រដ្ឋមន្រ្តីការបរទេសកម្ពុជា ស្នើឱ្យម៉ាឡេស៊ីជួយបន្តទិញអង្ករ និងជួយការពារពលករខ្មែរ

2019-06-11 08:48:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាក់ សុខុន ឧបនាយករដ្ឋមន្ត្រី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានអរគុណដល់ប្រទេសម៉ាឡេស៊ី ដែលបានទទួលទិញ អង្ករពីកម្ពុជា មានចំនួនជាង ៤ម៉ឺនតោន នៅក្នុងឆ្នាំ២០១៨កន្លងទៅ។ ជាមួយគ្នានោះដែរ លោកបានស្នើសុំឲ្យម៉ាឡេស៊ី ទិញអង្ករពីកម្ពុជា ចូលទីផ្សារម៉ាឡេស៊ី ឲ្យបានចំនួនកាន់តែច្រើនទៀត។ នេះបើតាមការបញ្ជាក់របស់លោកស្រី ទួត បញ្ញា អនុរដ្ឋលេខាធិការក្រសួងការបរទេស ក្រោយជំនួបពិភាក្សារវាងលោក ប្រាក់ សុខុន ជាមួយលោក Eldeen Hu saini BIN MOHD HASHIM ឯកអគ្គរាជទូតថ្មីនៃប្រទេសម៉ាឡេស៊ីប្រចាំកម្ពុជា នាព្រឹកថ្ងៃទី១១ ខែមិថុនា ឆ្នាំ២០១៩។

រូបថត៖ ក្រសួងការបរទេស

ដោយឡែកទាក់ទងនឹងពលករកម្ពុជា ទៅធ្វើការនៅប្រទេសម៉ាឡេស៊ី លោកឧបនាយករដ្ឋមន្ត្រី បានស្នើឲ្យរដ្ឋាភិបាលម៉ាឡេស៊ី សហការជាមួយអង្គការអន្តរជាតិ និងស្ថានឯកអគ្គរាជទូតកម្ពុជា ដើម្បី ជួយដល់ពលករខ្មែរដែលមានបញ្ហាពេលធ្វើការនៅម៉ាឡេស៊ី។ ក្នុងនោះលោកក៏បានស្នើឲ្យភាគីម៉ាឡេស៊ី បន្តជួយគាំទ្រក្នុងការការពារសិទ្ធិពលករកម្ពុជា ដែលធ្វើការនៅម៉ាឡស៊ី ។

ឯកអគ្គរាជទូតម៉ាឡេស៊ី បានជម្រាបជូនលោកឧបនាយករដ្ឋមន្ត្រីវិញថា បញ្ហាពលករនេះគឺជាបញ្ហាអាទិភាពនៃរដ្ឋាភិបាលម៉ាឡេស៊ី ដូច្នេះរដ្ឋាភិបាលម៉ាឡេស៊ី នៅតែបន្តកិច្ចសហការជាមួយរដ្ឋាភិបាលកម្ពុជា ជួយការពារពលករខ្មែរ។

សូមជម្រាបថា នៅឆ្នាំ២០១៧ ទំហំពាណិជ្ជកម្មរវាងប្រទេសទាំងពីរមានទំហំទឹកប្រាក់ចំនួន ៤១១លានដុល្លារ ហើយទំហំពាណិជ្ជកម្ម នៅឆ្នាំ២០១៨ បានកើនឡើងដល់ចំនួន ៤៧០លានដុល្លារ។ ភាគីទាំងពីរប្តេជ្ញាបង្កើនទំហំពាណិជ្ជកម្ម និងវិនិយោគ បន្តទៀតផងដែរ៕

អត្ថបទ៖ សោភា