃើញមានផ្សែងខ្មួលខ្មាញ់ចេញពីអគារសាលា ហើយក៏បានឆេះយ៉ាងសន្ធោសន្ធៅតែម្តង ដែលមិនអាចជួយបានទាន់ពេលវេលានោះទេ។

បើតាមការសន្និដ្ឋានរបស់ប្រជាពលរដ្ឋនៅទីនោះ មូលហេតុដែលបណ្តាលឲ្យឆេះអគារសាលានេះ គឺអាចបណ្តាលមកពីឆ្លងចរន្តបន្ទះសូឡា។ នៅពេលនេះ សមត្ថកិច្ចកំពុងធ្វើការស្រាវជ្រាវ ដើម្បីដឹងពីមូលហេតុពិត ដែលបណ្តាលឲ្យឆេះសាលានេះ៕