រដ្ឋមន្រ្តីបង្ហើបគម្រោងស្នើសុំដាក់បញ្ចូល «នំបញ្ចុកខ្មែរ» ជាសម្បត្តិបេតិកភណ្ឌពិភពលោក
- 2019-06-10 04:37:06
- ចំនួនមតិ 0 | ចំនួនចែករំលែក 0
រដ្ឋមន្រ្តីបង្ហើបគម្រោងស្នើសុំដាក់បញ្ចូល «នំបញ្ចុកខ្មែរ» ជាសម្បត្តិបេតិកភណ្ឌពិភពលោក
ចន្លោះមិនឃើញ
លោក ថោង ខុន រដ្ឋមន្ត្រីក្រសួងទេសចរណ៍ បានបង្ហាញឆន្ទៈយ៉ាងមុតមាំចំពោះប្រជាពលរដ្ឋកម្ពុជាថា លោកនឹងពិភាក្សាជាមួយលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ អំពីការស្នើដាក់នំបញ្ចុកម្ហូបតំណាងអត្តសញ្ញាណជាតិខ្មែរ និងពិចារណារៀបចំស្នើសុំទៅអង្គការយូណេស្កូសុំដាក់បញ្ចូល «នំបញ្ចុកខ្មែរ» ជាសម្បត្តិបេតិកភណ្ឌរូបិយពិភពលោក។ នេះបើតាមការចុះផ្សាយរបស់ក្រសួងទេសចរណ៍ កាលពីថ្ងៃទី៩ ខែមិថុនា ឆ្នាំ២០១៩។
ការបញ្ជាក់ខាងលើនេះ ត្រូវបានធ្វើឡើងក្នុងកិច្ចប្រជុំជាមួយថ្នាក់ដឹកនាំ និងសមាជិកក្រុមការងារថ្នាក់ជាតិស្រុកបារាយណ៍ និងស្រុកតាំងគោក កាលពីថ្ងៃទី៨ ខែមិថុនា ឆ្នាំ២០១៩ ដើម្បីត្រៀមរៀបចំពិធីពិសានំបញ្ចុកសន្តិភាព សាមគ្គី ឯកភាពជាតិ ជាមួយប្រជាពលរដ្ឋទាំងពីរស្រុកខាងលើ នាថ្ងៃទី៩ ខែមិថុនា ឆ្នាំ២០១៩។
លោក ថោង ខុន ជឿជាក់ថា នំបញ្ចុកខ្មែរនេះ ប្រាកដជាមានប្រជាពលរដ្ឋនៅទូទាំងប្រទេសបានស្គាល់ និងបានបរិភោគគ្រប់គ្នា ហើយមិនចាញ់នំបរទេសផ្សេងឡើយ។ លោកក៏បានបញ្ជាក់អះអាងដែរថា កើតក្នុងត្រកូលគ្រួសារក្រីក្រម្នាក់ លោកបានចេះធ្វើនំបញ្ចុកច្បាស់លាស់ តាំងពីកុមារភាព ជាមួយនឹងគ្រួសារដ៏កំសត់របស់លោក។
នៅក្នុងពិព័រណ៍ម្ហូបអាហារ Gastronomy ដែលក្រសួងទេសចរណ៍ប្រុងរៀបចំក្នុងខែកញ្ញា ឆ្នាំ២០១៩ ខាងមុខ នំបញ្ចុក និងម្ហូបអាហារខ្មែរមួយចំនួនទៀត ដូចជា សម្លរម្ជូរគ្រឿង អាម៉ុក បង្អែមគ្រាប់ត្នោត ។ល។ ក៏នឹងត្រូវបានត្រៀមរៀបចំ ជាតំណាងឱ្យម្ហូបអាហារខ្មែរដើម្បីទាក់ទាញទេសចរផងដែរ។ នេះជាការបញ្ជាក់បន្ថែមរបស់រដ្ឋមន្រ្តីក្រសួងទេសចរណ៍៕