តើវៀតណាម នឹងធ្វើអ្វីមុនគេ ក្រោយឈ្នះអាសនៈនៅក្រុមប្រឹក្សាសន្តិសុខ UN?

2019-06-10 03:23:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសវៀតណាម ត្រូវបានបោះឆ្នោតជ្រើសរើសឱ្យធ្វើជាសមាជិកមិនអាចិន្រ្តៃយ៍របស់ក្រុមប្រឹក្សាសន្តិសុខអង្គការសហប្រជាជាតិ សម្រាប់អាណត្តិ ២០២០-២០២១ ដោយសំឡេងយល់ព្រម ១៩២ លើ ១៩៣សំឡេង។ ការបោះឆ្នោតនេះ ធ្វើឡើងក្នុងមហាសន្និបាតអង្គការសហប្រជាជាតិលើកទី៧៣ កាលពីថ្ងៃទី៧ ខែមិថុនា ឆ្នាំ២០១៩។ នេះក៏ជាលើកទី២ ដែលវៀតណាម ឈ្នះអាសនៈនេះផងដែរ បន្ទាប់ពីលើកទី១ ក្នុងអាណត្តិ ២០០៨-២០០៩។

តើអ្វីជាអាទិភាពសម្រាប់វៀតណាមក្នុងអំឡុងអាណត្តិថ្មីរបស់ខ្លួននៅក្រុមប្រឹក្សាសន្តិសុខ UN?

លោក Pham Binh Minh ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម បានថ្លែងបញ្ជាក់ទៅកាន់សារព័ត៌មានក្នុងស្រុកយ៉ាងដូច្នេះថា៖

រូបថត៖ Vietnam News

-ក្រុមប្រឹក្សាសន្តិសុខ UN គឺជាស្ថាប័នដ៏សំខាន់បំផុតដែលមានទំនួលខុសត្រូវចម្បងសម្រាប់កិច្ចការសកល ជាពិសេសសន្តិភាព និងស្ថិរភាព ហើយការចូលរួមចំណែករបស់វៀតណាមជាមួយក្រុមប្រឹក្សានេះ នឹងស្របតាមរបៀបវារៈរបស់ UN។

-អាទិភាពរបស់វៀតណាម ក្នុងអំឡុងជាសមាជិកសម្រាប់អាណត្តិ ២០២០-២១ នឹង ជំរុញពហុភាគីនិយម និងការប្រព្រឹត្តស្របតាមច្បាប់អន្តរជាតិ ក្នុងការដោះស្រាយបញ្ហាសកល។

-វៀតណាម ក៏ចង់ចែករំលែកពីបទពិសោធន៍អតីតកាលរបស់ខ្លួន ដើម្បីដោះស្រាយកង្វល់ធំៗ ដូចជា ការសាងសង់ឡើងវិញក្រោយសង្គ្រាម បញ្ហាស្រ្តីនិងកុមារនៅក្នុងសង្គ្រាម ឬការដោះស្រាយជាមួយគ្រាប់មិនទាន់ផ្ទុះជាដើម។

សូមជម្រាបថា ក្រៅពីវៀតណាម ប្រទេសដែលបានជាប់ឆ្នោតជាសមាជិកក្រុមប្រឹក្សានេះ រួមមាន អេស្តូនី, នីហ្សេរីយ៉ា, ទុយនេស៊ី និងប្រទេស Saint Vincent and the Grenadines។ ប្រទេសទាំង៥នេះ នឹងជំនួសកៅអីប្រទេស Equatorial Guinea, កូដូវ័រ, គូវែត (ជំនួសដោយវៀតណាម), ប៉ូឡូញ និងប៉េរូ។

ក្រុមប្រឹក្សាសន្តិសុខអង្គការសហប្រជាជាតិ មានសមាជិកចំនួន១៥ ក្នុងនោះ ៥ប្រទេសជាសមាជិកអាចិន្រ្តៃយ៍រួមមាន៖ អង់គ្លេស, ចិន, បារាំង, រុស្ស៊ី និងសហរដ្ឋអាមេរិក។ ចំណែក១០ទៀត គឺជាសមាជិកមិនអាចិន្ត្រៃយ៍ ដែលត្រូវបោះឆ្នោតជ្រើសរើសសម្រាប់អាណត្តិរយៈពេល២ឆ្នាំ៕

ប្រភព៖ Vietnam News ប្រែសម្រួល៖ សំភី