ក្រសួងណែនាំឱ្យភាគីកូរ៉េ កែតម្រូវចំណុចមួយចំនួន ក្នុងគម្រោងលើកកម្រិតផ្លូវជាតិលេខ៤៨

2019-06-11 06:33:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កិច្ចប្រជុំរវាងក្រសួងសាធារណការ និងដឹកជញ្ជូន និងក្រុមហ៊ុនទីប្រឹក្សាបច្ចេកទេសកូរ៉េ (KCI) កាលពីថ្ងៃទី១០ ខែមិថុនា ឆ្នាំ២០១៩ ត្រូវបានធ្វើឡើងដើម្បីពិភាក្សាអំពីគម្រោងលើកកម្រិតផ្លូវជាតិលេខ៤៨។ ក្នុងនោះអង្គប្រជុំបានផ្តល់យោបល់ដល់ក្រុមហ៊ុនធ្វើការពិនិត្យឡើងវិញ និងធ្វើការកែតម្រូវទៅលើចំណុចបច្ចេកទេសមួយចំនួន ក្នុងរបាយការណ៍ដែលមិនទាន់ឆ្លើយតបទៅនឹងបទដ្ឋានបច្ចេកទេស។

សូមជម្រាបថា កិច្ចប្រជុំនេះដឹកនាំដោយលោក សូរ វិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រង និងសម្របសម្រួលគម្រោងផ្លូវជាតិលេខ៤៨ និងមានការចូលរួមពីសមាជិកសមាជិកាគម្រោងទីប្រឹក្សាបច្ចេកទេសកូរ៉េ (KCI) និងភាគីពាក់ព័ន្ធផងដែរ។

រូបថត៖ ក្រសួងសាធារណការ និងដឹកជញ្ជូន

កិច្ចប្រជុំនេះមានគោលបំណង ដើម្បីសម្រេចទៅលើបញ្ហាដែលនៅសេសសល់មួយចំនួនកាលពីកិច្ចប្រជុំលើកមុន និងបន្តពិនិត្យពិភាក្សាលើរបាយការណ៍លើកទី៤ របស់ក្រុមប្រឹក្សាបច្ចេកទេសកូរ៉េ ដែលបានធ្វើការសិក្សាលម្អិតទៅលើប្លង់គម្រោងលើកកម្រិតគុណភាពផ្លូវជាតិលេខ៤៨។

ក្រសួងសាធារណការ បានឱ្យដឹងថា ផ្លូវជាតិលេខ៤៨នេះ មានប្រវែង១៥០គីឡូម៉ែត្រ ចាប់ពីផ្លូវបំបែកស្រែអំបិល ទៅដល់ទីរួមខេត្តកោះកុង។ ផ្លូវនេះ បានទទួលរងការខូចខាតដោយជំនន់ទឹកភ្លៀង ការដឹកជញ្ជូនលើសទម្ងន់កម្រិតកំណត់ និងកត្តាធម្មជាតិផ្សេងៗទៀត ហើយបច្ចុប្បន្នកំពុងស្ថិតក្នុងគម្រោងសិក្សាលទ្ធភាពស្តារ និងធ្វើឱ្យប្រសើរឡើងវិញ ក្រោមឥណទានប្រាក់កម្ចីរបស់សាធារណរដ្ឋកូរ៉េ(EDCF)។

តាមការលើកឡើងរបស់លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន នាពេលកន្លងមក បានឱ្យដឹងថា ការលើកកម្ពស់គុណភាពផ្លូវជាតិលេខ៤៨នេះ គឺក្រោមកម្ចីរបស់សាធារណរដ្ឋកូរ៉េប្រមាណ ៦៧លានដុល្លារ និងថវិកាបដិភាគរបស់រាជរដ្ឋាភិបាលប្រមាណ ៨លានដុល្លារ។ គោលបំណង គឺដើម្បីឱ្យផ្លូវនេះ រក្សាបានភាពយូរអង្វែង អាចទ្រទម្ងន់បានប្រសើរជាងមុន និងចូលរួមចំណែកក្នុងការសម្រួលដល់ការធ្វើ ដំណើររបស់ប្រជាពលរដ្ឋ ព្រមទាំងការដឹកជញ្ជូន ឱ្យកាន់តែប្រសើរមួយកម្រិតទៀត៕

អត្ថបទ៖ សំភី